ປັດຈຸບັນລະດັບມົນລະຜິດທາງອາກາດມີລະດັບສູງຂຶ້ນທັງໃນບາງກອກ, ປະເທດໄທ ແລະ ໃນນະຄອນຫຼວງໂຊລ ປະເທດເກົາຫຼີໃຕ້ ເຖິງແມ່ນວ່າມົນລະຜິດອາກາດຢູ່ໃນປະເທດລາວເຮົາຍັງບໍ່ເກີນເກນມາດຕະຖານ ຄືຢູ່ໃນລະດັບ PM2.5 ໂດຍສະເລ່ຍຢູ່ໃນລະດັບເລີ່ມມີຜົນກະທົບຕໍ່ສຸຂະພາບ ມີຄ່າເກີນມາດຕະຖານ 50 ໄມໂຄຣກຣັມຕໍ່ແມັດກ້ອນ ແຕ່ເຮົາທຸກຄົນກໍ່ບໍ່ຄວນເມີນເສີຍກ່ຽວກັບເລື່ອງນີ້.
ມົນລະພິດຈາກຝຸ່ນໃນອາກາດມີຫຼາຍຮູບແບບເຊັ່ນ: ຝຸ່ນຜົງແປ້ງ-ເຄື່ອງສຳອາງ, ຂີ້ຝຸ່ນ, ຂີ້ເຖົ່າ ແລະ ຄວັນຈາກການຈູດການເຜົາໄໝ້ຕ່າງໆ, ຄວັນລົດ, ຄວັນຈາກໂຮງງານ, ການກໍ່ສ້າງຕ່າງໆ, ຝຸ່ນຈາກທາງບໍ່ປູຢາງ, ມົນລະພິດໃນຮູບແບບກ໊າຊຄືການສີດສະເປ, ການສີດຢາຂ້າຫຍ້າ-ຂ້າແມງໄມ້ ແລະ ຍັງມີໃນຮູບແບບອື່ນໆ.
ຜົນກະທົບຈາກມົນລະພິດທາງອາກາດສົ່ງຜົນເສຍຕໍ່ສຸຂະພາບຮ້າຍແຮງກວ່າທີ່ຄິດ ຈາກງານສຶກສາວິໄຈສຳຄັນໃນໄລຍະສິບປີທີ່ຜ່ານມາ ອົງການອະນາໄມໂລກຄາດການວ່າມີປະຊາກອນທີ່ອາຍຸສັ້ນ ເນື່ອງຈາກມົນລະພິດໃນອາກາດທົ່ວໂລກຫຼາຍກວ່າ 6 ລ້ານຄົນໃນແຕ່ລະປີ ແລະ ໃນຈຳນວນນີ້ ເປັນເດັກນ້ອຍອາຍຸຕໍ່າກວ່າ 5 ປີ ປະມານ 10% ຄື ປະມານ 600.000 ຄົນ.
ມີງານວິໄຈຈາກມະຫາວິທະຍາໄລເອດິນບະຣະຂອງອັງກິດ ແລະ ນັກວິໄຈຈາກໂຮນລັງ (Netherlands) ຮ່ວມກັນເຮັດການທົດລອງເພື່ອຫາຄວາມກ່ຽວຂ້ອງລະຫວ່າງມົນລະພິດໃນອາກາດກັບໂຣກຫົວໃຈ ໂດຍພົບວ່າຝຸ່ນມົນລະພິດຂະໜາດນ້ອຍ (Nanoparticles) ສາມາດທະລຸຜ່ານລະບົບການກັ່ນຕອງຂອງດັງ ແລະ ປອດເຂົ້າສູ່ກະແສເລືອດໄດ້ ເຊິ່ງອາດໄປກະຕຸ້ນໃຫ້ຜູ້ປ່ວຍທີ່ມີໂຣກປະຈຳຕົວຢູ່ແລ້ວອາການໜັກລົງກວ່າເກົ່າ ນັ້ນສະແດງໃຫ້ເຫັນວ່າ ເມື່ອຄຸນນະພາບຂອງອາກາດຫຼຸດລົງມີອັດຕາຂອງຄົນເຂົ້າໂຮງໝໍເພີ່ມຂຶ້ນ ດັ່ງນັ້ນ, ການສູດດົມຝຸ່ນລະອອງທີ່ມີໃນອາກາດເຂົ້າໄປໃນຮ່າງກາຍຈະສົ່ງຜົນເສຍຕໍ່ສຸຂະພາບດັ່ງນີ້:
ຜົນກະທົບຕໍ່ຫົວໃຈ: ມົນລະພິດໃນອາກາດເຮັດໃຫ້ເກີດໂຣກຫົວໃຈວາຍ, ຫົວໃຈເຕັ້ນຜິດຈັງຫວະ, ຫົວໃຈເຕັ້ນແຮງເຕັ້ນໄວຂຶ້ນ, ອັດຕາການເຕັ້ນຂອງຫົວໃຈຫຼຸດລົງ ຕະຫຼອດຮອດມີຄວາມສ່ຽງທີ່ຈະເກີດການຕາຍຈາກພາວະຫົວໃຈຢຸດເຕັ້ນກະທັນຫັນ.
ຜົນກະທົບຕໍ່ປອດ ແລະ ທາງເດີນຫາຍໃຈ: ມົນລະພິດເປັນສາເຫດ ແລະ ປັດໄຈທີ່ເຮັດໃຫ້ເກີດໂຣກກ່ຽວກັບປອດ ແລະ ລະບົບທາງເດີນຫາຍໃຈ, ຫອບຫືດ, ປອດອຸດຕັນຊໍ້າເຮື້ອ ແລະ ມະເຮັງປອດ.
ຜົນກະທົບຕໍ່ສະໝອງ: ການສູດດົມມົນລະພິດທາງອາກາດເປັນໄລຍະເວລາຍາວນານຈະເພີ່ມຄວາມສ່ຽງເຮັດໃຫ້ຫຼອດເລືອດແດງໃນສະໝອງແຂງຕົວ ເຮັດໃຫ້ເກີດໂຣກຄວາມດັນສູງ.
ສະນັ້ນ, ເຮັດແນວໃດປະເທດເຮົາ ຫຼື ໂລກເຮົາຈື່ງຈະມີອາກາດທີ່ບໍລິສຸດ ເຮົາຕ້ອງຮັກສາສີ່ງແວດລ້ອມຊ່ວຍກັນ!
ຮຽບຮຽງບົດ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: bumrungrad, bbc, news.mthai, sanook