ໂຄງການກໍ່ສ້າງທາງດ່ວນ ວຽງຈັນ-ວັງວຽງ ໃກ້ເປັນຈິງ ເພາະຕອນນີ້, ຜູ້ຮັບເໝົາກໍ່ສ້າງໄດ້ເລີ່ມລົງມືກໍ່ສ້າງແລ້ວ ໂດຍເລີ່ມຈາກໄລຍະທາງ 109,12 ກິໂລແມັດ ແຕ່ວຽງຈັນ-ວັງວຽງ ແລະ ໄດ້ແບ່ງທີມງານກໍ່ສ້າງອອກເປັນ 7 ທີມປະຈໍາຢູ່ແຕ່ລະຈຸດ. ອີງຕາມແຜນການຄາດວ່າຈະໃຊ້ເວລາກໍ່ສ້າງໃຫ້ສໍາເລັດພາຍໃນ 3 ປີ.
ທ່ານ ບຸນຍະວັດ ນີລະໄຊ ຜູ້ຕາງໜ້າລັດຖະບານລາວ ຈາກກະຊວງໂຍທາທິການ ແລະ ຂົນສົ່ງໃຫ້ຮູ້ວ່າ: “ໂຄງການກໍ່ສ້າງທາງດ່ວນແຕ່ ນະຄອນຫຼວງວຽງຈັນ-ບໍ່ເຕັນ ແຂວງ ຫຼວງນໍາທາງ ຊາຍແດນ ສປ ຈີນ ໂດຍຜ່ານ 4 ແຂວງຄື: ນະຄອນຫຼວງວຽງຈັນ, ແຂວງ ວຽງຈັນ, ຫຼວງພະບາງ, ອຸດົມໄຊ ແລະ ຫຼວງນໍ້າທາ. ສະເພາະການກໍ່ສ້າງໄລຍະທໍາອິດແມ່ຈະສ້າງແຕ່ນະຄອນຫຼວງວຽງຈັນ-ວັງວຽງ ແຂວງ ວຽງຈັນ ທີ່ມີຄວາມຍາວທັງໝົດ 109,12 ກິໂລແມັດ, ກວ້າງ 23 ແມັດ, ມີ 4 ຊ່ອງຈະລາຈອນ ແລະ ມີ 2 ແລວໄປ-ກັບ ເຊິ່ງແຜນການຈະໃຊ້ເວລາກໍ່ສ້າງໃຫ້ສໍາເລັດພາຍໃນ 3 ປີ”.
“ປັດຈຸບັນ, ບໍລິສັດຜູ້ຮັບເໝົາກໍ່ສ້າງໄດ້ເລີ່ມລົງມືກໍ່ສ້າງແລ້ວ ໂດຍແບ່ງທີມງານອອກເປັນ 7 ທີມປະຈໍາແຕ່ລະຈຸດໃນໄລຍະການກໍ່ສ້າງແຕ່ນະຄອນຫຼວງວຽງຈັນ-ວັງວຽງ ເຊິ່ງໄດ້ມີການບຸກເບີກແລວເສັ້ນທາງ, ອະນາໄມໜ້າທາງ ທີ່ສໍາຄັນທາງໂຄງການກໍາລັງຂຸ້ນຂ້ຽວນໍາເອົາກົນຈັກໜັກເຂົ້າພາກສະນາມ ເພື່ອດໍາເນີນການກໍ່ສ້າງໃຫ້ບັນລຸຕາມແຜນການ”, ທ່ານ ບຸນຍະວັດ ນີລະໄຊ ກ່າວ.
ລັດຖະບານ ແຫ່ງ ສປປ ລາວ ມີແຜນສ້າງໂຄງການທາງດ່ວນແຕ່ ນະຄອນຫຼວງວຽງຈັນ-ດ່ານບໍ່ເຕັນ ແຂວງ ຫຼວງນໍ້າທາ ໂດຍຈຸດເລີ່ມຕົ້ນກໍ່ສ້າງຈະເລີ່ມຢູ່ທີ່ນະຄອນຫຼວງວຽງຈັນ ຈາກບ້ານສີເກີດ ເມືອງນາຊາຍທອງ-ເມືອງ ວັງວຽງ ແຂວງວຽງຈັນ ເປັນໄລຍະທໍາອິດ ຈາກນັ້ນ, ຈຶ່ງຈະເລີ່ມກໍ່ສ້າງແຕ່ວັງວຽງ-ຫຼວງພະບາງ-ອຸດົມໄຊ ແລະ ບໍ່ເຕັນ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: laoedaily.com.la