ການກໍານົດອັດຕາປັບໃໝ ແລະ ມາດຕາຕ່າງໆ ຕໍ່ຜູ້ລະເມີດລະບຽບກົດໝາຍກ່ຽວກັບການຈະລາຈອນທາງບົກ, ການຂົນສົ່ງທາງບົກ ແລະ ການປົກປັກຮັກສາທາງຫຼວງ ເພື່ອເປັນບ່ອນອີງໃຫ້ແກ່ເຈົ້າໜ້າທີ່ຄວບຄຸມການຈະລາຈອນໃນການປັປໃໝ ແລະ ການປະຕິບັດມາດຕະການຕ່າງໆ ຕໍ່ຜູ້ລະເມີດກົດໝາຍດັ່ງກ່າວຢ່າງເໝາະສົມ ແລະ ເຂັ້ມງວດ ທັງແນ່ໃສ່ຜູ້ຂັບຂີ່ລົດທຸກປະເພດ ກໍຄືຜູ້ໃຊ້ຖະໜົນໃຫ້ມີສະຕິຕື່ນຕົວລະບຽບກົດໝາຍ ເຮັດໃຫ້ການຈະລາຈອນທາງບົກມີຄວາມເປັນລະບຽບຮຽບຮ້ອຍ, ມີຄວາມສະດວກ, ປອດໄພ ແລະ ເປັນເອກະພາບກັນທົ່ວປະເທດ ພ້ອມນັ້ນ, ກໍເພື່ອເປັນການປົກປັກຮັກສາຊັບສິນສ່ວນລວມຂອງຊາດ ກໍຄືຂອງປະຊາຊົນບັນດາເຜົ່າ.
ອີງຕາມລໍາລັດວ່າດ້ວຍການປັປໃໝ ແລະ ມາດຕະການຕ່າງໆຜູ້ລະເມີດລະບຽບກົດໝາຍກ່ຽວກັານການຈະລາຈອນທາງບົກ, ການຂົນສົ່ງທາງບົກ ແລະ ການປົກປັກຮັກສາທາງຫຼວງ ເລກທີ 188/ນຍ, ມາດຕາທີ 3 ວ່າດ້ວຍການຂັບຂີ່ລົດໂດຍຜູ້ທີ່ບໍ່ເຖິງອາຍຸກະສຽນຂັບຂີ່: ຫ້າມຜູ້ມີອາຍຸຕໍ່ກວ່າ 15 ປີ ຂັບຂີ່ລົດຈັກຕາມເສັ້ນທາງຫຼວງ, ເສັ້ນທາງເທດສະບານແຂວງ-ເມືອງ ຜູ້ປົກຄອງຂອງເດັກທີ່ລະເມີດຈະຖືກປັບໃໝ 30.000 ກີບ; ອາຍຸຕໍ່ກວ່າ 18 ປີ ຂັບລົດສາມລໍ້, ລົດໄຖນາເດີນຕາມ, ລົດຕ໋ອກໆ ຫຼື ລົດສີ່ລໍ້ຂຶ້ນໄປ ຖືກປັບໃໝ 50.000 ກີບ; ອາຍຸຕໍ່ກວ່າ 25 ປີ ຂັບຂີ່ລົດໂດຍສານ ຫຼື ລົດບັນທຸກໆປະເພດ ປັບໃໝ 100.000 ແລະ 200.000 ກີບ.
ມາດຕາທີ 4 ການຂັບຂີ່ລົດຈັກໂດຍບໍ່ໃສ່ໝວກກັນກະທົບ: ຜູ້ຂັບຂີ່ລົດຈັກ ແລະ ຜູ້ຊ້ອນທ້າຍລົດຈັກ ຫາກບໍ່ໃສ່ໝວກກັນກະທົບໃນເວລາຂັບຂີ່ ຫຼື ຊ້ອນທ້າຍຈະຖືກປັບໃໝ 30.000 ກີບ/ຄົນ/ຄັ້ງ. ມາດຕາທີ 5 ການຂັບຂີ່ລົດໃນເວລາມືນເມົາ: ຜູ້ຂັບຂີ່ຜູ້ໃດທີ່ມີທາດມືນເມົາ ຫຼື ທາດເຫຼົ້າຢູ່ໃນຮ່າງກາຍເກີນ 0.80 ກຣາມ/ລິດ (g/|BrAC=80mg/100ml) ຖ້າຂັບຂີ່ຈະຖືກປັບໃໝຕາມປະເພດລົດຄື: ລົດຖີບ 10.000 ກີບ; ລົດຈັກ, ລົດ 3 ລໍ້ຕິດເຄື່ອງຈັກ ແລະ ລົດໄຖນາເດີນຕາມ 50.000 ກີບ; ລົດເບົາ (ເກ໋ງ, ກະບະ, ຈິບ, ຕູ້) 100.000 ກີບ; ລົດໂດຍສານ 4 ລໍ້ 250.000 ກີບ; ລົດບັນທຸກ 6 ລໍ້ຂຶ້ນໄປ 500.000 ກີບ ແລະ ລົດເມໂດຍສານ 1.000.000 ກີບ. ໃນກໍລະນີຜູ້ຂັບມີອາການເມົາແຮງຈົນບໍ່ສາມາດຄວບຄຸມສະຕິໄດ້ ເຈົ້າໜ້າທີ່ຈະກັກຕົວຜູ້ຂັບຂີ່ ພ້ອມກັບລົດໄວ້ກ່ອນ ຈົນກວ່າຈະຊ່ວງເມົາແລ້ວຈຶ່ງປ່ອຍໄປ.
ມາດຕາ 6 ການຂັບຂີ່ລົດບໍ່ຖືກທິດທາງການຈະລາຈອນ: ຖ້າຜູ້ຂັບຂີ່ລົດບໍ່ຖືກກັບທິດທາງການຈະລາຈອນ ຫຼື ບໍ່ຖືກຕາມຊ່ອງຈະລາຈອນທີ່ອະນຸຍາດ ຈະຖືກປັບໃໝຄື: ລົດຖີບ 10.000 ກີບ; ລົດຈັກ, ລົດ 3 ລໍ້ຕິດເຄື່ອງຈັກ ແລະ ລົດໄຖນາເດີນຕາມ 30.000 ກີບ; ລົດເບົາ (ເກ໋ງ, ກະບະ, ຈິບ, ຕູ້) 40.000 ກີບ; ລົດໂດຍສານ 4 ລໍ້ 50.000 ກີບ; ລົດບັນທຸກ 6 ລໍ້ຂຶ້ນໄປ 70.000 ກີບ; ລົດບັນທຸ 10ລໍ້ຂຶ້ນໄປ ແລະ ລົດເມໂດຍສານ 100.000 ກີບ. ມາດຕາທີ 7 ການຂັບຂີ່ລົດໄວເກີນກໍານົດ: ຖ້າຜູ້ຂັບຂີ່ລົດ ຂີ່ລົດໄວເກີນກໍານົດທີ່ທາງການກໍານົດໄວ້ ຈະຖືກປັບໃໝຄື: ລົດຈັກ, ລົດ 3 ລໍ້ຕິດເຄື່ອງຈັກ 30.000 ກີບ; ລົດເບົາ (ເກ໋ງ, ກະບະ, ຈິບ, ຕູ້) 50.000 ກີບ; ລົດໂດຍສານ 4 ລໍ້ 50.000 ກີບ; ລົດບັນທຸກ 6 ລໍ້ຂຶ້ນໄປ 50.000 ກີບ ແລະ ລົດເມໂດຍສານ 50.000 ກີບ.
ທ່ານສາມາດຕິດຕາມມາດຕາອື່ນໆ ກ່ຽວກັບການກໍານົດອັດຕາປັບໃໝ ແລະ ມາດຕະການຕ່າງໆ ຕໍ່ຜູ້ລະເມີດລະບຽບກົດໝາຍກ່ຽວກັານການຈະລາຈອນທາງບົກ, ການຂົນສົ່ງທາງບົກ ແລະ ການປົກປັກຮັກສາທາງຫຼວງ ໃນມື້ຕໍ່ໄປໄດ້ທີ່ https://laopost.com/.
- ຄ່າປັບໃໝຜູ້ຂັບຂີ່ລົດອາຍຸບໍ່ຮອດ, ບໍ່ໃສ່ໝວກກັນກະທົບ, ເມົາແລ້ວຂັບ ແລະ ຂັບລົດໄວເກີນກໍານົດເສຍເທົ່າໃດ?
- ຂີ່ລົດແຂ່ງກັນ-ລ່ວງໄຟແດງ, ຮຽງກັນເປັນໜ້າກະດານ ແລະ ບໍ່ເຄົາລົບສິດຂອງຜູ້ອື່ນຈະຖືກເສຍຄ່າປັບເທົ່າໃດ?
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ສໍານັກງານນາຍົກລັດຖະມົນຕີ