ເນື່ອງຈາກ 3-4 ມື້ທີ່ຜ່ານມາເກີດປະເດັນຂ່າວໃນໂລກອອນລາຍນ໌ ຫຼັງຈາກນັກທຸລະກິດຊື່ດັງໂພສຖາມສັງຄົມ ໃນກໍລະນີທີ່ຂັບລົດຈິບຂອງບໍລິສັດຈາກ ສະຫວັນນະເຂດມາທ່າແຂກ ແລ້ວຖືກຕຳຫຼວດປັບໃໝໃນຂໍ້ຫາບໍ່ມີໃບອານຸຍາດແລ່ນລົດ (ໃບສີບົວ) ເຊິ່ງປະເດັນດັ່ງກ່າວເຮັດໃຫ້ສັງຄົມເກີດຄວາມສົນໃຈໃນວົງກວ້າງ.
ສະນັ້ນ, ທາງທີມງານລາວໂພສໄດ້ໂທລະສັບໄປສອບຖາມຂໍ້ມູນກັບທາງກົມຂົນສົ່ງເພື່ອຫາຄຳຕອບມາໃຫ້ທຸກທ່ານ ແລະ ມີພະນັກງານທ່ານໜຶ່ງໃຫ້ຂໍ້ມູນແກ່ພວກເຮົາວ່າ:
- ສຳລັບເອກະສານໃບອະນຸຍາດແລ່ນລົດ (ໃບສີບົວ) ແມ່ນຢັ້ງຢືນລົດແຕ່ລະຄັນທີ່ນຳໃຊ້ເຂົ້າໃນການຂົນສົ່ງຮັບຈ້າງ, ການຂົນສົ່ງສະເພາະ (ລົດຂົນສົ່ງສິນຄ້າ, ຂົນສົ່ງພະນັກງານຂອງບໍລິສັດ ຫຼື ລົດໂດຍສານ)
- ສຳລັບລົດປ້າຍຂາວໂຕໜັງສືສີດຳ (ລົດຜ່ອນ) ຫາກເປັນລົດສ່ວນຕົວ (ດາວມາຂັບສ່ວນຕົວ) ບໍ່ຈຳເປັນຕ້ອງມີໃບອະນຸຍາດແລ່ນລົດ (ໃບສີບົວ), ນອກຈາກ ລົດຄັນດັ່ງກ່າວ ເປັນລົດຂອງບໍລິສັດນຳໃຊ້ເຂົ້າໃນວຽກງານຂົນສົ່ງຮັບຈ້າງ ແລະ ການຂົນສົ່ງສະເພາະ ຕ້ອງມີໃບອະນຸຍາດແລ່ນລົດ (ໃບສິບົວ).
- ສ່ວນລົດປ້າຍຂາວໂຕໜັງສືສີດຳຮັບໃຊ້ວຽກງານບໍລິຫານເຊັ່ນ: ລົດເກັງ, ລົດກະບະ, ລົດຈິບ ເຮັດການຜະລິດທາງອ້ອມ ແມ່ນບໍ່ມີໃບອະນຸຍາດແລ່ນລົດ (ໃບສີບົວ) ພຽງແຕ່ມີໃບທະບຽນລົດ, ປື້ມເຫຼືອງ, ໃບເສຍຄ່າທາງ, ໃບກວດກາເຕັກນິກ, ປະກັນໄພ, ໃບຂັບຂີ່ ເທົ່ານັ້ນ.
ສະຫຼຸບແລ້ວລົດທີ່ໃຊ້ເຂົ້າໃນວຽກງານບໍລິຫານ, ວຽກສ່ວນຕົວທີ່ບໍ່ກ່ຽວຂ້ອງກັບການຂົນສົ່ງໃດໆແມ່ນບໍ່ມີໃບອະນຸຍາດແລ່ນລົດ (ໃບສີບົວ) ເຖິງວ່າລົດຄັນນັ້ນຈະນຳໃຊ້ປ້າຍຂາວໂຕໜັງສືສີດຳກໍ່ຕາມ.
ນອກຈາກນີ້ທາງກົມຂົນສົ່ງຍັງໄດ້ຕອບຄຳຖາມກ່ຽວກັບຜູ້ທີ່ຂັບລົດ ປ້າຍສີຂາວໂຕໜັງສືສີຟ້າ (ລົດປ້າຍທຸລະກິດ 1%), ລົດປ້າຍສີຟ້າໂຕໜັງສືສີຂາວ (ລົດປ້າຍກະຊວງ) ແລະ ລົດປ້າຍເຫຼືອງ. ສຳລັບຜູ້ທີ່ນຳໃຊ້ລົດ 3 ປະເພດນີ້ກໍ່ບໍ່ຈຳເປັນຕ້ອງມີໃບອະນຸຍາດແລ່ນລົດ (ໃບສີບົວ) ຫຼື ເອກະສານອື່ນ ພຽງແຕ່ມີໃບທະບຽນລົດ, ປື້ມເຫຼືອງ, ໃບເສຍຄ່າທາງ, ໃບກວດກາເຕັກນິກ, ປະກັນໄພ, ໃບຂັບຂີ່ ເທົ່ານັ້ນ.
ປັດຈຸບັນ, ກົມຂົນສົ່ງໄດ້ສົມທົບກັບກົມນິຕິກຳກະຊວງກຳລັງລົງເຜີຍແຜ່ກົດໝາຍວ່າດ້ວຍການຂົນສົ່ງທາງບົກ ຢູ່ບັນດາແຂວງພາກເໜືອ, ພາກກາງ ແລະ ແຂວງພາກໃຕ້ ກໍ່ໄດ້ເນັ້ນບັນຫານີ້ເປັນພິເສດເພື່ອໃຫ້ເຈົ້າໜ້າທີ່ກວດກາເຂົ້າໃຈເປັນເອກະພາບກັນໃນຂອບເຂດທົ່ວປະເທດ.
ຮຽບຮຽງບົດ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ກົມຂົນສົ່ງ