ໃນວັນທີ 8 ກຸມພາ 2019 ທີ່ຜ່ານມາທີ່​ເຂດ​ເສດ­ຖະ­ກິດ​ພິ­ເສດ​ກວມ​ລວມ​ໄຊ​ເສດ​ຖາ ໄດ້ມີການຈັດພິ­ທີ​ວາງ​ສີ​ລາ​ລຶກ​ກໍ່­ສ້າງ​ໂຮງ­ງານ​ຜະ­ລິດ​ແຜ່ນ​ເມັມ​ໂມ​ຣີ​ດິ​ສ ສຳ­ລັບ Hard Disk Drive ຂອງ​ບໍ­ລິ­ສັດ ໂຮ​ຢາ​ລາວ ໂດຍ​ມີ​ທ່ານ ສຸ­ພັນ ແກ້ວ​ມີ​ໄຊ ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ທ່ານ Takeshi Hikihara ເອກ​ອັກ­ຄະ­ລັດຖະ­ທູດ​ຍີ່­ປຸ່ນ ປະ­ຈຳ​ລາວ ທ່ານ ແກ້ວ​ພິ­ລາ​ວັນ ອາ​ໄພ​ລາດ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທ່ານ Eiichiro Ikeda ປະ­ທານ​ເຈົ້າ​ໜ້າ­ທີ່​ຝ່າຍ​ປະ­ຕິ­ບັດ​ການ​ບໍ­ລິ­ສັດ HOYA Corporation ພ້ອມ​ດ້ວຍ​ແຂກ​ຖືກ​ເຊີນ​ທັງ​ພາຍ​ໃນ ແລະ ຕ່າງ­ປະ­ເທດ​ເຂົ້າ​ຮ່ວມ.

ສປປ ລາວ ເປັນ​ສະ­ຖານ­ທີ່ໆ​ເໝາະ​ສົມ​ສຳ­ລັບ​ການ​ສ້າງ­ຕັ້ງ​ໂຮງ­ງານ​ຜະ­ລິດ​ແຫ່ງ​ໃໝ່ ໂດຍ​ບໍ­ລິ­ສັດ ໂຮ​ຢາ​ລາວ ຈະ​ມີ​ສ່ວນ​ຊ່ວຍ​ສ້າງ​ວຽກ​ເຮັດ​ງານ​ທຳ​ໃນ ສປປ ລາວ ໄດ້​ຫຼາຍ​ກວ່າ 4.000 ຕຳ­ແໜ່ງ ແຜ່ນ​ເມັມ​ໂມ​ຣີ​ດິ​ສ ສຳ­ລັບ Hard Disk Drive ຂອງ​ໂຮ​ຢາ ນອກ­ຈາກ​ຈະ​ນຳ​ໃຊ້​ສຳ­ລັບ​ບັນ­ທຶກ​ຂໍ້​ມູນ​ໃນ​ຄອມ​ພິວ​ເຕີ​ໂນດ​ບຸກ​ແລ້ວ ຍັງ​ໃຊ້​ໃນ​ການ​ຈັດ​ເກັບ​ຂໍ້​ມູນ​ໃນ Cloud ລວມ​ເຖິງ​ໃຊ້​ບັນ­ທຶກ​ຂໍ້​ມູນ​ອຸ­ປະ­ກອນ​ຕ່າງໆ ທີ່​ເຊື່ອມ​ຕໍ່​ກັບ​ອິນ​ເຕີ​ເນັດ​ອີກ​ດ້ວຍ ເຊິ່ງ​ເມັມ​ໂມ​ຣີ​ຂອງ​ໂຮ​ຢາ ຕອບ​ສະ­ໜອງ​ຄວາມ​ຕ້ອງ­ການ​ຂອງ​ລູກ​ຄ້າ ໂດຍ​ການ​ພັດ­ທະ­ນາ​ດ້ານ​ເຕັກ​ໂນ​ໂລ​ຊີ ແລະ ຄຸນ​ນະ​ພາບ​ຢ່າງ​ຕໍ່​ເນື່ອງ.

ບໍ­ລິ­ສັດ HOYA Corporation ໃຊ້​ທຶນ​ຫຼາຍ​ກວ່າ 300 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 2.569 ຕື້​ກີບ ເພື່ອ​ສ້າງ­ຕັ້ງ​ໂຮງ­ງານ​ໂຮ​ຢາ​ລາວ​ຂຶ້ນ​ຢູ່​ນະ­ຄອນ­ຫຼວງ​ວຽງ​ຈັນ ເຊິ່ງ​ຈະ​ຜະ­ລິດ​ແຜ່ນ​ເມັມ​ໂມ​ຣີ​ດິ​ສ ສຳ­ລັບ Hard Disk Drive ໂດຍ​ຄາດ​ວ່າ​ຈະ​ສ້າງ​ສຳ­ເລັດ ແລະ ເລີ່ມ​ຜະ­ລິດ​ນັບ​ແຕ່​ຕົ້ນ​ປິ 2020 ເປັນ­ຕົ້ນ​ໄປ ເມື່ອ​ໂຮງ­ງານ​ແຫ່ງ​ນີ້​ສຳ­ເລັດ​ສົມ­ບູນ ຈະ​ເປັນ​ໂຮງ­ງານ​ແຫ່ງ​ໃໝ່​ທີ່​ສາ­ມາດ​ຜະ­ລິດ​ແບບ​ຄົບ​ວົງ​ຈອນ ດ້ວຍ​ເຕັກ​ໂນ​ໂລ​ຊີ​ການ​ຜະ­ລິດ​ທີ່​ທັນ​ສະ­ໄໝ, ໂຮງ­ງານ​ແຫ່ງ​ນີ້ ຍັງ​ຈະ​ເປັນ​ຫົວ­ໃຈ​ສຳ­ຄັນ​ໃນ​ການ​ສະ­ໜັບ­ສະ­ໜູນ​ການ​ຂະ­ຫຍາຍ­ຕົວ​ໃນ​ອະ­ນາ­ຄົດ ຂອງ​ອຸດ­ສາ­ຫະ­ກຳ​ການ​ຜະ­ລິດ​ແຜ່ນ​ເມັມ​ໂມ​ຣີ​ດິ​ສ ປັດ­ຈຸ­ບັນ​ກຸ່ມ​ໂຮ​ຢາ ມີ​ໂຮງ­ງານ​ຜະ­ລິດ​ແຜ່ນ​ເມັມ​ໂມ​ຣີ​ດິ​ສ ສຳ­ລັບ Hard Disk Drive ຢູ່​ປະ­ເທດ​ໄທ ແລະ ຫວຽດ­ນາມ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ໜັງສືພິມວຽງຈັນໃໝ່