ກະຊວງສຶກສາທິການ ແລະ ກິລາ ( ສສກ ) ໄດ້ອອກກຳນົດມາດຕະຖານຄັດເລືອກບັນຈຸຄູໃໝ່ ເພື່ອໃຫ້ສອດຄ່ອງກັບຄວາມຕ້ອງການຄູຕາມຕົວຈິງ ໂດຍເລີ່ມປີ 2019 ນີ້ເປັນຕົ້ນໄປ. ໃນການຄັດເລືອກດັ່ງກ່າວ,  ຄູໃໝ່ຕ້ອງຜ່ານການສອບເສັງການຄັດເລືອກຕາມຊັ້ນ – ສາຍວິຊາທີ່ຕ້ອງການ ແລະ ຈະເປີດໂອກາດໃຫ້ນັກຮຽນ-ນັກສຶກສາທີ່ຮຽນຈົບໃໝ່ ຖ້າຫາກມີຄວາມຈຳເປັນແທ້ ການຮັບຄູອາສາສະໝັກຕ້ອງໄດ້ຮັບຄຳເຫັນດີຈາກ ກະຊວງ ສສກ, ສ່ວນຄູອາສາທີ່ໄດ້ຫຼາຍປີ ໃຫ້ລະດົມໄປບຳລຸງຍົກລະດັບ ຫຼື ສົ່ງໄປເປັນອາສາສອນຢູ່ໂຮງຮຽນທີ່ຕ້ອງການຄູໃນສາຍນັ້ນ.

ອີງຕາມບົດລາຍງານການແກ້ໄຂບັນຫາຄູເຫຼືອບໍ່ພໍ ກັບຄູອາສາສະໝັກໃນຂະແໜງການສຶກສາ ແລະ ກິລາ ໃນໄລຍະຍາວວ່າ: ແຕ່ປີ 2019 ນີ້ເປັນຕົ້ນໄປ, ການບັນຈຸຄູໃໝ່ຕ້ອງຜ່ານການຄັດເລືອກຕາມຊັ້ນ–ສາຍ ແລະ ລາຍວິຊາທີ່ຕ້ອງການ ໂດຍຈະເປີດໂອກາດໃຫ້ນັກຮຽນ-ນັກສຶກສາຄູທີ່ຮຽນຈົບໃໝ່ ແລະ ຄູອາສາສະໝັກທີ່ມີແລ້ວຕາມອັດຕາສ່ວນທີ່ເໝາະສົມ ມອບໃຫ້ກະຊວງ ສສກ ເປັນຜູ້ກຳນົດຕາມມາດຕະຖານ ໃນການຄັດເລືອກບັນຈຸຄູໃໝ່ແຕ່ລະແຂວງ ແລະ ເມືອງ ຕ້ອງຄົ້ນຄວ້າຈັດສັນເຂດບໍລິການ ການສຶກສາຂອງໂຮງຮຽນຄືນໃໝ່ ເພື່ອໃຫ້ສາມາດຮອງຮັບນັກຮຽນໃນເຂດດັ່ງກ່າວ ພ້ອມທັງໃຫ້ສອດຄ່ອງກັບສະພາບຄວາມຕ້ອງການຄູຕົວຈິງ. ໃນການຂະຫຍາຍຫ້ອງຮຽນ, ຊັ້ນຮຽນ, ໂຮງຮຽນຕ້ອງໄປຄຽງຄູ່ກັບການສ້າງແຜນ ຄວາມຕ້ອງການຄູ ໂດຍອີງໃສ່ແຜນຂອງການສຶກສາ, ຕາມຄູ່ມືການແນະນຳການສ້າງແຜນຄວາມຕ້ອງການຄູ ( ສະບັບປັບປຸງ ຄັ້ງທີ 2 ) ແລະ ຕ້ອງໄດ້ຮັບອະນຸຍາດຈາກ ກະຊວງ ສສກ.

