ສະຖາບັນ ISEAS ອົງການກ່ຽວຂ້ອງກັບລັດຖະບານສິງກະໂປ ເປີດເຜີຍຜົນການສໍາຫຼວດຄວາມຄິດເຫັນປະຊາກອນໃນພາກພື້ນອາຊີຕາເວັນອອກສຽງໃຕ້ (ອາຊຽນ) 1.008 ຄົນ ລວມທັງນັກວິຊາການ, ນັກສຶກສາ. ນັກທຸລະກິດ, ພະນັກງານ ແລະ ສື່ມວນຊົນ ພົບວ່າຜູ້ຕອບແບບສອບສໍາຫຼວດສ່ວນໃຫຍ່ 70% ມີຄວາມເປັນຫ່ວງກັງວົນເຖິງການເຈລະຈາລະຫວ່າງລັດຖະບານຂອງປະເທດຕົນ ກັບ ສປ ຈີນ ຕາມນະໂຍບາຍ “ໜຶ່ງແລວທາງ ໜຶ່ງເສັ້ນທາງ” (One Belt One Road) ຂອງ ສປ ຈີນ ທີ່ອາດຈະເຮັດໃຫ້ປະເທດຊາດຕ້ອງຕິດກັບດັກໜີ້ ຈາກການຮ່ວມລົງທຶນກັບນັກທຸລະກິດ ຈີນ ເຊິ່ງຄວາມເຊື່ອ ແລະ ທັດສະນະຄະຕິທີ່ຫຼາຍທີ່ສຸດຢູ່ໃນມາເລເຊຍ, ຟິລິບປິນ ແລະ ໄທ.
ຈໍານວນຜູ້ຕອບແບບສໍາຫຼວດ 73% ເຫັນວ່າ:”ຈີນ ພະຍາຍາມສ້າງອິດທິພົນທາງເສດຖະກິດ ແລະ ດໍາເນີນຍຸດທະສາດດ່ານເມືອງໃນພາກພື້ນອາຊີຕາເວັນອອກສ່ຽງໃຕ້ ຫຼາຍກວ່າອາເມລິກາ” ນອດຈາກນັ້ນ, 70% ເຫັນດີໃຫ້ ລັດຖະບານ ຂອງຕົນເພີ່ມຄວາມລະມັດລະວັງໃນການເຈລະຈາກັບ ຈີນ, ປະມານ 60% ເຫັນວ່າ: ‘ໃນປີຜ່ານມາ, ອິດທິພົນຂອງ ອາເມລິກາ ໃນພາກພື້ນອາຊີຕາເວັນອອກສ່ຽງໃຕ້ ເສື່ອມລົງຫຼາຍ” ແລະ 1 ໃນ 3 ຂອງຜູ້ຕອບແບບສຳຫຼວດເຊື່ອໝັ້ນຕໍ່ ອາເມລິກາ ໃນຖານະຫຸ້ນສ່ວນດ້ານຄວາມໝັ້ນຄົງໃນພາກພື້ນ. ຜູ້ສໍາຫຼວດຍັງຕ້ອງການໃຫ້ປະເທດອາຊຽນ ເພີ່ມບົດບາດການເປັນຄົນກາງໃນການເຈລະຈາປັນຫາ ໂຣຮິນຈາ ໃນປະເທດມຽນມາ ຫຼາຍກວ່າການພະຍາຍາມກົດດັນທາງການທູດຕໍ່ ມຽນມາ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: thairath.co.th