ສະຫວັນນະເຂດ ຮັບຮອງເອົາເຂດອະນຸລັກໂອງ-ມັ່ງ ຂຶ້ນເປັນເຂດອະນຸລັກລະດັບຊາດ ໃນວັນທີ 11 ມັງກອນ 2018 ຜ່ານມາ, ທີ່ເມືອງ ຊົນບູລີ ແຂວງ ສະຫວັນນະເຂດ ໂດຍຜ່ານການຕົກລົງເຫັນດີ ແລະ ເປັນເອກະພາບກັນຈາກຫຼາຍພາກສ່ວນທີ່ກ່ຽວຂ້ອງພາຍໃນແຂວງ ທີ່ເຫັນວ່າຖືກຕ້ອງຕາມເງື່ອນໄຂມາດຖານທີ 4 ຂອງອົງການສາກົນເພື່ອການອະນຸລັກທໍາມະຊາດ.

ໃນການຮັບຮອງເອົາເຂດດັ່ງກ່າວຂຶ້ນເປັນເຂດອະນຸລັກລະດັບຊາດ ກໍໄດ້ຈັດກອງປະຊຸມປຶກສາຫາລືຮ່ວມກັບຊຸມຊົນ ເພື່ອຍົກລະດັບເຂດອະນຸລັກໂອງ-ມັ່ງຂຶ້ນເປັນເຂດລະດັບຊາດວັນທີ 11 ມັງກອນ 2018 ຜ່ານມາ, ທີ່ເມືອງ ຊົນບູລີ ແຂວງ ສະຫວັນນະເຂດ  ພາຍໃຕ້ການເປັນປະທານຂອງທ່ານ ຄໍາມອນ ທິລະວົງ ຮອງເຈົ້າເມືຶອງ ຊົນນະບູລີ ທັງເປັນຜູ້ຊີ້ນໍາວຽກງານໂຄງການຂັ້ນເມືອງ, ທ່ານ ບຸນເລດ ຈັນທອງທິບ ຮອງຫົວໜ້າພະແນກກະສິກໍາ-ປ່າໄມ້ແຂວງສະຫວັນນະເຂດ, ມີບັນດາທ່ານຄະນະປະຈໍາພັກເມືອງ, ຫົວໜ້າຫ້ອງການ ແລະ ອໍານາດການປົກຄອງບ້ານເປົ້າໝາຍຂອບເຂດອະນຸລັກໂອງ-ມັ່ງ ເຂົ້າຮ່ວມ.

ກອງປະຊຸມດັ່ງກ່າວ, ໄດ້ມີການປຶກສາຫາລື, ຄົ້ນຄວ້າປະກອບຄໍາຄິດເຫັນຢ່າງກົງໄປກົງມາ ພ້ອມທັງຕັ້ງຄໍາຖາມເຈາະຈີ້ມ ແລະ ອະທິບາຍຊີ້ແຈງໃນບັນຫາຕ່າງໆ ທີ່ກ່ຽວຂ້ອງກັບວຽກງານດັ່ງກ່າວ ພ້ອມນັ້ນ, ໄດ້ຕົກລົງເຫັນດີເປັນເອກະພາບກັນຄື: ເຫັນດີໃນການຍົກລະດັບເຂດອະນຸລັກໂອງ-ມັ່ງຂຶ້ນເປັນເຂດລະດັບຊາດ, ເຫັນດີໃຫ້ປະສານງານໂຄງການຂັ້ນແຂວງສົມທົບກັບກົມຄຸ້ມຄອງປ່າສະຫງວນ ແລະ ປ່າປ້ອງກັນ, ຫ້ອງການກະສິກໍາ-ປ່າໄມ້ເມືອງ ແລະ ອໍານາດການປົກຄອງບ້ານເປົ້າໝາຍຮັບຜິດຊອບ ເຊິ່ງໃນການຮ່າງເອກະສານຄັ້ງນີ້, ຍັງເອກະພາບຮັບຮອງເອົາເຂດອະນຸລັກໂອງ-ມັ່ງ ຂຶ້ນເປັນເຂດອະນຸລັກລະດັບຊາດ ຕາມເງື່ອນໄຂມາດຖານທີ 4 ຂອງອົງການສາກົນເພື່ອການອະນຸລັກທໍາມະຊາດ.

ຮຽບຮຽງໂດຍ: ໃບບົວ ຈັນທະລັງສີ

ແຫຼ່ງຂໍ້ມູນຈາກ: ໜັງສືພິມເສດຖະກິດ-ສັງຄົມ