5 ປີຜ່ານມາ ສາມາດຍຶດໄມ້ເຖື່ອນໄດ້ທັງໝົດ 5,2 ພັນແມັດກ້ອນ ແລະ 12,1 ກິໂລ ຂະນະທີ່ມີການດໍາເນີນຄະດີຜູ້ກະທໍາຜິດ 63 ຄົນ ໃນນັ້ນ, ຄົນລາວ 54 ຄົນ ແລະ ຄົນຕ່າງປະເທດ 9 ຄົນ ເຫັນໄດ້ວ່າສາລະວັນ ເປັນອີກແຂວງໜຶ່ງທີ່ມີຄວາມເອົາໃຈໃສ່ເຂັ້ມງວດຕໍ່ການຈັດຕັ້ງປະຕິບັດຄໍາສັ່ງ 15/ນຍ ໄດ້ເປັນຢ່າງດີ.
ໃນວັນທີ 18 ມັງກອນ 2019, ກອງກວດກາປ່າໄມ້ ແຂວງ ສາລະວັນ ຈັດກອງປະຊຸມໃຫຍ່ຄັ້ງທີ III ຂຶ້ນທີ່ພະແນກກະສິກໍາ ແລະ ປ່າໄມ້ ແຂວງ ໂດຍການເປັນປະທານຂອງທ່ານ ວັງເສີດ ບຸນເອື້ອວັງສາ ຫົວໜ້າກອງກວດກາປ່າໄມ້ແຂວງ, ທ່ານ ອະນຸສັກ ຈໍາປາຄໍາ ຫົວໜ້າພະແນກກະສິກໍາ ແລະ ປ່າໄມ້ແຂວງ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ. ໃນກອງປະຊຸມໄດ້ສະຫຼຸບຜົນງານໃນໄລຍະ 5 ປີຜ່ານມາຄື: ບັນດາໜ່ວຍງານທີ່ກ່ຽວຂ້ອງໄດ້ສືບຕໍ່ປະຕິບັດຕາມແນວທາງນະໂຍບາຍຂອງລັດຖະບານ ພ້ອມທັງປະສານງານສົມທົບກັບພະແນກອ້ອມຂ້າງແຂວງ, ເມືອງ ແລະ ອໍານາດການປົກຄອງບ້ານ ເພື່ອກວດກາຄຸ້ມຄອງປ່າໄມ້ ແລະ ຊັບພະຍາກອນປ່າໄມ້ດ້ວຍກົດໝາຍ, ລະບຽບການ ແລະ ນິຕິກໍາຕ່າງໆ ທີ່ຂັ້ນເທິງວາງອອກໃນແຕ່ລະໄລຍະ. ທັງນີ້, ໄດ້ອອກລາດຕະເວນສະກັດກັ້ນການລັກລອບຂຸດຄົ້ນ, ຕັດ, ຊື້-ຂາຍ, ເຄື່ອນຍ້າຍໄມ້; ເຄື່ອງປ່າຂອງດົງ, ສັດນໍ້າ, ສັດປ່າ, ພືດປ່າ; ການບຸກລຸກທີ່ດິນປ່າໄມ້ໃນ ແລະ ນອກ 3 ປະເພດປ່າ ແລະ ກວດກາຕາມຈຸດຫຼໍ່ແຫຼມຕ່າງໆ.
ນອກນັ້ນ, ຍັງໄດ້ມີການຕັ້ງຈຸດກວດກາຊັບພະຍາກອນປ່າໄມ້ລະຫວ່າງຊາຍແດນແຂວງຕໍ່ແຂວງ, ເມືອງຕໍ່ເມືອງ ແລະ ດ່ານສາກົນອອກຕ່າງປະເທດ ເຊິ່ງສາມາດຍຶດໄມ້, ຄວບຄຸມພາຫະນະ ແລະ ເຄື່ອງຈັກຕັດໄມ້ ລວມບໍລິມາດທັງໝົດ 5.261,2 ແມັດກ້ອນ ແລະ 12,18 ກິໂລ, ພາຫະນະ 66 ຄັນ, ເຄື່ອງຈັກ 674 ເຄື່ອງ ແລະ ສິ້ນສ່ວນອາໄຫຼຈັກສະຕິນ 1,5 ພັນອັນ, ສາມາດກັກຍຶດສັດປ່າໄດ້ 289 ໂຕ, ຊິ້ນສ່ວນສັດປ່າ 485 ກິໂລ, ເຄື່ອງຊ໋ອດປາ 113 ໜ່ວຍ, ອາວຸດລ່າສັດ 7.005 ກະບອກ, ສໍາລັບສັດປ່າທີ່ຍຶດມານັ້ນໄດ້ມີການປ່ອຍຄືນທໍາມະຊາດ, ສັດທີ່ຕາຍ ແລະ ຊິ້ນສ່ວນສັດໄດ້ຈູດທໍາລາຍເປັນທີ່ຮຽບຮ້ອຍ. ສາມາດສັງລວມຜູ້ກະທໍາຜິດໄດ້ 63 ຄະດີ ມີຜູ້ກະທໍາຜິດທັງໝົດ 63 ຄົນ ໃນນັ້ນ, ມີຄົນລາວ 54 ຄົນ ແລະ ຄົນຕ່າງປະເທດ 9 ຄົນ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: sethakit-psx.la