ກອງຈັດການຄຸນນະພາບອາກາດ ແລະ ສຽງ ການຄວບຄຸມມົນລະພິດລາຍງານເມື່ອເວລາ 12:00ໂມງ ຂອງວັນທີ 7 ກຸມພາ 2019 ໃນພື້ນທີ່ຈັງຫວັດຂອນແກ່ນພົບຄ່າຝຸ່ນລະອອງຂະໜາດ PM 2.5 ສູງເຖິງ 99 ໄມໂຄຣກຣັມຕໍ່ລູກບາດແມັດ ແລະ ມີຄ່າ PM 10 ຢູ່ທີ່ 163 ໄມໂຄຣກຣັມຕໍ່ລູກບາດແມັດ ສົ່ງຜົນໃຫ້ຄ່າດັດຊະນີຕົວຊີ້ວັດຄຸນນະພາບອາກາດ ຫຼື AQI ສູງເຖິງ 209 ຢູ່ໃນລະດັບສີແດງ ມີຜົນກະທົບຕໍ່ສຸຂະພາບ.
ທ່ານ ສຸເທບ ມະນີໂຊກ ຮອງຜູ້ວ່າການຈັງຫວັດຂອນແກ່ນ ພ້ອມດ້ວຍເຈົ້າໜ້າທີ່ສຳນັກງານສິ່ງແວດລ້ອມພາກ 10 ປະຕິບັດການໃຊ້ລົດດັບເພີງສີດພົ່ນລະອອງນໍ້າຢູ່ບໍລິເວນສວນສະໜາມສານສາລາກາງຈັງຫວັດຂອນແກ່ນ ເຊິ່ງຢູ່ໃກ້ກັບສຳນັກງານ ແລະ ສະຖານສຶກສາຫຼາຍແຫ່ງ ຫວັງຫຼຸດບັນຫາຝຸ່ນລະອອງໃນອາກາດ.
ທ່ານ ສຸເທບ ກ່າວວ່າ ຈາກຜົນການກວດວັດຄຸນນະພາບໃນພື້ນທີ່ໃນເມືອງ ອຳເພີເມືອງ ຈັງຫວັດຂອນແກ່ນ ພົບ PM 2.5 ຢູ່ໃນເກນທີ່ມີຜົນກະທົບຕໍ່ສຸຂະພາບ ນອກຈາກນີ້, ຍັງພົບຝຸ່ນລະອອງ ຂະໜາດ PM 10 ຢູ່ໃນເກນເລີ່ມມີຜົນກະທົບຕໍ່ສຸຂະພາບຄືກັນ ທາງຈັງຫວັດຂອນແກ່ນຈຶ່ງດຳເນີນການເພື່ອຫຼຸດບັນຫາຝຸ່ນລະອອງດ້ວຍການສີດພົ່ນລະອອງນໍ້າຕາມຈຸດສຳຄັນໃນຕົວເມືອງ ແລະ ເຊີນເຈົ້າຂອງໂຮງງານນໍ້າຕານ ສະມາຄົມຊາວສວນອ້ອຍ ແລະ ສະຖານີຄວບຄຸມໄຟປ່າ ເຂົ້າມາປະຊຸມຫາລືແນວທາງປ້ອງກັນຝຸ່ນລະອອງໃນເຂດຈັງຫວັດຂອນແກ່ນ ເພາະສາເຫດສ່ວນໜຶ່ງມາຈາກການຈູດອ້ອຍ, ຈູດປ່າ ແລະ ຄວັນລົດບັນທຸກອ້ອຍ.
ນອກຈາກນີ້, ຍັງມີການສີດພົ່ນລະອອງນໍ້າພ້ອມກັນທັງ 26 ອຳເພີ ເພື່ອແກ້ໄຂບັນຫາຝຸ່ນລະອອງເກີນມາດຕະຖານ ທີ່ຈະສົ່ງຜົນກະທົບຕໍ່ສຸຂະພາບປະຊາຊົນໃຫ້ຫຼຸດລົງໄວທີ່່ສຸດ ແລະ ແນະນຳໃຫ້ປະຊາຊົນຄວນດູແລສຸຂະພາບ ຖ້າມີອາການເບື້ອງຕົ້ນເຊັ່ນ:ໄອ, ຫາຍໃຈລຳບາກ, ລະຄາຍເຄືອງຕາ, ຄວນຫຼຸດເວລາໃນການເຮັດກິດຈະກຳກາງແຈ້ງລົງ ແລະ ເຂົ້າພົບແພດໂດຍດ່ວນ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: workpointnews