ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ເນັ້ນໃຫ້ ສຄອຊ ສ້າງໄດ້ກົນໄກປະສານງານລະຫວ່າງພາກທຸລະກິດ ແລະ ບັນດາຂະແໜງການຂອງລັດ; ໃຫ້ພາກສ່ວນທຸລະກິດ ຫັນເອົາການຜະລິດ ແລະ ທຸລະກິດເປັນປາຍແຫຼມສົ່ງອອກ ແລະ ຮ່ວມມືກັບບັນດາທຸລະກິດກັບຕ່າງປະເທດ ເພື່ອແລກປ່ຽນຖອດຖອນບົດຮຽນ ພ້ອມທັງເປັນເຈົ້າການສ້າງເງື່ອນໄຂນັກທຸລະກິດດີເດັ່ນ ແລະ ຮັບລາງວັນໃຫ້ຫຼາຍຂຶ້ນ, ທີ່ກອງປະຊຸມປີ 2018 ແລະ ສະເຫຼີມສະຫຼອງສະພາການຄ້າ ແລະ ອຸດສາຫະກຳແຫ່ງຊາດ (ສຄອຊ) ຄົບຮອບ 30 ປີ ຈັດຂຶ້ນວັນທີ 23 ມັງກອນ 2019 ທີ່ຫໍປະຊຸມແຫ່ງຊາດ.
ທ່ານ ອຸເດດ ສຸວັນນະວົງ ໄດ້ກ່າວວ່າ: ຕະຫຼອດໄລຍະ 30 ປີຜ່ານມາ ສຄອຊ ໄດ້ເອົາໃຈໃສ່ເຂົ້າໃນການເຄື່ອນໄຫວວຽກງານ ສຄອຊ ເຮັດໃຫ້ຂະແໜງການໃນແຕ່ລະດ້ານມີການຂະຫຍາຍຕົວ ແລະ ສຳເລັດເປັນກ້າວໆ ເປັນຕົ້ນ: ວຽກງານພັດທະນາສົ່ງເສີມທຸລະກິດຂະໜາດນ້ອຍ-ຂະໜາດກາງ SME ເຊິ່ງ ສຄອຊ ໄດ້ສ້າງສູນບໍລິການທຸລະກິດຂະໜາດນ້ອຍ-ຂະໜາດກາງ ໄດ້ເປັນສ່ວນໜຶ່ງໃນການເຕົ້າໂຮມເອົາບັນດາໂຄງການສົ່ງເສີມຄວາມຮູ້, ຄວາມສາມາດ ທີ່ມີຢູ່ຮ່ວມກັບກົມພັດທະນາສົ່ງເສີມ SME ຂອງກະຊວງອຸດສາຫະກຳ ແລະ ການຄ້າ ໃນນັ້ນ, ໄດ້ມີການເຝິກອົບຮົມ ແລະ ສ້າງເງື່ອນໄຂໃຫ້ SME ເຂົ້າເຖິງແຫຼ່ງທຶນ ແລະ ກິດຈະກຳໃນການພັດທະນາບໍລິສັດ ເປັນການເຝິກອົບຮົມໃຫ້ທຸລະກິດໜຸ່ມມີຄວາມສາມາດ.
ພ້ອມນັ້ນ, ໄດ້ສ້າງກອງທຶນສົ່ງເສີມ Start Up ໂດຍນັກລົງທຶນລາວເຂົ້າໃນການພັດທະນາທຸລະກິດ, ວຽກງານພັດທະນາສົ່ງເສີມການຕະຫຼາດຜະລິດຕະພັນລາວ ໄດ້ເພີ່ມທະວີການສົ່ງເສີມຜະລິດຕະພັນຍີ່ຫໍ້ລາວໃຫ້ເຂົ້າສູ່ຕະຫຼາດສາກົນ, ເສີມສ້າງຄວາມສາມາດໃຫ້ບໍລິສັດສະຫະກອນ ແລະ ຊາວກະສິກອນ-ຊາວບ້ານ ໃນການຜະລິດສິນຄ້າເພື່ອສົ່ງອອກຢ່າງເປັນຕ່ອງໂສ້ທີ່ມີມາດຕະຖານສາກົນ, ມີຄຸນນະພາບ ແລະ ລາຄາສູງ. ໃນການສົ່ງອອກໄດ້ຄັດເລືອກເອົາຜະລິດຕະພັນລາວຈຳນວນໜຶ່ງ ເພື່ອສ້າງຕົວແບບເພື່ອການສົ່ງອອກເຊັ່ນ: ຊາ, ກາເຟ, ເຂົ້າໜຽວ, ແພໄໝ ແລະ ອາຫານ. ປີຜ່ານມາບໍລິສັດລາວເຮົາ ສາມາດຍາດໄດ້ລາງວັນທຸລະກິດອາຊຽນດີເດັ່ນ ປະຈໍາປີ 2017 ແລະ ປີ 2018 ເຮັດໃຫ້ປະຊາຄົມໃນພາກພື້ນ ກໍຄືໂລກໄດ້ຮູ້ຈັກກັບຜະລິດຕະພັນ ແລະ ສິນຄ້າລາວຫຼາຍຂຶ້ນ.
ໂອກາດດຽວກັນ, ທ່ານ ທອງລຸນ ສີສຸລິດ ໄດ້ໂອ້ລົມສະແດງຄວາມຍ້ອງຍໍຊົມເຊີຍຜົນງານການເຄື່ອນໄຫວຂອງ ສຄອຊ ຕະຫຼອດໄລຍະຜ່ານມາ ແລະ ໄດ້ເນັ້ນໃຫ້ ສຄອຊ ເອົາໃຈໃສ່ໃນການປະສານງານກັບຂະແໜງການກ່ຽວຂ້ອງ ເພື່ອສ້າງໄດ້ກົນໄກການປະສານງານລະຫວ່າງພາກທຸລະກິດ ແລະ ບັນດາຂະແໜງການຂອງລັດ; ໃຫ້ບັນດາຫົວໜ່ວຍທຸລະກິດເອົາໃຈໃສ່ໃນການພັດທະນາຕົນເອງຫັນມາເປັນການຜະລິດ ແລະ ທຸລະກິດເປັນປາຍແຫຼມສົ່ງອອກ ໃນການຂະຫຍາຍທຸລະກິດຂອງຕົນໄປຍັງພາກພື້ນ ແລະ ສາກົນໃຫ້ເພີ່ມຂຶ້ນ ໂດຍການເພີ່ມນະວັດຕະກຳໃໝ່ເຂົ້າໃນປັດໄຈຂອງການດຳເນີນທຸລະກິດ, ໃຫ້ມີການຮ່ວມມືກັບທຸລະກິດປະເທດເພື່ອນບ້ານໃນພາກພື້ນ ແລະ ສາກົນ ເພີ່ມການແລກປ່ຽນຖອດຖອນບົດຮຽນ ແລະ ຮຽນຮູ້ເຊິ່ງກັນ ແລະ ກັນ, ເປັນເຈົ້າການສ້າງເງື່ອນໄຂໃຫ້ມີນັກທຸລະກິດດີເດັ່ນ ແລະ ຮັບໂລ້ລາງວັນໃຫ້ຫຼາຍຂຶ້ນ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: ໜັງສືພິມວຽງຈັນໃໝ່