ເກືອບ 1 ເດືອນເຕັມ ໄທປະສົບບັນຫາຝຸ່ນລະອອງໜັກ PM 2.5 ຈົນກ້າວເຂົ້າເຖິງຂັ້ນມີມົນລະພິດທີ່ຮ້າຍແຮງທົ່ວບາງກອກ (ກຸງເທບມະຫານະຄອນ, ປະເທດໄທ) ແລະ 5 ແຂວງອ້ອມຂ້າງ ຫຼາຍໜ່ວຍງານທີ່ກ່ຽວຂ້ອງພວມເລັ່ງມືຫາທາງແກ້ໄຂບັນຫາ ແລະ ອອກມາດຕະການແກ້ໄຂສະເພາະກິດ ດ້ວຍການແນະນໍາໃຫ້ປະຊາຊົນໃຊ້ຜ້າອັດປາກທີ່ຢັບຢັ້ງຝຸ່ນດັ່ງກ່າວ. ປັດຈຸບັນ, ລັດຖະບານໄດ້ສັ່ງປິດໂຮງຮຽນຊົ່ວຄາວ ທົ່ວບາງກອກ ແລະ ແຂວງທີ່ໄດ້ຮັບຜົນກະທົບໄປແລ້ວ 437 ແຫ່ງ.
ເວັບໄຊເດລີນິວ ຂອງໄທ ໄດ້ເຜີຍຂ່າວໃນເວລາ 16: 08 ໂມງ ຂອງວັນທີ 31 ມັງກອນ 2019 ຈາກກະຊວງຊັບພະຍາກອນແຫ່ງຊາດ ແລະ ສິ່ງແວດລ້ອມ ລາຍງານສະຖານະການຝຸ່ນລະອອງຂະໜາດ PM 2.5 ໃນເຂດດັ່ງກ່າວ, ມີຄ່າປະລິມານຢູ່ທີ 61-93 ໄມໂຄຣກຣາມ/ແມັດກ້ອນ ຄວບຄຸມສະພາບອາກາດຢູ່ໃນລະດັບເລີ່ມມີຜົນກະທົບຕໍ່ສຸຂະພາບ. ລ່າສຸດປະລິມານຝຸ່ນດັ່ງກ່າວ, ເພີ່ມຂຶ້ນສູງເຖິງ 214ມຄກ/ລບ.ມ ເທົ່າທຽມກັບພື້ນສີແດງ ໂດຍອ້າງແຫຼ່ງຂ່າວມາຈາກຜູ້ໃຊ້ເຟດບຸກຊື່ SquidMan.ExE ໄດ້ທົດລອງວັດມວນອາກາດຢູ່ເທິງລົດຂົນສົ່ງສາຍໃຕ້ຄັນໜຶ່ງ ພ້ອມທັງເຜີຍແຜ່ຮູບພາບ ແລະ ວິດີໂອໃນຂະນະທີ່ໃຊ້ເຄື່ອງວັດຄ່າຝຸ່ນລະອອງ PM 2.5 ພົບວ່າຢູ່ໃນລົດໂດຍສານຄັນດັ່ງກ່າວ ມີຄ່າຝຸ່ນລະອອງມີຄ່າສູງຂຶ້ນເຖິງ 214ໄມໂຄຣກຣາມ/ແມັດກ້ອນ ເທົ່າທຽມກັບພື້ນສີແດງ.
https://www.facebook.com/SquidManExE/videos/291696378160304/
ຕາມຂ່າວຂອງ ເວັບໄຊມະຕິຊົນ ຂອງໄທ ຕອນບ່າຍວັນທີ 31 ມັງກອນ 2019 ລາຍງານວ່າ ທີ່ທໍານຽບລັດຖະບານ ນາຍົກລັດຖະມົນຕີໄທ ແລະ ຄະນະຮັກສາຄວາມສະຫງົບແຫ່ງຊາດໄທ ກ່າວກ່ຽວກັບບັນຫາວິກິດຝຸ່ນລະອອງດັ່ງກ່າວ ວ່າ: “ຕ້ອງເລັ່ງດໍາເນີນການເພາະເປັນເລື່ອງການເຜົາຂີ້ເຫຍື້ອ ສ່ວນທີ່ໜັກທີ່ສຸດຄືຍານພາຫະນະເກືອບທັງໝົດ ແລະ ໄດ້ແກ້ໄຂບັນຫາກວດລົດມື້ລະ 8-9 ພັນຄັນ ໂດຍຕິດສະຕິກເກີໄວ້ວ່າຄັນໃດຫ້າມແລ່ນ ແລະ ໄດ້ຕັ້ງດ່ານກວດລົດເຂົ້າໃນເມືອງ 6 ຈຸດອ້ອມຮອບບາງກອກ ເພື່ອກວດສອບລົດທີ່ມີຄັວນພິດ”.
ດ້ານ ລັດຖະມົນຕີກະຊວງສຶກສາທິການ ໄດ້ສັ່ງປີດໂຮງຮຽນໃນຂົງເຂດທີ່ໄດ້ຮັບຜົນກະທົບຈາກຝຸ່ນລະອອງ PM 25 ຊົ່ວຄາວເປັນເວລາ 2 ວັນຄືແຕ່ວັນທີ 31 ມັງກອນ-1 ກຸມພາ 2019, ຖ້າເຂດໃດໄດ້ຮັບປະລິມານຝຸ່ນລະອອງໜ້ອຍລົງ ໃນວັນທີ 4 ກຸມພາ ກໍອາດຈະເປີດການຮຽນປົກກະຕິ ແຕ່ຖ້າພື້ນທີ່ໃດຍັງມີຄວາມສ່ຽງສູງອາດຈະປິດໂຮງຮຽນຕໍ່ໄປ. ການປິດໂຮງຮຽນບໍ່ແມ່ນການແກ້ໄຂບັນຫາ ແຕ່ເປັນການປົກປ້ອງສຸຂະພາບຂອງເດັກນ້ອຍເນື່ອງຈາກເດັກນ້ອຍມີຄວາມສ່ຽງສູງທີ່ຈະຮັບເອົາມົນລະພິດເຂົ້າສູ່ຮ່າງກາຍໄດ້ໄວກວ່າຜູ້ໃຫຍ່ ແລະ ຕໍ່ກັບການຕັດສິນໃຈດັ່ງກ່າວແມ່ນໄດ້ຮັບການເຫັນດີຈາກຜູ້ປົກຄອງເປັນຢ່າງດີ.
ຈາກການກວດ ແນ່ນອນວ່າເກີດມາຈາກການຊົມໃຊ້ລົດຍານພາຫະນະ ແລະ ສ່ວນໜຶ່ງກໍເກີດມາຈາກໂຮງງານຜະລິດໄຟຟ້າ, ອາຍຄວັນຈາກລົດລາງພາຫະນະທີ່ແລ່ນຕາມຕົວເມືອງ, ການຈູດປ່າຊະຊະຊາຍ ແລະ ການຈູດຂີ້ເຫຍື້ອທີ່ເປັນຜິດ ແລະ ອື່ນໆ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມນຈາກ: matichon.co.th, dailynews.co.th, thairath.co.th