ເດລີ່ເມລ ໄດ້ເຜີຍວ່າ ເສື້ອຜ້າ ແລະ ແຟຊັນໃໝ່ລ່າສຸດຂອງສູນວິໄຈເສື້ອຜ້າໃນ ກະຊວງອາຫານ ແລະ ສິ່ງຂອງຈໍາເປັນໃນຊີວິດປະຈໍາວັນ ເກົາຫຼີເໜືອ ພາຍໃຕ້ການບໍລິຫານຂອງ ຄິມ ຈອງ ອຶນ ຜູ້ນໍາສູງສຸດແຫ່ງເກົາຫຼີເໜືອ ໂດຍເປັນເສື້ອຜ້າທີ່ສາມາດກິນໄດ້ ເພື່ອແກ້ໄຂບັນຫາ ສະພາບແວດລ້ອມທີ່ຮ້າຍແຮງ, ໃນຄໍລໍ້າເສື້ອຜ້າ ແລະ ແຟຊັນ ຂອງວັນທີ 29 ມັງກອນ 2019.
ຈາກແຄັດຕາລັອກສີສັນສົດໃສທີ່ຫາກໍເຜີຍແຜ່ຈາກສູນວິໄຈເສື້ອຜ້າ ປະກອບດ້ວຍພາບນາຍແບບ-ນາງແບບໃນຊຸດທັນສະໄໝ ສໍາລັບນຸ່ງໃນຊີວິດປະຈໍາວັນ ແລະ ກິດຈະກໍາອື່ນໆ ເຊັ່ນ: ຂີ່ເຮືອ, ຂຶ້ນພູເຂົາ. ຂະນະທີ່ເສື້ອຄຸມເປັນປະເພດເສື້ອທີ່ສາມາດກິນໄດ້ ໂດຍມີຂໍ້ຄວາມອະທິບາຍວ່າ: “ເສື້ອຜ້າເຮັດມາຈາກສໍາລີທຽມ ເຊິ່ງປະກອບດ້ວຍແຮ່ທາດສໍາຄັນ ແລະ ສານອາຫານທີ່ຈໍາເປັນ ເຊັ່ນ: ໂປຣຕິນ, ນໍ້າໝາກໄມ້, ແມກນິຊຽມ, ທາດເຫຼັກ ແລະ ແຄລຊຽມ ເພື່ອຫຼີກລ້ຽງຄວາມອຶກຢາກໄດ້”. ນອກຈາກນີ້, ຍັງມີເສື້ອຜ້າກັບເຕັກໂນໂລຢີລໍ້າສະໄໝຂອງແຂນເສື້ອອັດສະລິຍະທີ່ສາມາດກວດສອບສຸຂະພາບຂອງຜູ້ທີ່ນຸ່ງໄດ້ອີກ.
ດ້ານອາເລັກ ຊິກລີ ເຈົ້າຂອງທຸລະກິດນໍາທ່ຽວເກົາຫຼີເໜືອ ກ່າວວ່າ: “ກະເປົາຜູ້ຊາຍກໍາລັງເປັນທີ່ນິຍົມໃນນະຄອນຫຼວງ ປຽງຢາງ, ສ່ວນແຟຊັນຂອງຜູ້ຍິງ ຈະຍ້ອນຍຸກໜ້ອຍໜຶ່ງ ຄ້າຍກັບເສື້ອຂອງຜູ້ຍິງຊາວຈີນໃນສະໄໝ 90 ແຕ່ເມື່ອປຽບທຽບກັບແນວເສື້ອຜ້າຜູ້ຍິງເກົາຫຼີເໜືອທີ່ນຸ່ງໃນປັດຈຸບັນກໍຖືວ່າທັນສະໄໝຫຼາຍ”.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: khaosod.co.th