ຕາມການສໍາຫຼວດຂອງ ກະຊວງແຜນການ ແລະ ການລົງທຶນ ພົບກອງທຶນບ້ານທັງໝົດ 4 ພັນກວ່າແຫ່ງທົ່ວປະເທດຍັງບໍ່ໄດ້ຮັບການຄຸ້ມຄອງໂດຍກົງຈາກ ທະນາຄານແຫ່ງ ສປປ ລາວ (ທຫລ). ປັດຈຸບັນ, ປະຕິບັດສໍາເລັດແລ້ວ 6 ຮ້ອຍກວ່າແຫ່ງ. ຂະນະທີ່ ທຫລ ໄດ້ວາງຍຸດທະສາດຮອດປີ 2025 ຈະສ້າງຈໍານວນກອງທຶນບ້ານທັງໝົດໃຫ້ມີຄວາມເຂັ້ມແຂງໄດ້ຕາມມາດຕະຖານຂອງ ທຫລ ໂດຍຈະມີການເຝິກອົບຮົມ ແລະ ອື່ນໆ.
ອີງຕາມບົດລາຍງານຂອງ ທຫລ ລາຍງານຕໍ່ກອງປະຊຸມສະພາແຫ່ງຊາດວ່າ: ຈາກການສໍາຫຼວດຂອງ ກະຊວງແຜນການ ແລະ ການລົງທຶນປີ 2013 ມີ 4 ພັນກວ່າແຫ່ງ ປັດຈຸບັນ, ທຫລ ບໍ່ໄດ້ຄຸ້ມຄອງໂດຍກົງ ເນື່ອງຈາກບັນດາກອງທຶນບ້ານໄດ້ສ້າງຕັ້ງຂຶ້ນເອງໂດຍມີຜູ້ໃຫ້ທຶນເປັນຫຼັກຄື: ສະຫະພັນແມ່ຍິງລາວ, ແນວລາວສ້າງຊາດ ແລະ ການຄຸ້ມຄອງບໍລິຫານກອງທຶນດ່ັງກ່າວໄດ້ສ້າງລະບຽບຂຶ້ນມາເອງ.
ເພື່ອຊ່ວຍໃຫ້ກອງທຶນດັ່ງກ່າວ, ມີການຄຸ້ມຄອງບໍລິຫານທີ່ຖືກຕ້ອງຕາມຂໍ້ກໍານົດຂອງ ທຫລ ໄປເທື່ອລະກ້າວ, ທາງ ທຫລ ໄດ້ຮ່ວມກັບອົງການຊ່ວຍເຫຼືອຈາກຕ່າງປະເທດໃຫ້ການຊ່ວຍເຫຼືອກອງທຶນບ້ານຫຼາຍກວ່າ 648 ແຫ່ງ ເຊິ່ງມີການເຝິກອົບຮົມໂດຍກົງ ແລະ ເຝິກອົບຮົມຜ່ານສະຖາບັນການເງິນທີ່ເປັນເຄືອຂ່າຍໃນໜ້າວຽກຄຸ້ມຄອງບໍລິຫານ, ບັນຊີ, ສິນເຊື່ອ, ກວດກາ, ຊ່ວຍຕິດຕັ້ງໂປແກຣມບັນຊີຕາມມາດຕະຖານຂອງ ທຫລ. ພ້ອມນັ້ນ, ທຫລ ໄດ້ກໍານົດແຜນຍຸດທະສາດຮອດປີ 2025 ຈະສາມາດຜ່ານການເຝິກອົບຮົມວຽກງານດັ່ງກ່າວ ເພື່ອສ້າງຄວາມເຂັ້ມແຂງໃຫ້ແກ່ກອງທຶນບ້ານໃຫ້ໄດ້ຕາມການຄຸ້ມຄອງຂອງ ທຫລ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມເສດຖະກິດ-ສັງຄົມ
ຮູບພາບຈາກ: ຂ່າວສານຫຼວງພະບາງ