ໃນເວລາ 17 ໂມງ ຂອງວັນທີ 04 ກຸມພາ 2019 ໄດ້ເກີດອຸບັດຕິເຫດລົດໃຫຍ່ຕຳກັນ 5 ຄັນຊ້ອນ ຢ່າງຮຸນແຮງ ຢູ່ຕໍ່ໜ້າກະຊວງປ້ອງກັນຄວາມສະຫງົບ, ຖະໜົນໜອງບອນ, ເມືອງ ຈັນທະບູລີ, ນະຄອນຫຼວງວຽງຈັນ. ເຫດດັ່ງກ່າວ, ເກີດຂຶ້ນໃນຂະນະທີ່ລົດຜ່ອນຄວາມໄວລົງລໍຖ້າໄຟແດງ ໂດຍມີລົດຈິບເຊັບໂລເລັດຄັນໜຶ່ງຕໍາເອົາທ້າຍລົດເກັງ ເຮັດໃຫ້ແລ່ນໄປຊ້ວນເອົາທ້າຍລົດວີໂກ້ທີ່ຈອດຢູ່ຕໍ່ໜ້າຢ່າງແຮງຈົນຍົກຂຶ້ນຢອງຢູ່ເທິງລົດເກັງອີກຄັນຫນຶ່ງ ແລ້ວລົດວີໂກ້ ກໍ່ໄປຕຳເອົາລົດອີກຄັນຫນຶ່ງອີກທີ່ຈອດຢູ່ທາງໜ້າ ໂຊກດີບໍ່ມີໃຜໄດ້ຮັບບາດເຈັບສາຫັດ.
ທ່ານພັນຕີ ວິລະພົງ ສະເໜ່ຫາ ຮອງຫົວໜ້າພະແນກຕຳຫຼວດຈະລາຈອນ ນະຄອນຫຼວງວຽງຈັນ ໃຫ້ຮູ້ວ່າ: ຕາມການກວດສອບເບື້ອງຕົ້ນພົບວ່າ: ອຸບັດຕິເຫດໄດ້ເກີດຂຶ້ນເວລາ 17 ໂມງ ໂດຍມີລົດທີ່ກ່ຽວພັນປະສົບເຫດທັງໝົດ 5 ຄັນ. ກ່ອນເກີດເຫດ, ລົດແຕ່ລະຄັນໄດ້ຜ່ອນຄວາມໄວລົງເພື່ອຈອດໄຟແດງ ແຕ່ລົດຈິບເຊັບໂລເລັດຄັນໜຶ່ງໄປຕຳເອົາທ້າຍຂອງເກັງຄັນໜຶ່ງ, ເຮັດໃຫ້ລົດເກັງແລ່ນໄປຊ້ວນເອົາທ້າຍລົດວີໂກ້ທີ່ຈອດຢູ່ຕໍ່ໜ້າຢ່າງແຮງຈົນຍົກຂຶ້ນຢອງຢູ່ເທິງລົດເກັງອີກຄັນຫນຶ່ງ ແລ້ວລົດວີໂກ ກໍ່ໄປຕຳເອົາລົດອີກຄັນໜຶ່ງອີກທີ່ຈອດຢູ່ທາງໜ້າ ເຊິ່ງລວມຈຳນວນລົດໃຫຍ່ທີ່ປະສົບອຸບັດຕິເຫດໃນຄັ້ງນີ້ມີ 5 ຄັນ, ແຕ່ຍັງໂຊກດີທີ່ບໍ່ມີຜູ້ໃດໄດ້ຮັບບາດເຈັບເຖິງຂັ້ນຮ້າຍແຮງ.
ຮອງຫົວຫນ້າພະແນກຕຳຫຼວດຈະລາຈອນ ນະຄອນຫຼວງວຽງຈັນ ໃຫ້ຮູ້ຕື່ມວ່າ: ສະເພາະໃນເດືອນ ມັງກອນ 2019 ຢູ່ນະຄອນຫຼວງວຽງຈັນ ເກີດອຸບັດຕິເຫດທັງໝົດ 147 ຄັ້ງ, ເຮັດໃຫ້ມີລົດເປເພເລັກນ້ອຍ 104 ຄັນ, ເປເພສົມຄວນ 170 ຄັນ, ໃຊ້ການບໍ່ໄດ້ 4 ຄັນ, ມີຜູ້ໄດ້ຮັບບາດເຈັບເລັກນ້ອຍ 62 ຄົນ, ບາດເຈັບສົມຄວນ 106 ຄົນ, ບາດເຈັບສາຫັດ 33 ຄົນ ແລະ ມີຜູ້ເສຍຊີວິດເຖິງ 19 ຄົນ. ສາເຫດຂອງອຸບັດຕິເຫດທີ່ເກີດຂຶ້ນສ່ວນໃຫຍ່ກໍຍ້ອນບັນຫາເກົ່າໆ ເຊັ່ນ: ຂັບຂີ່ລົດໄວ, ດື່ມສິ່ງມືນເມົາແລ້ວຂັບລົດ, ລ້ຽວລົດບໍ່ລະມັດລະວັງ ແລະ ອື່ນໆ. ສະເລ່ຍແລ້ວອາຍຸຂອງຜູ້ຂັບຂີ່ທີ່ມັກປະສົບອຸບັດຕິເຫດຫຼາຍກ່ວາໝູ່ໃນລະຫວ່າງ 16 ຫາ 30 ປີ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: Lao National Radio