ປີທ່ອງທ່ຽວລາວ-ຈີນ 2019 ເປີດຂຶ້ນຢ່າງເປັນທາງການ ໃນວັນທີ 25 ມັງກອນ 2019 ຜ່ານມາ, ທິ່ຫໍວັດທະນະທໍາແຫ່ງຊາດລາວ ເຊິ່ງລັດຖະບານລາວ ວາງເປົ້າໝາຍວ່າຈະດຶງດູດເອົານັກທ່ອງທ່ຽວຕ່າງປະເທດເຂົ້າມາລາວໃຫ້ໄດ້ 4.500.000 ຄົນ ໃນນີ້, ເປັນນັກທ່ອງທ່ຽວຈີນ ບໍ່ໃຫ້ຫຼຸດ 1 ລ້ານຄົນ ໂດຍຈະມີຫຼາຍກິດຈະກໍາຈັດຂຶ້ນຢູ່ໃນ ສປປ ລາວ ແລະ ສປ ຈີນ.
ທ່ານ ບໍ່ແສງຄຳ ວົງດາລາ, ລັດຖະມົນຕີກະຊວງຖະແຫຼງຂ່າວ, ວັດດທະນະທຳ ແລະ ທ່ອງທ່ຽວ ໄດ້ກ່າວໃນພິທີວ່າ: ການເປີດປີທ່ອງທ່ຽວລາວ-ຈີນ 2019 ຖືເປັນກິດຈະກຳໜຶ່ງໃນການເພີ່ມທະວີສາຍພົວພັນມິດຕະພາບ, ຄວາມເຂົ້າໃຈເຊິ່ງກັນ ແລະ ກັນ ຂອງປະຊາຊົນທັງສອງປະເທດ ຈະເປັນໂອກາດທີ່ດີໃນການດຶງດູດນັກທ່ອງທ່ຽວ ຈາກທົ່ວມຸມໂລກໄດ້ມາຢ້ຽມຢາມ, ທ່ອງທ່ຽວ, ສຳພັດກັບສະຖານທີ່ທ່ອງທ່ຽວດ້ານຕ່າງໆຂອງລາວ ແລະ ຈີນ ທີ່ມີຄວາມຫຼາກຫຼາຍ, ໄດ້ຮັບຮູ້ ແລະ ເຂົ້າໃຈຕໍ່ສະພາບຄວາມເປັນຈິງທາງດ້ານການພັດທະນາເສດຖະກິດ-ສັງຄົມ ຂອງສອງປະເທດລາວ-ຈີນ, ຈີນ-ລາວ ຫຼາຍຂຶ້ນກວ່າເກົ່າ.
ໃນພິທີ, ທ່ານ ລູຊູກາງ ລັດຖະມົນຕີກະຊວງວັດທະນະທຳ ແລະ ທ່ອງທ່ຽວຈີນ ໄດ້ຂຶ້ນອ່ານສານຊົມເຊີຍ ຂອງທ່ານ ສີ ຈິ້ນ ຜິງ, ປະທານປະເທດຈີນ ຕໍ່ການເປີດປີທ່ອງທ່ຽວລາວ-ຈີນ 2019 ໂດຍໄດ້ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອຍາວນານ ແລະ ການຮ່ວມມືແບບຄູ່ຮ່ວມຍຸດທະສາດຮອບດ້ານ, ໝັ້ນຄົງ, ຍາວນານຕາມທິດ 4 ດີ ຄື: ບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ ແລະ ຄູ່ຮ່ວມມືທີ່ດີລະຫວ່າງສອງພັກ-ສອງລັດ ແລະ ປະຊາຊົນສອງຊາດລາວ-ຈີນ.
ສຳລັບກິດຈະກຳໃນໂອກາດເປີດປີທ່ອງທ່ຽວລາວ-ຈີນ 2019 ຄັ້ງນີ້ ສະເພາະກິດຈະກຳຢູ່ລາວ-ຈີນ ທ່ານສາມາດອ່ານກົດນີ້ເພື່ອອ່ານ: https://laopost.com/2019/01/23/109680?fbclid=IwAR1u-z_4nQ5CYJTsC0-eJD7hFeiJCw8v0Ha0l2_mwbuy-K2dbkCOMr8zs64
ຂ່າວ, ຮູບພາບໂດຍ: ໃບບົວ ຈັນທະລັງສີ