ເມື່ອວັນທີ 6 ກຸມພາ 2019 ທີ່ຜ່ານມາ ສື່ຂ່າວລັດເຊຍລາຍງານວ່າ ອົງການອະວະກາດສະຫະພັນລັດລັດເຊຍ ແລະ ສະພາລັດບັນດິດວິທະຍາສາດແຫ່ງສະຫະພັນລັດ ລັດເຊຍ ໄດ້ມີຄວາມເຫັນວ່າມັນເຖິງເວລາແລ້ວທີ່ລັດເຊຍຕ້ອງມີຜູ້ຊ່ຽວຊານດ້ານກົດໝາຍອະວະກາດ ເພື່ອປົກປ້ອງຜົນປະໂຫຍດຂອງຊາດ ໃນກໍລະນີຄອບຄອງດິນແດນເທິງດວງຈັນ.
ຄວາມເຫັນດັ່ງກ່າວມີຂຶ້ນຫຼັງຈາກການປະຊຸມຮ່ວມກັນຂອງສອງໜ່ວຍງານກ່ຽວກັບການພັດທະນາໂຄງການສຳຫຼວດ ແລະ ການຕັ້ງຖິ່ນຖານເທິງດວງຈັນ ເມື່ອໄລຍະເດືອນ ພະຈິກ 2018 ທີ່ຜ່ານມາ.
ທ່ານ ເກນນາດີ ໄຮນູຄອຟ ອະດີດຜູ້ອຳນວຍການສະຖາບັນເຕັກໂນໂລຢີອະວະກາດ ມະຫາວິທະຍາໄລມິດຕະພາບແຫ່ງປະຊາຊົນລັດເຊຍ ອະທິບາຍວ່າ ຄວາມຈຳເປັນໃນການກຽມນັກກົດໝາຍອະວະກາດເກີດຂຶ້ນ ເພາະບັນດາບໍລິສັດເອກະຊົນຕ່າງຊາດໄດ້ອ້າງສິດໃນການຄອບຄອງດິນແດນ ແລະ ແຮ່ທາດເທິງດວງຈັນເພີ່ມຂຶ້ນ.
ຢ່າງໃດກໍ່ຕາມ, ສົນທິສັນຍາດວງຈັນ ຫຼື ຄວາມຕົກລົງວ່າດ້ວຍກິດຈະກຳຂອງລັດເທິງດວງຈັນ ເຊິ່ງໄດ້ຮັບການອະນຸມັດຈາກກອງປະຊຸມໃຫຍ່ສະຫະປະຊາຊາດເມື່ອປີ 1979 ລະບຸວ່າ ດວງຈັນບໍ່ຢູ່ພາຍໃຕ້ການຖືຄອບຄອງຂອງຊາດໃດຊາດໜຶ່ງດ້ວຍການອ້າງສິດອະທິປະໄຕເໜືອດວງຈັນ ດ້ວຍກິດຈະກຳໃດ ຫຼື ວິທີການໃດໆກໍ່ຕາມ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: sanook