ສຳນັກຂ່າວຕ່າງປະເທດລາຍງານເມື່ອວັນທີ 10 ມັງກອນ 2019 ທີ່ຜ່ານມາວ່າ ພົບສົບຍິງສາວໄວອາຍຸ 16 ປີ ຖືກຄາດຕະກຳຢ່າງໂຫດຮ້າຍປ່າເຖື່ອນ ທີ່ເມືອງ ມະຄົດ ລັດວິຫານ ປະເທດອິນເດຍ ໂດຍສະພາບສົບຖືກຕັດຄໍ ແລະ ໜ້າເອິກ ຮ່າງກາຍຖືກສາດດ້ວຍນໍ້າກົດ ໂດຍຄອບຄົວຂອງຜູ້ເສຍຊີວິດອ້າງວ່າຜູ້ຕາຍຖືກຂົ່ມຂືນ ແຕ່ຕຳຫຼວດສົງໃສວ່າແມ່ນພໍ່ຂອງຜູ້ຕາຍທີ່ສົ່ງຕົວລູກຕົນເອງໄປໃຫ້ຄົນຮ້າຍຂ້າ ເຊື່ອວ່ານີ້ເປັນການຄາດຕະກຳທີ່ຮຽກວ່າ ການຂ້າເພື່ອກຽດສັກສີ.
ຜູ້ຕາຍມີຊື່ວ່າ ນາງ ອັນຊະນາ ອາຍຸ 16 ປີ ສົບຖືກພົບເມື່ອວັນທີ 6 ມັງກອນ 2019 ໃກ້ກັບເຮືອນຂອງນາງ ເຊິ່ງຜູ້ເປັນພໍ່ໄດ້ເຂົ້າແຈ້ງຄວາມກັບຕຳຫຼວດວ່າ ລູກສາວຫາຍຕົວໄປຕັ້ງແຕ່ວັນທີ 28 ທັນວາ 2018, ແຕ່ແມ່ກັບພວກນ້ອງສາວໄດ້ໃຫ້ການກັບທາງຕຳຫຼວດວ່າ ນາງ ອັນຊະນາ ກັບມາເຮືອນໃນວັນທີ 31 ທັນວາ 2018 ກ່ອນທີ່ພໍ່ຈະສົ່ງນາງໄປກັບຊາຍອີກຄົນທີ່ພວກເຂົາຮູ້ຈັກກັນໃນເວລາ 22:00 ໂມງ.
ຄຳໃຫ້ການດັ່ງກ່າວເຮັດໃຫ້ຕຳຫຼວດເຊື່ອວ່າຄະດີນີ້ອາດເປັນການຄາດຕະກຳ ຂ້າເພື່ອກຽດສັກສີ ຫຼື ການຂ້າເພື່ອຮັກສາກຽດຂອງຄອບຄົວເອົາໄວ້ ແຕ່ຍັງບໍ່ຮູ້ຊັດເຈນວ່າແມ່ນຫຍັງທີ່ເປັນແຮງຈູງໃຈໃນການຄາດຕະກຳຄັ້ງນີ້ ໂດຍຕຳຫຼວດກຳລັງສອບສວນວ່າ ນາງ ອັນຊະນາ ຖືກຂົ່ມຂືນກ່ອນທີ່ນາງຈະຖືກຂ້າ ຫຼື ບໍ່.
ເຫດການຄັ້ງນີ້ເຮັດໃຫ້ປະຊາຊົນອອກມາເດີນຂະບວນປະທ້ວງຕັ້ງແຕ່ມື້ທີ່ມີການພົບສົບ ຫຼັງຈາກນັ້ນຜູ້ປະທ້ວງໄດ້ມີການຈັດພິທີວາງທຽນໄວ້ອາໄລໃຫ້ກັບນາງ ອັນຊະນາ ແລະ ສະແດງຄວາມບໍ່ພໍໃຈທີ່ຕຳຫຼວດຍັງບໍ່ສາມາດຈັບກຸມຕົວຜູ້ຕ້ອງສົງໃສໄດ້ເລີຍ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: thairath