ລັດຖະບານຍີ່ປຸ່ນ ມີນະໂຍບາຍໃນການເກັບພາສີຂາອອກສໍາລັບນັກທ່ອງທ່ຽວ ແລະ ນັກທຸລະກິດທຸກສັນຊາດ 1.000 ເຢນ ຫຼື 77.660 ກີບ/ຄົນ ໂດຍມີຜົນເລີ່ມບັງຄັບໃຊ້ຢ່າງເປັນທາງການແລ້ວ ແຕ່ຍົກເວັ້ນຜູ້ໂດຍສານທີ່ລົງປ່ຽນຖ້ຽວບິນຢູ່ຍີ່ປຸ່ນພາຍໃນເວລາບໍ່ເກີນ 24 ຊົ່ວໂມງ. ປີ 2019 ຍີ່ປຸ່ນ ຕັ້ງເປົ້າເກັບພາສີດັ່ງກ່າວໃຫ້ໄດ້ 50.000 ລ້ານເຢນ ຫຼື 3.883.000 ລ້ານກີບ ເພື່ອການພັດທະນາໂຄງສ້າງພື້ນຖານດ້ານການທ່ອງທ່ຽວ.
ສໍານັກຂ່າວຕ່າງປະເທດລາຍງານຈາກ ນະຄອນຫຼວງໂຕກຽວ ປະເທດຍີ່ປຸ່ນ ວັນທີ 7 ມັງກອນ 2019 ວ່າ ສໍານັກງານນາຍົກລັດຖະມົນຕີ ຍີ່ປຸ່ນ ອອກຖະແຫຼງການ ກ່ຽວກັບການເກັບພາສີຂາອອກສໍາລັບນັກທ່ອງທ່ຽວ ແລະ ນັກທຸລະກິດທຸກຄົນ (ອາຍຸ 2 ປີຂຶ້ນໄປ) ບໍ່ວ່າຈະຖືສັນຊາດໃດກໍຕາມ ພາສີດັ່ງກ່າວມີຊື່ວ່າ: “ພາສີຊາໂຍນາຣະ” ຫຼື ຄ່າທໍານຽນອອກນອກປະເທດ ດ້ວຍອັດຕາ 1.000 ເຢນ ຫຼື 77.660 ກີບ/ຄົນ ມີຜົນບັງຄັບໃຊ້ເປັນທາງການແລ້ວ ເຊິ່ງລາຄາດັ່ງກ່າວຈະລວມຢູ່ໃນບັດໂດຍສານຖ້ຽວບິນໂດຍອັດຕະໂນມັດ ແຕ່ຍົກເວັ້ນຜູ້ໂດຍສານທີ່ລົງປ່ຽນຖ້ຽວບິນຢູ່ຍີ່ປຸ່ນພາຍໃນເວລາບໍ່ເກີນ 24 ຊົ່ວໂມງ.
ທັງນີ້, ນາຍົກລັດຖະມົນຕີ ຊິນໂຊ ອາເບະ ໄດ້ຕັ້ງເປົ້າໝາຍເກັບພາສີດັ່ງກ່າວ, ໃນປີນີ້ 2019 ໃຫ້ໄດ້ 50.000 ລ້ານເຢນ ຫຼື 3.883.000 ລ້ານກີບ ຂອງແຜນງົບປະມານ ເພື່ອພັດທະນາໂຄງສ້າງພື້ນຖານດ້ານການທ່ອງທ່ຽວທີ່ກ່ຽວຂ້ອງ ເຊັ່ນ: ການປະຕິຮູບລະບົບກວດຄົນເຂົ້າເມືອງ ແລະ ການປະຕິຮູບກະແສທ່ອງທ່ຽວເມືອງ. ອີງຕາມສະຖິຕິນັກທ່ອງທ່ຽວຕ່າງປະເທດທີ່ເຂົ້າມາ ຍີ່ປຸ່ນ ໃນປີຜ່ານມາຫຼາຍກວ່າ 30 ລ້ານຄົນ ສູງທີ່ສຸດເປັນປະຫວັດສາດ ພ້ອມນັ້ນ, ລັດຖະບານ ຍີ່ປຸ່ນໄດ້ຕັ້ງເປົ້າຫວັງຈະດຶງດູດນັກທ່ອງທ່ຽວໃຫ້ໄດ້ 40 ລ້ານຄົນພາຍໃນປີ 2020 ເຊິ່ງເປັນປີທີີ ນະຄອນຫຼວງໂຕກຽວເປັນເຈົ້າພາບການແຂ່ງຂັນ ໂອລິມປິກ ແລະ ຖືກກັບລະດູຮ້ອນພໍດີ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: dailynews.co.th, posttoday.com
ຮູບພາບຈາກ: posttoday.com