ກອງປະຊຸມສະຫຼຸບວຽກງານໄອຍະການປະຊາຊົນທົ່ວປະເທດ ປະຈຳປີ 2018 ໄດ້ຈັດຂຶ້ນເມື່ອວັນທີ 4 ກຸມພາ 2019 ທີ່ຜ່ານມາ ໂດຍການເປັນປະທານຂອງທ່ານ ຄຳສານ ສຸວົງ ຫົວໜ້າອົງການໄອຍະການປະຊາຊົນສູງສຸດ, ມີຕາງໜ້າລັດຖະມົນຕີບັນດາກະຊວງ, ອົງການໄອຍະການປະຊາຊົນໃນຂອບເຂດທົ່ວປະເທດ ແລະ ແຂກຮັບເຊີນເຂົ້າຮ່ວມ.
ໂອກາດນີ້, ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ໃຫ້ທິດຊີ້ນຳອົງການໄອຍະການປະຊາຊົນທຸກຂັ້ນຕ້ອງເພີ່ມທະວີການຕິດຕາມກວດກາ ການຈັດຕັ້ງປະຕິບັດກົດໝາຍ ແລະ ການສັ່ງຟ້ອງຜູ້ກະທຳຜິດຂຶ້ນສານໃຫ້ຮັບປະກັນຄວາມຖືກຕ້ອງ ແລະ ຍຸຕິທຳ, ມີຂໍ້ມູນຫຼັກຖານຮັດກຸມ,ຖືກຕ້ອງຕາມຄວາມເປັນຈິງ, ຖືກຕ້ອງຕາມມາດຕາຂອງກົດໝາຍ ເພື່ອຮັບປະກັນຄວາມຖືກຕ້ອງ.
ໃນນີ້, ໄດ້ສົ່ງຄືນເຈົ້າໜ້າທີ່ ເພື່ອດຳເນີນການສືບສວນ-ສອບສວນຄືນໃໝ່ 2.213 ເລື່ອງ, ໂຈະການດຳເນີນຄະດີ 41 ເລື່ອງ, ຊັດມ້ຽນ 345 ເລື່ອງ, ຖະແຫຼງສົ່ງສານຂັ້ນຕົ້ນ 6.706 ເລື່ອງ, ຖະແຫຼງ ແລະ ສັ່ງຟ້ອງຄະດີໃນທີ່ປະຊຸມສານ 5.646 ເລື່ອງ, ສານຕັດສິນຕາມຄຳຖະແຫຼງ 5.448 ເລື່ອງ, ສະເໜີຄັດຄ້ານຄຳຕັດສິນຂອງສານຂັ້ນຕົ້ນ 4 ເລື່ອງ, ສົ່ງພາກສ່ວນອື່ນພິຈາລະນາແກ້ໄຂ 366 ເລື່ອງ.
ໃນປີ 2018 ທີ່ຜ່ານມາ ອົງການໄອຍະການປະຊາຊົນໄດ້ຮັບສຳນວນຄະດີອາຍາທີ່ຍັງຄ້າງ ແລະ ເຂົ້າໃໝ່ ທັງໝົດ 10.068 ເລື່ອງ ທຽບໃສ່ປີ 2017 ເພີ່ມຂຶ້ນ 528 ເລື່ອງ, ໄດ້ແກ້ໄຂແລ້ວ 9.671ເລື່ອງ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: lsecuritynews