ກົດໝາຍໃໝ່ ອາຣັບບີ ຊາອຸດິດ ກ່ຽວກັບການຢ່າຮ້າງຂອງຄູ່ແຕ່ງງານ ເພື່ອຢຸດພາວະທີ່ແມ່ຍິງ ອາຣັບບີ ຊາອຸດິດ ຖືກຝ່າຍຊາຍຍື່ນຈົດທະບຽນຢ່າຮ້າງໂດຍບໍ່ຮູ້ຕົວ ເລີ່ມບັງຄັບໃຊ້ໃນວັນນີ້ ກຳນົດໃຫ້ສານຕ້ອງສົ່ງຂໍ້ຄວາມແຈ້ງການຢ່າຮ້າງຕໍ່ແມ່ຍິງໃຫ້ຮັບຮູ້ສະຖານະສົມຣົດຂອງຕົນເອງ.
ທະນາຍຄວາມຍິງໃນ ອາຣັບບີ ຊາອຸດິດ ບອກວ່າ ວິທີການນີ້ຈະຊ່ວຍຢຸດຕິພຶດຕິກຳທີ່ຮຽກວ່າ “ຢ່າຮ້າງແບບລັບໆ” ທີ່ຝ່າຍຊາຍມັກຈະຂໍຢຸດຕິຊີວິດການແຕ່ງງານໂດຍບໍ່ບອກໃຫ້ຜູ້ເປັນເມຍຂອງຕົນເອງຮູ້, ຂະນະດຽວກັນແມ່ນຈະຊ່ວຍໃຫ້ແມ່ຍິງ ອາຣັບບີ ຊາອຸດິດ ຄຳນຶງເຖິງສະຖານະການສົມຣົດຂອງຕົນເອງຫຼາຍຂຶ້ນ ແລະ ຊ່ວຍປົກປ້ອງສິດຂອງພວກນາງ ເຊັ່ນ: ການຮຽກຮ້ອງຄ່າລ້ຽງດູຈາກອີກຝ່າຍ.
ເມື່ອປີທີ່ຜ່ານມາ ອາຣັບບີ ຊາອຸດິດ ໄດ້ຍົກເລີກກົດຫ້າມແມ່ຍິງຂັບລົດ ເຊິ່ງມີຜົນບັງຄັບໃຊ້ໃນເດືອນ ມິຖຸນາ 2018 ຢ່າງໃດກໍ່ຕາມແມ່ຍິງ ອາຣັບບີ ຊາອຸດິດ ຍັງຄົງຢູ່ພາຍໃຕ້ກົດໝາຍທີ່ຮຽກວ່າ “ກົດໝາຍການຄຸ້ມຄອງແບບຜູ້ຊາຍ” ໂດຍທີ່ຜ່ານມາມີແມ່ຍິງຫຼາຍຄົນຍື່ນຄຳຮ້ອງຕໍ່ສານວ່າພວກນາງຖືກຝ່າຍຊາຍຢ່າຮ້າງໂດຍບໍ່ໄດ້ຮັບການແຈ້ງເຕືອນລ່ວງໜ້າ.
ມາດຕະການໃໝ່ນີ້ເປັນສ່ວນໜຶ່ງຂອງແຜນການປະຕິຮູບເສດຖະກິດ ແລະ ສັງຄົມພາຍໃນ ທີ່ຜັກດັນໂດຍ ມົງກຸດຣາຊາກຸມານ ໂມຣຳເໝັດ ບິນ ຊັລມານ ເຊິ່ງທີ່ຜ່ານມາມີການຜ່ອນຄາຍກົດເກນທີ່ເຂັ້ມງວດຕໍ່ແມ່ຍິງ ອາຣັບບີ ຊາອຸດິດ ຫຼາຍຢ່າງເຊັ່ນ: ການອະນຸຍາດໃຫ້ແມ່ຍິງເຂົ້າເບິ່ງການແຂ່ງຂັນກີລາໃນສະໜາມບາງແຫ່ງໄດ້ ແລະ ອະນຸຍາດໃຫ້ແມ່ຍິງເຮັດວຽກທີ່ໃນອະດີດອະນຸຍາດໃຫ້ແຕ່ສະເພາະຜູ້ຊາຍເຮັດວຽກໄດ້ເທົ່ານັ້ນ.
ແຕ່ຍັງມີຫຼາຍໆເລື່ອງທີ່ແມ່ຍິງ ອາຣັບບີ ຊາອຸດິດ ບໍ່ສາມາດເຮັດໄດ້ຫາກບໍ່ໄດ້ຮັບອະນຸຍາດຈາກຜູ້ປົກຄອງທີ່ເປັນຜູ້ຊາຍຢ່າງ ພໍ່, ອ້າຍ ແລະ ຜົວ ຫຼື ແມ່ນແຕ່ລູກຊາຍກໍ່ຕາມ ເລື່ອງເຫຼົ່ານັ້ນໄດ້ແກ່: ການມີໜັງສືເດີນທາງ, ການທ່ອງທ່ຽວໃນຕ່າງປະເທດ, ການແຕ່ງງານ, ການເປີດບັນຊີທະນາຄານ, ການສັນຍະກຳ, ການອອກຈາກຄຸກ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: khaosod