ເນື່ອງຈາກຝົນຕົກໜັກເປັນເວລາ 2 ວັນ ນັບຕັ້ງແຕ່ວັນທີ 6-8 ມັງກອນ 2019 ທີ່ຜ່ານມາ ເຮັດໃຫ້ເກີດນໍ້າຖ້ວມບ້ານ ງາຍເໜືອ ເມືອງ ບຸນເໜືອ ແລະ ບ້ານ ຫາດສາ ເມືອງ ຜົ້ງສາລີ ແຂວງ ຜົ້ງສາລີ.
ທາງທີມງານລາວໂພສໄດ້ໂທໄປສອບຖາມຂໍ້ມູນກັບພາກສ່ວນທີ່ຮັບຜິດຊອບສັງລວມຂໍ້ມູນເບື້ອງຕົ້ນ ໂດຍພະແນກແຮງງານແຂວງຜົ້ງສາລີໄດ້ໃຫ້ຂໍ້ມູນວ່າ ໃນໄລຍະ 2 ວັນທີ່ຜ່ານມາ ແຂວງຜົ້ງສາລີເກີດມີຝົນຕົກແຮງ ແລະ ມີ 2 ບ້ານທີ່ເກີດນໍ້າຖ້ວມຄບ້ານ ງາຍເໜືອ ແລະ ບ້ານ ຫາດສາ, ທາງເຈົ້າໜ້າທີ່ບອກໃຫ້ຮູ້ວ່າ ທັງ 2 ບ້ານນີ້ເປັນບ້ານທີ່ຕິດກັບສາຍນໍ້າ ບ້ານ ງາຍເໜືອແມ່ນຕິດກັບຂົວນໍ້າລົ້ນ, ບ້ານ ຫາດສາ ຕິດແຄມນໍ້າອູ ຄາດວ່າຫຼັງຈາກຝົນຕົກແຮງໃນໄລຍະ 2 ມື້ທີ່ຜ່ານມາ ເຮັດໃຫ້ປະລິມານນໍ້າເພີ່ມສູງຂຶ້ນ ແລະ ໄຫລເຂົ້າສູ່ຂົງເຂດທີ່ປະຊາຊົນອາໄສຢູ່.
ທ່ານ ບຸນເຫລັກ ຫລ້າສຸກັນ, ຮອງເຈົ້າເມືອງ ເມືອງບຸນເໜືອ, ແຂວງ ຜົ້ງສາລີ ໃຫ້ຮູ້ວ່າ ຍ້ອນຝົນຕົກໜັກນັບແຕ່ວັນທີ 6 ຫາ 8 ມັງກອນ 2018 ໄດ້ເຮັດໃຫ້ລະດັບຂອງນໍ້າງາຍຢູ່ເມືອງ ບຸນເໜືອ, ແຂວງ ຜົ້ງສາລີ ຍີ່ງຂຶ້ນສູງແລ້ວໄຫລຊຸເຂົ້າເນື້ອທີ່ທຳການຜະລິດຂອງປະຊາຊົນ ບ້ານງາຍເໜືອ ທີ່ຢູ່ລຽບຕາມນ້ຳງາຍ ເສຍຫາຍໄປ 4 ຄອບຄົວ ຕາມຂໍ້ມູນທີ່ເກັບກໍາໄດ້ໃນເບື້ອງຕົ້ນ, ຜົນເສຍຫາຍທີ່ເກີດຂຶ້ນ ມີ ຟືນ 8 ແມັດກ້ອນ, ເນື້ອທີ່ປູກຜັກທຽມ ແລະ ສັດປີກຈຳນວນໜຶ່ງ ແຕ່ຍັງບໍ່ມີລາຍງານຜູ້ເສຍຊີວິດ ແລະ ໄດ້ຮັບບາດເຈັບຈາກເຫດການໃນຄັ້ງນີ້.
ສຳລັບບ້ານ ຫາດສາ ກໍ່ເຊັ່ນດຽວກັນ ອາດມີເຮືອນທີ່ຢູ່ຕໍ່າຕິດແຄມນໍ້າທີ່ໄດ້ຮັບຜົນກະທົບ. ທາງພະແນກແຮງງານແຂວງ ຜົ້ງສາລີ ກ່າວວ່າໃນປັດຈຸບັນ ຍັງຢູ່ໃນການລົງຕິດຕາມກວດກາ ແລະ ປະເມີນຄວາມເສຍຫາຍ ທາງອົງການປົກຄອງເມືອງ ໄດ້ສົ່ງພະນັກ ງານວິຊາການກ່ຽວຂ້ອງລົງເກັບກຳຂໍ້ມູນລະອຽດເພື່ອຊ່ວຍເຫຼືອປະຊາຊົນທີ່ໄດ້ຮັບຜົນກະທົບຕາມຄວາມສາມາດຕົວຈິງ ແລະ ສະ ພາບອາກາດແຂວງຜົ້ງສາລີໃນຕອນນີ້ຝົນໄດ້ເຊົາຕົກແລ້ວເຮັດໃຫ້ສະພາບກັບຄືນສູ່ພາວະປົກກະຕິ.
ຮຽບຮຽງຂ່າວ:ບຸດສະດີ ສາຍນໍ້າມັດ
ແຫຼ່ງຂໍ້ມູນ: ພະແນກແຮງງານແຂວງ ຜົ້ງສາລີ ແລະ Lao National Radio