ກະຊວງປ້ອງກັນປະເທດ ຈັດພິທີເປີດນໍາໃຊ້ຕຶກປີ່ນປົວພະຍາດລວມໂຮງໝໍ 103 ກອງທັບປະຊາຊົນລາວ ເປັນໂຄງການຊ່ວຍເຫຼືອລ້າ ຈາກກອງທັບປົດປ່ອຍປະຊາຊົນຈີນ ເຊິ່ງເນື້ອທີ່ປະມານ 24.756 ຕາແມັດ ເປັນອາຄານ 9 ຊັ້ນ ໃນນັ້ນ, ມີການປິ່ນປົວພະຍາດທົ່ວໄປ, ຂະແໜງຜ່າຕັດ ແລະ ພາກສ່ວນນອນປິ່ນປົວ. ນອກນັ້ນ, ຍັງມີຕຶກຊ່ຽວຊານຈີນ ແລະ ມີອຸປະກອນການແພດ ພ້ອມດ້ວຍສິ່ງອໍານວຍຄວາມສະດວກໃນການປີ່ນປົວຄົນເຈັບຄົບຊຸດ ລວມມູນຄ່າການກໍ່ສ້າງທັງໝົດດ 197 ລ້ານຢວນ ຫຼື ເທົ່າກັບປະມານ 24 ຕື້ກວ່າກີບ.
ພິທີດັ່ງກ່າວ, ຈັດຂຶ້ນວັນທີ 19 ມັງກອນ 2019 ທີ່ໂຮງໝໍ 103 ນະຄອນຫຼວງວຽງຈັນ, ໃຫ້ກຽດເຂົ້າຮ່ວມ ໂດຍ ພົນເອກຈັນສະຫມອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ພົນເອກ ໝຽວຫົວ ຫົວຫນ້າກົມວຽກງານການທະຫານສູນກາງ ກອງທັບປົດປ່ອຍປະຊາຊົນຈີນ ພ້ອມດ້ວຍນາຍທະຫານຂັ້ນສູງຂອງສອງປະເທດ ລາວ-ຈີນ ແລະ ພາກສ່ວນກ່ຽວຂ້ອງເຂົ້າຮ່ວມ.
ພົນຈັດຕະວາ ຄໍາເພັດ ສີຊານົນ ຮອງຫົວໜ້າກົມໃຫຍ່ ພາລາທິການກອງທັບ ກ່າວຄໍາເຫັນໃນພິທີວ່າ: ການເປີດນໍາໃຊ້ຕຶກປີ່ນປົວພະຍາດລວມໂຮງໝໍ 103 ຄັ້ງນີ້, ເປັນການປະກອບສ່ວນສໍາຄັນໃນການເສີມສ້າງສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືຮອບດ້ານລະຫວ່າງສອງຊາດ ກໍຄືສອງກອງທັບລາວ-ຈີນ ຕາມທິດສະດີ 4 ດີ, ທັງເປັນການຍົກລະດັບຄຸນນະພາບ ໃນວຽກງານການແພດຂອງກອງທັບປະຊາຊົນລາວໃຫ້ມີປະສິດທິພາບສູງ ເທົ່າກັບພາກພື້ນ ແລະ ສາກົນ. ຂ້າພະເຈົ້າຕາງໜ້າໃຫ້ແກ່ກະຊວງປ້ອງກັນປະເທດລາວ ສະແດງຄວາມຂອບໃຈ ແລະ ຮູ້ບຸນຄຸນ ຕໍ່ກອງທັບປົດປ່ອຍປະຊາຊົນຈີນ ທີ່ໃຫ້ການຊ່ວຍເຫຼືອ ແກ່ກອງທັບປະຊາຊົນລາວ ຢ່າງລົ້ນເຫຼືອ.
ໂອກາດດຽວກັນ, ພົນຕີ ຫຼີຊິ່ງເຈຍ ຮອງຫົວຫນ້າກົມພາລາທິການ ຄະນະກໍາມະການທະຫານສູນກາງ ກອງທັບປົດປ່ອຍປະຊາຊົນ ຈີນ ກໍມີຄໍາເຫັນວ່າ: ສອງກອງທັບ ລາວ-ຈີນ ຈະຖືເອົາການເປີດນໍາໃຊ້ຕຶກປີ່ນປົວພະຍາດລວມໂຮງຫມໍ 103 ກອງທັບປະຊາຊົນ ລາວ ຫຼັງນີ້ເປັນເວທີສໍາຄັນດ້ານການສ້າງໂອກາດ, ເພີ່ມຊ່ອງທາງ ແລະ ກໍາແໜ້ນພາລະກິດມອບໝາຍຂອງຜູ້ນໍາສອງພັກ, ສອງລັດລາວ-ຈີນ, ເພີ່ມທະວີການຊີ້ນໍາ ນຳພາວຽກງານການເມືອງ, ສ້າງກົນໄກແລກປ່ຽນທີ່ມີການຮ່ວມມືໃຫ້ເປັນຮູບປະທໍາ. ນອກນັ້ນ, ເພື່ອເສີມຂະຫຍາຍສານພົວພັນມິດຕະພາບທີ່ເປັນມູນເຊື້ອມາແຕ່ດົນນານ, ຊຸກຍູ້ສົ່ງເສີມຄວາມສໍາພັນຂອງສອງພັກ, ສອງລັດ, ສອງກອງທັບ ຈີນ-ລາວ ກ້າວສູ່ຈຸດເລີ່ມຕົ້ນໃໝ່.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່, Lao National Radio
ຮູບພາບຈາກ: Lao National Radio