ສຳລັບການແກ້ໄຂບັນຫາຄູເຫຼືອບໍ່ພໍ ແລະ ຄູອາສາສະໝັກໃນໄລຍະສັ້ນ, ມີວິທີການ ແລະ ມາດຕະການຄື: ຈຳນວນຕົວເລກລັດຖະກອນໃໝ່ ສົກປີ 2017–2018 ຈໍານວນ 1.850 ຕົວເລກທີ່ລັດຖະບານ ອະນຸມັດໃຫ້ ໂດຍເນັ້ນໃສ່ຄູອາສາສະໝັກທີ່ສອນມາໄດ້ຫຼາຍປີ, ວິຊາທີ່ມີຄວາມຈຳເປັນ ແລະ ຂາດເຂີນຄູແທ້ໃນເຂດຫ່າງໄກສອກຫຼີກ ເຊິ່ງໄດ້ຜ່ານການສອບເສັງ ແລະ ການປະເມີນປະຈຳປີ; ໄດ້ອອກຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບຄົ້ນຄວ້າປັບປຸງນິຕິກຳກ່ຽວກັບການບັນຈຸ –ສັບຊ້ອນ; ນຳໃຊ້ ແລະ ຈັດສັນຄູຂອງຂະແໜງການສຶກສາທິການ ແລະ ກິລາ ສະບັບເລກທີ 5341/ສສກ ລົງວັນທີ10 ກັນຍາ 2018; ປັບປຸງນິຕິກຳກ່ຽວກັບການສ້າງແຜນຄວາມຕ້ອງການຄູປະຈຳປີ. ສ່ວນຊັ້ນການສຶກສາກ່ອນໄວຮຽນ ແລະ ປະຖົມສຶກສາ ເນັ້ນໃສ່ອັດຕາສ່ວນນັກຮຽນຕໍ່ຄູເປັນຫຼັກ ສຳລັບຊັ້ນມັດທະຍົມສຶກສາ ຕ້ອງອີງໃສ່ຈຳນວນນັກຮຽນ/ຫ້ອງ ແລະ ຈຳນວນຊົ່ວໂມງສອນ/ອາທິດ.

ແລະ ສຳລັບຄູອາສາສະໝັກທີ່ສອນມາໄດ້ຫຼາຍປີ ແຕ່ບໍ່ໄດ້ຮັບການບັນຈຸ ແລະ ມີວິຊາສະເພາະບໍ່ສອດຄ່ອງກັບຄວາມຕ້ອງການ ໃຫ້ລະດົມໄປຍົກລະດັບ ຫຼື ບຳລຸງວິຊາອື່ນໆ ຫຼື ສົ່ງໄປເປັນອາສາສະໝັກສອນຢູ່ໂຮງຮຽນບ່ອນທີ່ຕ້ອງການຄູທີ່ສອດຄ່ອງກັບວິຊາສະເພາະທີ່ຮຽນຈົບ, ສ້າງເງື່ອນໄຂ ແລະ ສົ່ງເສີມຄູອາສາສະໝັກບໍ່ຖືກຊັ້ນ–ສາຍ ແລະ ລາຍວິຊາໄປຊ່ວຍສອນໂຮງຮຽນເອກະຊົນ ຫຼືພາກສ່ວນອື່ນທີ່ມີຄວາມຕ້ອງການຄູ ແລະ ແຕ່ລະແຂວງໃຫ້ມີໂຄງການຄູສອນຕາມພັນທະສັນຍາໃນເຂດຫ່າງໄກສອກຫຼີກ ແລະບ່ອນທີ່ຂາດເຂີນຄູ ໂດຍລະດົມເອົາຄູທີ່ເຫຼືອໄປສອນໃນເຂດດັ່ງກ່າວ ເຊິ່ງກຳນົດ 3 – 5 ປີ ໂດຍສັບປ່ຽນໝູນວຽນ.

ສະເພາະການກຳນົດນະໂຍບາຍກ່ຽວກັບແຮງຈູງໃຈບາງດ້ານເປັນຕົ້ນ: ການສະໜອງຫໍພັກຄູ, ການຍົກຍ້າຍລະດັບການສຶກສາ, ການຝຶກອົບຮົມ ແລະ ສົ່ງເສີມຄວາມກ້າວໜ້າຕາມລະບຽບການ. ນອກນັ້ນ, ແຕ່ລະແຂວງ, ເມືອງ ຕ້ອງປັບປຸງຖານຂໍ້ມູນຕ່າງໆ ຂອງຕົນ ເພື່ອແນໃສ່ຄວາມຕ້ອງການຄູ, ບັນຈຸຄູໃໝ່ ແລະ ສັບຊ້ອນຄູ ທັງສາມາດເຊື່ອມໂຍງກັບກະຊວງ ສສກ ໂດຍອີງຕາມມາດຕະຖານການຄຸ້ມຄອງຂໍ້ມູນຂອງຂະແໜງການສຶກສາທິການ ແລະ ກິລາ ຖ້າຫາກມີຄວາມຈຳເປັນແທ້ ການຮັບຄູອາສາສະໝັກຕ້ອງໄດ້ຮັບຄຳເຫັນດີຈາກ ກະຊວງ ສສກ ໂດຍມີການສະໜອງຂໍ້ມູນລະອຽດຕາມແບບຟອມທີ່ໄດ້ກຳນົດໄວ້ ແລະ ປັບປຸງແຜນກໍ່ສ້າງຄູໄລຍະຍາວໃຫ້ແທດເໝາະກັບແຜນຄວາມຕ້ອງການຕົວຈິງ.

ຮຽບຮຽງໂດຍ: ໃບບົວ ຈັນທະລັງສີ

ແຫຼ່ງຂໍ້ມູນຈາກ: ໜັງສືພິມເສດຖະກິດ-ການຄ້າ