ການກໍ່ສ້າງເສັ້ນທາງໃນ ນະຄອນຫຼວງວຽງຈັນ ສະເພາະ ປີ 2019 ຈະໂຈະການກໍ່ສ້າງຊົ່ວຄາວຈໍານວນ 5 ເສັ້ນທາງຄື: ແຕ່ສາມແຍກດອນນົດຂຸ້ມ-ສ້າງເຫວີຍ-ຈອມເພັດ ແລະ ສວນມອນ-ສ້າງເຫວີຍ-ດົງສະຫວາດ; ເສັ້ນທາງກິໂລແມັດ 22-ບ້ານຫົວຊຽງ-ທາງ 450 ປີ; ໜອງໜ້ຽວ-ບ້ານຈັດສັນ-ໜອງແຕ່ງ; T5 (ໄລຍະ 1 ແລະ 2); ເພຍລາດ-ເຕົາໄຫ-ຊາຍແດນແຂວງ ວຽງຈັນ ທີ່ເລີ່ມການກໍ່ສ້າງມາແຕ່ປີ 2011 ລວມມູນຄ່າ 924 ຕື້ກວ່າກີບ, ມີຄວາມຍາວທັງໝົດ 62,4 ກິໂລແມັດ ເນື່ອງຈາກບໍລິສັດມີບັນຫາທາງດ້ານການເງິນ ແລະ ການໄກ່ເກ່ຍກັບສິ່ງກີດຂວາງບໍ່ລົງຮອຍ-ບໍ່ສາມາດຕົກລົງກັນໄດ້.

ຂະແໜງຂົວທາງ, ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ລາຍງານໃນວັນທີ 31 ມັງກອນ 2019 ຜ່ານມາວ່າ: ບັນດາໂຄງການລົງທຶນກ່ອນທີ່ໄດ້ມີການຢຸດຈັດຕັ້ງປະຕິບັດຊົ່ວຄາວໃນນະຄອນຫຼວງວຽງຈັນ ໃນປີ 2019 ລວມມູນຄ່າ 924 ຕື້ກວ່າກີບ, ມີຄວາມຍາວທັງໝົດ 62,ຼ4 ກິໂລແມັດ ເຊິ່ງປະກອບມີຄື:

• ເສັ້ນທາງ ແຕ່ສາມແຍກດອນນົດຂຸ້ມ-ສ້າງເຫວີຍ-ຈອມເພັດ ປູເປຕົງຄວາມຍາວ 4,8 ກິໂລແມັດ, ຄ່າລົງທຶນ 88,9 ຕື້ກວ່າກີບ.
• ເສັ້ນທາງ ສວນມອນ-ສ້າງເຫວີຍ-ດົງສະຫວາດ ປູເປຕົງຍາວ 2,9 ກີໂລແມັດ, ມູນຄ່າ 56 ຕື້ກວ່າກີບ ທີ່ເລີ່ມກໍ່ສ້າງມາແຕ່ປີ 2011 ສໍາເລັດແລ້ວ 62%.
• ເສັ້ນທາງ ກິໂລແມັດ 22-ບ້ານຫົວຊຽງ-ທາງ 450 ປີ ປູດ້ວຍເປຕົງຍາວ 19 ກິໂລແມັດ, ມູນຄ່າ 524 ຕື້ກວ່າກີບ ສ້າງມາແຕ່ທ້າຍປີ 2012 ສໍາເລັດ 56%.
• ເສັ້ນທາງ ໜອງໜ້ຽວ-ບ້ານຈັດສັນ-ໜອງແຕ່ງ ປູຍາງ 2 ຊັ້ນຍາວ 7,7 ກິໂລແມັດ, ມູນຄ່າ 33 ຕື້ກວ່າກີບ ສ້າງແຕ່ປີ 2012 ສໍາເລັດ 33%.
• ເສັ້ນທາງT5 (ໄລຍະ 1) ປູເປຕົງຍາວ 3 ກິໂລແມັດ, ມູນຄ່າ 66 ຕື້ກວ່າກີບ ສ້າງແຕ່ປີ 2011 ສໍາເລັດ 25%.
• ເສັ້ນທາງ T5 ( ໄລຍະທີ 2) ປູເປຕົງຍາວ 2,2 ກິໂລແມັດ, ມູນຄ່າ 48,6 ຕື້ກີບ ສ້າງແຕ່ປີ 2011 ສໍາເລັດພຽງ 8%.
• ເສັ້ນທາງ ເພຍລາດ-ເຕົາໄຫ-ຊາຍແດນແຂວງ ວຽງຈັນ ປູເບຕົງມີຄວາມຍາວຫຼາຍກວ່າໝູ່ 22,7 ກິໂລແມັດ, ມູນຄ່າ 105 ຕື້ກວ່າກີບ ສ້າງແຕ່ປີ 2012 ສໍາເລັດແລ້ວ 52%.

ປັດຈຸບັນ, ໂຄງການຢຸດເຊົາກໍ່ສ້າງຊົ່ວຄາວ ເນື່ອງຈາກບໍລິສັດມີບັນຫາທາງດ້ານການເງິນ (ທະນາຄານບໍ່ປ່ອຍເງິນກູ້ຢືມ) ແລະ ການໄກ່ເກ່ຍກັບສິ່ງກີດຂວາງບໍ່ລົງຮອຍ-ບໍ່ສາມາດຕົກລົງກັນໄດ້, ບາງເສັ້ນທາງໃຊ້ເວລາ 2 ປີຍັງໄກ່ເກ່ຍບໍ່ສໍາເລັດ.

ສະເພາະເສັ້ນທາງແຕ່ວົງວຽນຈີ່ນາຍໂມ້-ບໍ່ໂອ-ເມືອງຫາດຊາຍຟອງ ທີ່ຢຸດກໍ່ສ້າງຊົ່ວຄາວມາແຕ່ກາງປີ 2017 ຫຼ້າສຸດໄດ້ກັບມາເຈລະຈາກັບຫົວໜ້າຄຸມຄອງໂຄງການ ແລະ ເຫັນດີຈະສືບຕໍ່ກໍ່ສ້າງທັນທີ ເພາະເສັ້ນທາງດັ່ງກ່າວ, ໜ້າວຽກສ່ວນໃຫຍ່ສໍາເລັດແລ້ວ ເຊັ່ນ: ວຽກຮ່ອງລະບາຍນໍ້າ, ປູທາງໄດ້ເຄິ່ງໜຶ່ງ ຄາດວ່າພາຍໃນປີ 2019 ປະຊາຊົນທີ່ອາໄສຢູ່ລຽບແຄມຂອງນັບແຕ່ຈີ່ນາຍໂມ້ລົງໄປເຖິງບ້ານຊາຍຟອງ ມີປະມານ 10 ກວ່າບ້ານຈະໄປ-ມາສະດວກສົມກັບການລໍຄອຍ.

ຮຽບຮຽງໂດຍ: ໃບບົວ ຈັນທະລັງສີ

ແຫຼ່ງຂໍ້ມູນຈາກ: ໜັງສືພິມເສດຖະກິດ-ສັງຄົມ

ຮູບພາບຈາກ: vientianemai.ne