ສຳນັກຂ່າວຕ່າງປະເທດລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນທີ 29 ມັງກອນ 2019 ວ່າ ເມື່ອເດືອນກັນຍາ 2018 ທີ່ຜ່ານມາ ທ້າວ ຫຍາງ ຊານຫຍຸນ ຂັບລົດແລນໂລເວີ ຕຳຄົນຍ່າງຕາມຖະໜົນແບບບໍ່ເລືອກໜ້າ ທີ່ບໍລິເວນເດີ່ນຈອດລົດໃຈກາງເມືອງ ເຫິງຍາງ ທາງຕະເວັນອອກສຽງໃຕ້ ກ່ອນຈະນຳເອົາມີດສັ້ນໄປໄລ່ທຳຮ້າຍຄົນໃນບໍລິເວນນັ້ນອີກ ເຊິ່ງເຫດການຄັ້ງນັ້ນມີຜູ້ເສຍຊີວິດ 15 ຄົນ ແລະ ບາດເຈັບອີກ 43 ຄົນ.
ຫຼັງເກີດເຫດຕຳຫຼວດເມືອງ ເຫິງຕົງ ໄດ້ກ່າວວ່າ ທ້າວ ຫຍາງ “ເປັນຄົນອາຄາດແຄ້ນ ແລະ ເຮັດຜິດຊໍ້າ” ເຄີຍກໍ່ຄະດີອາຍາໃນຂໍ້ຫາຢາເສບຕິດ, ລັກຊັບ ແລະ ທຳຮ້າຍຮ່າງກາຍຜູ້ອື່ນມາກ່ອນ.
ໂຄສົກສານອຸທອນປະຊາຊົນເຫິງຫຍາງ ຖະແຫຼງການເມື່ອວັນທີ 29 ມັງກອນ 2019ວ່າ ທາງສານໄດ້ຕັດສິນໂທດປະຫານຊີວິດ ທ້າວ ຫຍາງ ຊານຫຍຸນແລ້ວ ຈາກຄວາມຜິດໂທດຖານຂ້າຜູ້ອື່ນໂດຍເຈດຕະນາ ແລະ ທຳຮ້າຍຄວາມໝັ້ນຄົງສາທາລະນະດ້ວຍວິທິການອັນຕະລາຍ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews