ພາບທີ່ເຫັນຄົນປີນແນວກັ້ນທາງຂ້າມຈາກຝັ່ງໜຶ່ງເພື່ອຈະໄປຫາອີກຝັ່ງໜຶ່ງຄົງເປັນພາບທີ່ລຶ້ງຕາສຳລັບຄົນທີ່ເດີນທາງຜ່ານເສັ້ນແຖວໜ້າກະຊວງປ້ອງກັນຄວາມສະຫງົບຂຶ້ນມາຕະຫຼາດເຊົ້າ-ຂົວດິນເປັນປະຈຳ ແຕ່ສຳລັບຄົນທີ່ດົນໆໄດ້ຂັບລົດຜ່ານໄປເສັ້ນທາງນັ້ນອາດເກີດມີຫຼາຍອາລົມທີ່ຄາດເດົາໄດ້ຍາກ ບາງຄົນຄິດວ່າມັນເປັນເລື່ອງຕະລົກ ບາງຄົນທີ່ວ່າມັນເປັນເລື່ອງບໍ່ສົມຄວນ ບາງຄົນຄິດວ່າມັນເປັນຄວາມສ່ຽງອາດເຮັດໃຫ້ເກີດອຸບັດຕິເຫດໄດ້ ບາງຄົນຄິດວ່າມັນບໍ່ແມ່ນພາບລັກທີ່ຈົບງາມຂອງບ້ານເມືອງເລີຍ ແລ້ວຕົວທ່ານເດຄິດແນວໃດ?…
ຄວາມຈິງແລ້ວການທີ່ທາງໜ່ວຍງານກ່ຽວຂ້ອງ ຫຼື ພາກສ່ວນໂຍທານຳແນວກັ້ນທາງມາແບ່ງເສັ້ນທາງຂຶ້ນ-ເສັ້ນທາງລົງໃຫ້ຊັດເຈນ ກໍ່ເພື່ອແກ້ໄຂບັນຫາການສັນຈອນທີ່ສັບສົນ ແລະ ຕິດຂັດ ບໍ່ແມ່ນໄວ້ໃຫ້ຄົນປີນຂ້າມໄປມາ, ບັນຫາຄວາມແອອັດທາງດ້ານການສັນຈອນ ແລະ ຄວາມຫຍຸ້ງຍາກໃນການຂ້າມຖະໜົນເຂດຊຸມຊົນໃນຕົວເມືອງຍັງເປັນເລື່ອງທີ່ຕ້ອງໄດ້ຄິດຫາທາງອອກ ຖ້າອີງໃສ່ການຖອດຖອນບົດຮຽນໃນຕ່າງປະເທດໃນການແກ້ໄຂບັນຫາໃນເລື່ອງຄົນຍ່າງຂ້າມທາງໃນເຂດຊຸມຊົນ ພວກເຮົາຈະເຫັນໃນຕ່າງປະເທດມີຂົວຍົກລະດັບ (ສະພານລອຍ) ທີ່ໄວ້ໃຫ້ຄົນຍ່າງຂ້າມທາງຈາກອີກຟາກໜຶ່ງໄປຫາອີກຟາກໜຶ່ງ ເພື່ອຫຼຸດຜ່ອນການເກີດອຸບັດຕິເຫດແກ່ຄົນຍ່າງໃນຂະນະທີ່ຍ່າງຂ້າມທາງ.
ຕໍ່ກັບບັນຫາດັ່ງກ່າວທາງນັກຂ່າວລາວໂພສໄດ້ແຈ້ງເລື່ອງໄປທີ່ສາຍດ່ວນລັດຖະບານ 1516 ແລະ ສາຍດ່ວນກະຊວງໂຍທາ ແລະ ຂົນສົ່ງ 1518, ເຊິ່ງເຈົ້າໜ້າທີ່ທີ່ຮັບສາຍຈະນຳເລື່ອງກ່ຽວກັບຄົນປີນຂ້າມແນວກັ້ນທາງສົ່ງຕໍ່ຫາພາກສ່ວນທີ່ກ່ຽວເພື່ອຄົ້ນຄວ້າຫາແນວທາງແກ້ໄຂ, ເຖິງແມ່ນວ່າໃນປັດຈຸບັນນະຄອນຫຼວງວຽງຈັນຈະບໍ່ມີຂ່າວຄາວໃນການສ້າງຂົວຍົກລະດັບໃນເຂດຊຸມຊົມຕົວເມືອງ (ທາງຂ້າມຈາກຄິວລົດຕະຫຼາດຂົວດິນເກົ່າໄປຫາຕະຫຼາດເຊົ້າ) ແຕ່ເຈົ້າໜ້າທີ່ໄດ້ກ່າວວ່າຈະນຳເລື່ອງດັ່ງກ່າວສະເໜີໄປຫາພາກສ່ວນທີ່ກ່ຽວຂ້ອງເພື່ອໃຫ້ຄົ້ນຄວ້າພິຈາລະນາຕື່ມກ່ຽວກັບເລື່ອງການສ້າງຂົວຍົກລະດັບ.
ຂຽນບົດໂດຍ: ບຸດສະດີ ສາຍນໍ້າມັດ