ສຳນັກຂ່າວຊິນຫົວລາຍງານວ່າ ນະຄອນເວິນໂຈຂອງມົນທົນເຈີຈຽງ ປະເທດຈີນ ໄດ້ເລີ່ມປະຕິບັດການຄັ້ງທຳອິດເມື່ອວັນທີ 14 ມັງກອນ 2019 ທີ່ຜ່ານມາ ໂດຍໄດ້ປັບໄໝຄົນໜຶ່ງທີ່ຫຼິ້ນໂທລະສັບໃນຂະນະກຳລັງຍ່າງຂ້າມທາງ.
ຕຳຫຼວດທ້ອງຖິ່ນກ່າວວ່າ ສຳລັບຄົນຍ່າງ ແລະ ຫຼິ້ນໂທລະສັບໄປພ້ອມຈະຖືກປັບໄໝ 10 ຢວນ ຫຼື 12.540 ກີບ ບົດລົງໂທດດັ່ງກ່າວມີຈຸດປະສົງເພື່ອເຕືອນຄົນຍ່າງໃຫ້ລະວັງຄວາມປອດໄພຂອງຕົນເອງ ແລະ ລວມເຖິງການຮັກສາເວລາຂອງຜູ້ໃຊ້ລົດໃຊ້ຖະໜົນຄົນອື່ນທີ່ຕ້ອງຢຸດລໍຖ້າເປັນເວລາດົນເນື່ອງຈາກພວກທີ່ຍ່າງເອົາແຕ່ຈ້ອງເບິ່ງໂທລະສັບໃນມື.
ທາງການນະຄອນໂຈ ເລີ່ມປະຕິບັດນະໂຍບາຍນີ້ຕັ້ງແຕ່ວັນທີ 1 ມັງກອນ 2019 ເປັນຕົ້ນມາ ເພື່ອກະຕຸ້ນໃຫ້ຄົນຍ່າງຂ້າມທາງຍ່າງໃຫ້ໄວທີ່ສຸດ ໂດຍມີການແຈກຂອງຫຼິ້ນແກ່ຄົນທີ່ປະຕິບັດຕາມກົດລະບຽບເປັນຢ່າງດີອີກດ້ວຍ.
ທັງນີ້, ໃນປະເທດລິທົວເນຍໃນທະເວີເອີຣົບໄດ້ໃຊ້ນະໂຍບາຍລັກສະນະດຽວກັນໃນປີ 2018 ໂດຍຈະລົງໂທດປັບໄໝຄົນທີ່ຍ່າງແລ້ວຫຼິ້ນໂທລະສັບໄປພ້ອມເປັນຈຳນວນເງິນ 22.8 – 45.6 ໂດລາ ຫຼື ປະມານ 194.849 – 389.698 ກີບ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: sanook