ເມື່ອວັນຈັນທີ 28 ມັງກອນ 2018 ທ່ານ ແມດທິວ ວິດເທເກີ ຜູ້ຮັກສາການ, ລັດຖະມົນຕີກະຊວງຍຸດຕິທຳສະຫະລັດ ໄດ້ຟ້ອງດຳເນີນຄະດີທາງອາຍາກັບບໍລິສັດ Huawei ແລະ ນາງ ເມິ່ງ ຫວ່ານໂຈ (CFO) ຂອງບໍລິສັດ Huawei ເຖິງ 23 ຂໍ້ຫາ ໃນນີ້ແຍກເປັນການຍື່ນຟ້ອງບໍລິສັດ Huawei 13 ຂໍ້ຫາ, ໃນຂໍ້ຫາເຈດຕະນາສໍ້ໂກງເງິນຜ່ານຊ່ອງທາງເອເລັກໂຕຣນິກ, ສໍ້ໂກງເງິນຈາກສະຖາບັນການເງິນ, ຊີ້ນຳສະຖາບັນການເງິນໃນສະຫະລັດ ແລະ ຕ່າງປະເທດ ເຊິ່ງມີສຳນັກງານໃນສະຫະລັດ ໃຫ້ເຂົ້າໃຈຜິດກ່ຽວກັບສະຖານະຂອງບໍລິສັດໃນເຄືອຂ່າຍຂອງ Huawei 2 ແຫ່ງ ຄື: ບໍລິສັດ ຫົວເວີ່ຍ ດີໄວຊ໌ ຍູເອສເອ ໃນນະຄອນເສິ່ນເຈິ້ນ ແລະ ບໍລິສັດສະກາຍຄອມທີ່ເຮັດຜິດກົດໝາຍໃນການຂາຍສິນຄ້າໃຫ້ກັບອິຣານ.
ນອກຈາກນີ້ຍັງກ່າວຫາວ່າ ບໍລິສັດ Huawei ເລີ່ມພະຍາຍາມລັກຂໍ້ມູນທາງໄອທີທີ່ກ່ຽວຂ້ອງກັບຫຸ່ນຍົນສັດຕົວໜຶ່ງ ຂອງບໍລິສັດ T-Mobile ສັນຊາດເຢຍລະມັນເຊິ່ງມີສຳນັກງານໃນສະຫະລັດທີ່ໃຊ້ໃນການທົດສອບໂທລະສັບມືຖືໃນປີ 2011 ເພື່ອພະຍາຍາມສ້າງຫຸ່ນຍົນຂອງຕົນເອງຂຶ້ນ.
ການຕັ້ງຂໍ້ຫາຂອງລັດຖະບານສະຫະລັດມີຂຶ້ນບໍ່ພໍເທົ່າໃດມື້ຫຼັງຈາກການາດາໄດ້ປົດເອກອັກຄະລັດຖະທູດການາດາປະຈຳປະເທດຈີນອອກຈາກຕຳແໜ່ງ ເນື່ອງຈາກເຂົາກ່າວຄຳຮ້ອງຂໍໃຫ້ມີການສົ່ງຕົວນາງ ເມິ່ງ ໃນຖານະຜູ້ຮ້າຍຂ້າມແດນຂອງສະຫະລັດເຕັມໄປດ້ວຍຂໍ້ບົກຜ່ອງ.
ໂດຍບໍລິສັດ Huawei ໄດ້ປະຕິເສດວ່າ ບໍລິສັດສາຂາ ຫຼື ບໍລິສັດໃນເຄືອຂ່າຍຂອງ Huawei ບໍ່ເຄີຍລະເມີດກົດໝາຍຂອງສະຫະລັດ ຕາມຂໍ້ກ່າວຫາ ລວມເຖິງ ນາງ ເມິ່ງ ຫວ່ານໂຈ ກໍ່ບໍ່ໄດ້ກະທຳຄວາມຜິດຕາມຂໍ້ກ່າວຫາຂອງກະຊວງຍຸດຕິທຳສະຫະລັດທຸກປະການ.
ໃນຂະນະທີ່ໂຄສົກກະຊວງອຸດສາຫະກຳ ແລະ ຂໍ້ມູນເຕັກໂນໂລຢີຂອງຈີນ ໄດ້ອອກມາປະນາມລັດຖະບານສະຫະລັດ ທີ່ຍື່ນຟ້ອງບໍລິສັດ Huawei ແລະ ນາງ ເມິ່ງ ໂດຍລະບຸວ່າ ທາງລັດຖະບານສະຫະລັດ ໄດ້ໃຊ້ອຳນາດລັດໂຈມຕີບໍລິສັດ Huawei ໂດຍບໍ່ມີຫຼັກຖານ ເຊິ່ງເປັນການກະທຳທີ່ບໍ່ມີຄວາມຍຸດຕິທຳ ແລະ ຜິດສິນທຳ.
ລິ້ງຂ່າວທີ່ກ່ຽວກັບຫົວເວີ່ຍ:
ທູດການາດາປະຈຳ ສປ.ຈີນ ຍອມຮັບທາຍາດ HUAWEI ມີໂອກາດລອດ
ຂີດເສັ້ນຕາຍ 30 ມັງກອນນີ້! ລູກສາວຫົວເວີ່ຍຈະໄດ້ຮັບໂອກາດຮັບອິດສະຫຼະພາບ ຫຼື ບໍ່?
ຫົວເວີ່ຍທ້າສະຫະລັດສະແດງຫຼັກຖານຖ້າຫາກ “ລະບົບຫົວເວີ່ຍມີຄວາມສ່ຽງດ້ານຄວາມໝັ້ນຄົງ”
ສະຫະລັດບອກ! ພົບຫຼັກຖານລູກສາວປະທານຫົວເວີ່ຍຕັ້ງໃຈລະເມີດມາດຕະການຄວໍ້າບາດອີຣານ
ທຣໍ້າອາດຊ່ວຍລູກສາວປະທານຫົວເວີ່ຍຫາກເປັນການຮັກສາຜົນປະໂຫຍດດ້ານການຄ້າກັບຈີນ
ລູກສາວປະທານ “ຫົວເວີ່ຍ” ໄດ້ຮັບການປະກັນຕົວ
ຈີນຂໍໃຫ້ສະຫະລັດ ແລະ ການາດາປ່ອຍຕົວ CFO ຫົວເວີ່ຍ!
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: matichon, thairath