ເວັບໄຊສ໌ຂ່າວ south china morning post ລາຍງານເມື່ອວັນທີ 15 ມັງກອນ 2019ທີ່ຜ່ານມາວ່າ ທ່ານ ຮຸນເຊນ ນາຍົກລັດຖະມົນຕີກຳປູເຈຍມີຄຳສັ່ງໃຫ້ໜ່ວຍງານທີ່ກ່ຽວຂ້ອງ (ກະຊວງການຕ່າງປະເທດກຳປູເຈຍ) ເກັບຄືນ ພ້ອມກວດສອບໜັງສືເດີນທາງ ຫຼື ພາສປອດ ທີ່ເຄີຍອອກໃຫ້ກັບບຸກຄົນທີ່ບໍ່ແມ່ນສັນຊາດກຳປູເຈຍແຕ່ກຳເນີດ ໂດຍເໜັ້ນວ່າການອອກໜັງສືເດີນທາງປະເພດດັ່ງກ່າວເຮັດໃຫ້ໄດ້ສະເພາະກໍລະນີ “ຈຳເປັນທີ່ສຸດເທົ່ານັ້ັນ”.

ພະນົມເປນໂພສ ສື່ທ້ອງຖິ່ນຂອງກຳປູເຈຍລະບຸວ່າ ຄຳສັ່ງດັ່ງກ່າວຂອງຜູ້ນຳກຳປູເຈຍ ໄດ້ສັ່ງໃຫ້ໜ່ວຍງານທີ່ກ່ຽວຂ້ອງນຳໜັງສືເດີນທາງປະເພດດັ່ງກ່າວກັບມາກວດສອບຄືນຢ່າງລະອຽດ ໂດຍຄຳສັ່ງນີ້ມີຂຶ້ນໃນວັນດຽວກັນກັບທີ່ມີລາຍງານຂ່າວ ກໍລະນີ ນາງ ຍິ່ງລັກ ຊິນນະວັດ ອະດີດນາຍົກລັດຖະມົນຕີໄທ ເຊິ່ງປັດຈຸບັນລີ້ໄພທາງການເມືອງຢູ່ນອກປະເທດຕັ້ງແຕ່ປີ 2017 ຄອບຄອງພາສປອດກຳປູເຈຍ.

ມີລາຍງານລະບຸວ່າ ຊາວຕ່າງຊາດທີ່ດຳລົງຕຳແໜ່ງເປັນທີ່ປຶກສາຂອງລັດຖະບານ ແລະ ຜູ້ຊ່ວຍຂອງເຈົ້າໜ້າທີ່ລັດລະດັບສູງ ລວມເຖິງບຸກຄົນທີ່ໄດ້ຮັບສັນຊາດກຳປູເຈຍ ສາມາດຂໍໜັງສືເດີນທາງປະເພດການທູດຈາກລັດຖະບານໄດ້ ແຕ່ຄຳສັ່ງຫຼ້າສຸດດັ່ງກ່າວນີ້ມີຂຶ້ນໂດຍທ່ານ ຮຸນເຊນ ເຊິ່ງອ້າງວ່າ ເພື່ອແກ້ໄຂບັນຫາບໍ່ໃຫ້ໜັງສືເດີນທາງປະເພດດັ່ງກ່າວຖືກນຳໄປໃຊ້ຢ່າງບໍ່ເໝາະສົມ ຍົກເວັ້ນກໍລະນີຈຳເປັນແທ້ໆ.

ທັງນີ້, ເມື່ອອາທິດທີ່ຜ່ານມມາທາງລັດຖະບານກຳປູເຈຍອອກຖະແຫຼງການປະຕິເສດວ່າບໍ່ເຄີຍອອກໜັງສືເດີນທາງໃຫ້ກັບ ນາງ ຍິ່ງລັກ ຊິນນະວັດ ແລະ ເຈົ້າໜ້າທີ່ລະດັບສູງກຳປູເຈຍປະຕິເສດວ່າບໍ່ເຄີຍອອກພາສປອດໃຫ້ກັບຊາວຕ່າງຊາດ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: today.line.me, south chaina morning post