ເຈົ້າໜ້າທີ່ປ່າໄມ້, ກົມກວດກາປ່າໄມ້ ຈັບຕົວຜູ້ລັກລອບຕັດໄມ້ຍາງ ຢູ່ເຂດສໍາປະທານຂອງບໍລິສັດ ໂອເຊໂນ (ສວນລ້ານຊ້າງ) ບ້ານ ດົງສ້າງຫີນ ເມືອງ ໄຊທານີ ນະຄອນຫຼວງວຽງຈັນ ຈໍານວນ 1 ຄົນ ພ້ອມດ້ວຍຂອງກາງໃນລະຫ່ວາງວັນທີ 11-14 ມັງກອນ 2019. ປະຈຸບັນ, ຢູ່ໃນຂັ້ນຕອນການສືບສວນ-ສອບສວນ ແລະ ເຮັດໜັງສືໝາຍຮຽກອີກ 3 ຄົນທີ່ມີສ່ວນຮ່ວມເຂົ້າມາໃຫ້ການຕໍ່ເຈົ້າໜ້າທີ່ຕາມກໍານົດເວລາເພື່ອດໍາເນີນຄະດີ.
ກົມກວດກາປ່າໄມ້, ກະຊວງກະສິກໍາ ແລະ ປ່າໄມ້ ໃຫ້ຮູ້ວ່າ: ໃນລະຫ່ວາງວັນທີ 11-14 ມັງກອນ 2019, ທີມງານເຈົ້າໜ້າທີ່ປ່າໄມ້ໄດ້ລົງກວດກາການລັກລອບຕັດໄມ້ຢູ່ຕາມຈຸດເປົ້າໝາຍໃນນະຄອນຫຼວງວຽງຈັນ ແລະ ເຂດເຊື່ອມຕໍ່ນະຄອນຫຼວງວຽງຈັນ. ຜ່ານການລົງກວດກາຕົວຈິງເຈົ້າໜ້າທີ່ກົມກວດກາປ່າໄມ້ໄດ້ຮັບແຫຼ່ງຂ່າວຈາກພົນລະເມືອງດີວ່າ ມີກຸ່ມຄົນບໍ່ດີເຂົ້າລັກລອບຂຸດຄົ້ນໄມ້ຍາງຢູ່ໃນເຂດສໍາປະທານຂອງສວນລ້ານຊ້າງ ບ້ານ ດົງສ້າງຫີນ ໜ້າສະໜາມກິລາແຫ່ງຊາດຫຼັກ 16 ເມືອງ ໄຊທານີ ນະຄອນຫຼວງວຽງຈັນ ແລະ ໄດ້ກັກຕົວຜູ້ກະທໍາຜິດຈໍານວນ 1 ຄົນ, ຊື່ ທ້າວ ວົງເດືອນ ອາຍຸ 45 ປີ ເປັນປະຊາຊົນ ບ້ານ ດອນຕິ້ວ ເມືອງ ໄຊທານີ, ພ້ອມດ້ວຍຂອງກາງເຄື່ອງປັ່ນໄຟ 1 ເຄື່ອງ, ຈັກຕັດໄມ້ໄຟຟ້າ 1 ເຄື່ອງ ແລະ ລົດໄຖນາ 1 ຄັນ.
ພາຍຫຼັງທີ່ຢຶດໄວ້ແລ້ວເຈົ້າໜ້າທີ່ກົມກວດກາປ່າໄມ້ ໄດ້ປະສານຫາກອງກວດກາປ່າໄມ້ປະຈໍານະຄອນຫຼວງ, ໜ່ວຍງານກວດກາປ່າໄມ້ເມືອງເຂົ້າມາເຮັດວຽກຮ່ວມກັບຄະນະທີມງານເຈົ້າໜ້າທີ່ກົມກວດກາປ່າໄມ້ ເພື່ອລົງກວດກາໄມ້ຕົວຈິງຢູ່ 2 ຈຸດ ໃນນັ້ນ, ຈຸດທີ 1 ໄມ້ຍາງຖືກຕັດ 1 ຕົ້ນ, ມີຈຳນວນ 7 ທ່ອນ, ບໍລິມາດ 9,15 ແມັດກ້ອນ ແລະ ຈຸດທີ 2 ກວດກາພົບເຫັນໄມ້ຍາງທ່ອນທີ່ຖືກຕັດລົ້ມໄວ້ກ່ອນແລ້ວມີຈຳນວນ 6 ທ່ອນ, ບໍລິມາດ 11,47 ແມັດກ້ອນ ແຕ່ບໍ່ພົບເຫັນຜູ້ກະທໍາຜິດ, ລວມໄມ້ຍາງທັງ 2 ຈຸດ ມີທັງໝົດ 13 ທ່ອນ, ບໍລິມາດ 20,62 ແມັດກ້ອນ; ຫຼັງຈາກເຈົ້າໜ້າທີ່ກວດກາປ່າໄມ້ໄດ້ຂຶ້ນບັນຊີສຳເລັດແລ້ວ ກໍ່ໄດ້ເຮັດບົດບັນທຶກຮ່ວມກັບອຳນວຍການ ບໍລິສັດໂອເຊໂນ ແລະ ອໍານາດການປົກຄອງບ້ານ ດົງສ້າງຫີນ, ທັງມອບໃຫ້ເຈົ້າຂອງບໍລິສັດຜູ້ສໍາປະທານເນື້ອທີ່ດິນເປັນຜູ້ປົກປັກຮັກສາໄວ້ບໍ່ໃຫ້ມີການເຄື່ອນຍ້າຍ ຫຼື ຕົກເຮ່ຍເສຍຫາຍ.
ສ່ວນຜູ້ກະທໍາຜິດໄດ້ກັກຕົວຝາກຂັງໄວ້ຢູ່ກອງບັນຊາການ ປກສ ເມືອງໄຊທານີ, ພ້ອມທັງຂະຫຍາຍຜົນເປົ້າໝາຍຜູ້ທີ່ມີສ່ວນຮ່ວມເຂົ້າໃນການລັກລອບຕັດໄມ້ຢູ່ໃນເຂດດັ່ງກ່າວມີຈຳນວນ 3 ຄົນຄື: ທ້າວ ກິໂລດ ອາຍຸ 30 ປີ ກໍາມະກອນຢູ່ບ້ານ ດົງໝາກຄາຍ, ທ້າວ ເວດ ອາຍຸ 33 ປີ ແລະ ທ້າວ ໝີ ອາຍຸ 30 ປີ ທັງສອງອາຊີບກໍາມະກອນຢູ່ບ້ານ ດອນຕີ້ວ, ພວກກ່ຽວມີສ່ວນຮ່ວມໃນການລັກລອບຕັດໄມ້ຢູ່ໃນເຂດດັ່ງກ່າວ. ປະຈຸບັນ, ເຈົ້າໜ້າທີ່ປ່າໄມ້ປະຈຳ ນະຄອນຫຼວງວຽງຈັນ ໄດ້ເຮັດໜັງສືໝາຍຮຽກຄັ້ງທີ 1 ໃຫ້ພວກກ່ຽວທັງ 3 ຄົນ ເຂົ້າມາໃຫ້ການຕໍ່ເຈົ້າໜ້າທີ່ປ່າໄມ້ຕາມກໍານົດເວລາເພື່ອສືບສວນ-ສອບສວນ ແລະ ດໍາເນີນຄະດີຕາມຂະບວນການຍຸຕິທໍາ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: ໜັງສືພິມເສດຖະກິດ-ສັງຄົມ