ອຳນາດການປົກຄອງແຂວງບໍລິຄຳໄຊໄດ້ຮຽກຄືນທີ່ດິນຂອງລັດຈຳນວນ 682.87 ເຮັກຕາ ທີ່ຖືກຂາຍໂດຍຊາວບ້ານ ທີ່ຂຶ້ນກັບເມືອງບໍລິຄັນເມື່ອສອງປີທີ່ຜ່ານມາ.
ພະແນກຊັບພະຍາກອນທຳມະຊາດ ແລະ ສິ່ງແວດລ້ອມຂອງແຂວງໄດ້ອອກຂໍ້ຕົກລົງລົບລ້າງສິດນຳໃຊ້ ແລະ ໃບຕາດິນປອມ ແລະ ມອບຄືນທີ່ດິນໃຫ້ເປັນກຳມະສິດຂອງລັດ. ການຄອບຄອງທີ່ດິນຂອງລັດແບບຜິດກົດໝາຍໄດ້ກາຍມາເປັນຕົ້ນເຫດຂອງບັນຫາຂໍ້ຂັດແຍ່ງທາງດ້ານທີ່ດິນໃນຫລາຍປີທີ່ຜ່ານມາ ເຮັດໃຫ້ລັດຖະບານໄດ້ດຳເນີນການແກ້ໄຂບັນຫາຢ່າງຈິງຈັງ.
ຊາວບ້ານບາງຈຳນວນຂອງແຂວງບໍລິຄຳໄຊ ໄດ້ໝາຍເອົາທີ່ດິນຂອງລັດຈຳນວນ 62 ຕອນຢ່າງຜິດກົດໝາຍ ແລະ ນຳໄປເຮັດໃບຕາດິນປອມ ເພື່ອຂາຍໃຫ້ກັບບໍລິສັດເອກະຊົນຕ່າງໆ, ອີງຕາມການໃຫ້ສຳພາດຂອງ ທ່ານ ບຸນທະວີ ດວງພະຈັນ, ຮອງຫົວໜ້າພະແນກກວດກາພັກ-ລັດ ແຂວງບໍລິຄຳໄຊ ຕໍ່ໜັງສືພິມວຽງຈັນທາມ໌ ໃນມື້ວັນສຸກທີ່ຜ່ານມາ. ເຊິ່ງທີ່ດິນຕອນດັ່ງກ່າວແມ່ນນອນຢູ່ໃນເຂດບ້ານນໍ້າປາ, ບ້ານຫ້ວຍຄູນ ແລະ ບ້ານໂພນທອງ ຕາມການລາຍງານຂອງທ່ານ ບຸນທະວີຕໍ່ກອງປະຊຸມສະໃໝສາມັນຄັ້ງທີ 6 ຂອງສະພາປະຊາຊົນແຂວງ. ຈຳນວນດິນຕອນດັ່ງກ່າວແມ່ນຖືກຂາຍເປັນເງິນຈຳນວນ 1,3 ຕື້ກີບ, ປັດຈຸບັນນີ້ອົງການຈັດຕັ້ງທີ່ກ່ຽວຂ້ອງສາມາດຮຽກເກັບຄືນເງິນຈຳນວນດັ່ງກ່າວ ແລະ ມອບກັບໃຫ້ລັດ.
“ເງິນຈຳນວນດັ່ງກ່າວແມ່ນໄດ້ມາໂດຍຜິດກົດໝາຍ ສະນັ້ນຈິ່ງຖືກຢຶດຄືນຈາກຜູ້ຂາຍ ແລະ ປັດຈຸບັນນີ້ເງິນຈຳນວນດັ່ງກ່າວແມ່ນກາຍເປັນຊັບສິນຂອງລັດ” ທ່ານບຸນທະວີກ່າວ.
ມີພະນັກງານລັດບາງຄົນມີຄວາມກ່ຽວຂ້ອງກັບການຂາຍທີ່ດິນຂອງລັດຢ່າງຜິດກົດໝາຍໃນຄັ້ງນີ້ ແລະ ພວກກ່ຽວແມ່ນໄດ້ຖືກປະຕິບັດວິໃນຕາມກົດໝາຍ ແລະ ລະບຽບການທີ່ກ່ຽວຂ້ອງ. ລວມທັງບຸກຄົນ ແລະ ຫົວໜ່ວຍທຸລະກິດທີ່ກ່ຽວຂ້ອງແມ່ນໄດ້ຮັບການດຳເນີນຄະດີຕາມລະບຽບກົດໝາຍເຊັ່ນກັນ.ລາຍງານຍັງໃຫ້ຮູ້ຕື່ມອີກວ່າຍັງມີຫລາຍຄົນທີ່ທັກທ້ວງກ່ຽວກັບການໃຫ້ຄ່າຊົດເຊີຍທີ່ຍັງບໍ່ທັນສົມເຫດສົມຜົນ ໃຫ້ແກ່ເຈົ້າຂອງທີ່ດິນໃນກໍລະນີທີ່ດິນຂອງຕົນຖືກໂຄງການພັດທະນາດ້ານຕ່າງໆ. ເຖິງແມ່ນວ່າຈະເປັນນະໂຍບາຍຂອງລັດຖະບານທີ່ຈະຕ້ອງຈ່າຍຄ່າຊົດເຊີຍຢ່າງເປັນທຳ ແລະ ສົມເຫດສົມຜົນທີ່ສຸດ.
ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ກ່າວໃນໄລຍະຜ່ານມາວ່າ: ມີບຸກຄົນ ແລະ ອົງການຈັດຕັ້ງຫລາຍໆໜ່ວຍງານປອມແປງເອກະສານສິດນຳໃຊ້ທີ່ດິນທີ່ເປັນຂອງລັດ ແລະ ເປັນປະກົດການທີ່ແຜ່ຫລາຍໃນໄລຍະຜ່ານມາເຮັດໃຫ້ທີ່ດິນຂອງລັດມີຈຳນວນຫລຸດໜ້ອຍຖອຍລົງ.
ຂໍ້ຂັດແຍ່ງທາງດ້ານສິດການນຳໃຊ້ທີ່ດິນໄດ້ກາຍມາເປັນບັນຫາຫລັກທີ່ໄດ້ຮັບການສອບຖາມຈາກສາຍດ່ວນສະພາແຫ່ງຊາດໃນຊຸມປີທີ່ຜ່ານມາ. ເພື່ອແກ້ໄຂບັນຫາດັ່ງກ່າວ ລັດຖະບານໄດ້ສ້າງຕັ້ງຄະນະກຳມະການສະເພາະກິດ ເພື່ອກວດກາ ແລະ ແກ້ໄຂບັນດາຂໍ້ຂັດແຍ່ງທາງດ້ານທີ່ດິນ. ລັດຖະບານໄດ້ມອບໃຫ້ຄະນະກຳມະການດັ່ງກ່າວທົບທວນຄືນກ່ຽວກັບການສຳປະທານ ແລະ ການໂອນສິດນຳໃຊ້ທີ່ດິນໃນຫລາຍໆກໍລະນີ. ການກວດກາ ຍັງຈະໄດ້ມີການພິຈາລະນາຄືນວ່າທີ່ດິນທີ່ຖຶກຄອບຄອງນັ້ນແມ່ນຖືກຕ້ອງຕາມກົດໝາຍຫລືບໍ່, ແລະ ລວມໄປເຖິງກໍລະນີການອ້າງສິດນຳໃຊ້ທີ່ດິນທີ່ຕິດພັນກັບທີ່ດິນຂອງລັດໂດຍຊຸມຊົນທ້ອງຖິ່ນ.
ຮຽບຮຽງ ແລະ ແປໂດຍ: ບຸນມີ ບຸນມີໄຊ
ແຫຼ່ງຂ່າວ: ວຽງຈັນທາມສ໌