ລັດຖະບານແຟງລັງ ( Finland) ໄດ້ທົດລອງແຈກເງິນເດືອນຂັ້ນຕ່ຳ (basic income) ໃຫ້ກັບຜູ້ທີ່ມີລາຍຮັບໜ້ອຍ ແລະ ຄົນວ່າງງານຈຳນວນ 2.000 ຄົນ ເປັນໄລຍະເວລາ 1 ປີ ນັບແຕ່ວັນທີ 1 ມັງກອນ 2017 ຫາ 31 ທັນວາ 2018.
ຜູ້ເຂົ້າຮ່ວມໂຄງການດັ່ງກ່າວໄດ້ຮັບເງິນຕອບແທນເດືອນລະ 560 ຢູໂຣ ໂດຍບໍ່ຈຳເປັນຕ້ອງເສຍພາສີ ລວມເຖິງບໍ່ຈຳກັດວ່າຈະນຳເງິນໄປໃຊ້ແນວໃດ ເຖິງແມ່ນວ່າພາຍຫຼັງຄົນວ່າງງານບາງຄົນຈະໄດ້ວຽກເຮັດແລ້ວກໍ່ຕາມ.
ສຳລັບໂຄງການດັ່ງກ່າວມີຈຸດປະສົງເພື່ອທົດລອງວ່າການໃຫ້ສະຫວັດດີການໃນລັກສະນີ້ຈະຊ່ວຍກະຕຸ້ນໃຫ້ຄົນວ່າງງານ ຫຼື ຄົນທີ່ມີລາຍຮັບໜ້ອຍ ຫັນມາເຮັດວຽກໄລຍະສັ້ນ ຫຼື ສະແຫວງຫາວຽກງານພາສທາມໄດ້ ຫຼື ບໍ່ ເນື່ອງຈາກປັດຈຸບັນແຟງລັງມີອັດຕາຄົນວ່າງງານຈຳນວນໜຶ່ງທີ່ບໍ່ກ້າເຮັດວຽກພາສທາມ ຍ້ອນຢ້ານເສຍສິດໃນສະຫວັດດີການຄົນວ່າງງານດ້ານຕ່າງໆທີ່ລັດມອບໃຫ້.
ຫຼ້າສຸດທາງດ້ານກະຊວງກິດຈະການສັງຄົມ ແລະ ສາທາລະນະສຸກຂອງແຟງລັງໄດ້ເປີດເຜີຍຜົນການທົດລອງຂອງໂຄງການດັ່ງກ່າວວ່າ ການແຈກເງິນເດືອນຂັ້ນຕໍ່າໃຫ້ກັບຜູ້ວ່າງງານ ແລະ ຜູ້ທີ່ມີລາຍຮັບໜ້ອຍນັ້ນຖືວ່າເປັນເລື່ອງທີ່ລົ້ມເຫຼວແບບໝົດທ່າມັນບໍ່ໄດ້ຊ່ວຍກະຕຸ້ນໃຫ້ພວກເຂົາມີວຽກເພີ່ມຂຶ້ນ ຫຼື ເຮັດໃຫ້ຊີວິດການເປັນຢູ່ດີຂຶ້ນ ແລະ ບໍ່ໄດ້ຊ່ວຍກະຕຸ້ນໃຫ້ຄົນວ່າງງານກັບໄປຊອກວຽກເຮັດ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: posttoday