ພະແນກວິທະຍາສາດ ແລະ ເຕັກໂນໂລຊີ ແຂວງສະຫວັນນະເຂດ ລົງກວດສອບມາດຕະຖານບໍລິມາດຫົວຈ່າຍນໍ້າມັນເຊື້ອໄຟ ປະຈໍາປີ 2019 ທົ່ວແຂວງຄັ້ງທີ 1, ໂດຍເລີ່ມແຕ່ວັນທີ 7–23 ມັງກອນ 2019, ສາມາດກວດໄດ້ທັງໝົດ 225 ປໍ້າ, 975 ຫົວຈ່າຍ ແລະ ຍັງຈະສືບຕໍ່ດໍາເນີນການກວດສອບໃຫ້ຄົບທຸກປໍ້າ. ການລົງກວດສອບດັ່ງກ່າວ, ນໍາພາໂດຍທ່ານ ທັນໄດ ຈັນຊົມພູ ຫົວ ໜ້າພະແນກວິທະຍາສາດ ແລະ ເຕັກໂນໂລຊີແຂວງ ພ້ອມດ້ວຍໜ່ວຍງານ ແລະ ວິຊາການທີ່ກ່ຽວຂ້ອງ.
ທ່ານ ທັນໄດ ຈັນຊົມພູ ໃຫ້ສໍາພາດຕໍ່ນັກຂ່າວໜັງສືພິມ ສະຫວັນພັດທະນາ ວ່າ: ໃນການກວດສອບດັ່ງກ່າວ, ໄດ້ລົງເຄື່ອນໄຫວຈັດຕັ້ງປະຕິບັດກວດສອບ 2 ຄັ້ງ/ປີ. ປີນີ້, ພວກເຮົາໄດ້ດໍາເນີນການກວດສອບມາດຕະຖານ ບໍລິມາດຫົວຈ່າຍນໍ້າມັນຢ່າງເປັນທາງການໃນທົ່ວແຂວງ ເປັນຄັ້ງທໍາອິດຂອງປີ ເລີ່ມແຕ່ວັນທີ 7–23 ມັງກອນ 2019, ຜ່ານການກວດສອບໃນ 14 ຕົວເມືອງ ສາມາດກວດໄດ້ທັງໝົດ 225 ປໍ້າ, 975 ຫົວຈ່າຍ ແລະ ຍັງຈະສືບຕໍ່ດໍາເນີນການກວດສອບໃຫ້ຄົບທຸກປໍ້າ. ເຊິ່ງຜ່ານການກວດສອບເຫັນວ່າແຕ່ລະປໍ້າແມ່ນຢູ່ໃນເກນຂອງມາດຕະຖານແຫ່ງຊາດທີ່ໄດ້ກໍານົດໄວ້.
ໃນການກວດສອບດັ່ງກ່າວນີ້, ບໍ່ແມ່ນການບັງຄັບແຕ່ເປັນການຄຸ້ມຄອງ, ຊຸກຍູ້ສົ່ງເສີມ ແລະ ປົກປ້ອງສິດ ເພື່ອບໍ່ໃຫ້ເອົາລັດເອົາປຽບເຊິ່ງກັນ ແລະ ກັນລະຫວ່າງຜູ້ປະກອບການກັບຜູ້ຊົມໃຊ້. ພ້ອມນີ້, ກໍ່ຮຽກຮ້ອງໃຫ້ວິຊາການກ່ຽວຂ້ອງຈົ່ງມີຄວາມຮັບຜິດຊອບສູງ, ຢຶດຖືຈັນຍາບັນຂອງພະນັກງານ ແລະ ໃຫ້ມີການກວດສອບຢ່າງຈິງຈັງ ແລະ ຮຽກຮ້ອງໃຫ້ຜູ້ປະກອບການຈົ່ງໃຫ້ຄວາມຮ່ວມມືໃນການກວດສອບດັ່ງກ່າວນີ້ ໃຫ້ໄດ້ຜົນສໍາເລັດດ້ວຍດີ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: Savanhphuttana News