ພາຍຫຼັງ, ກະຊວງອຸດສາຫະກໍາ ແລະ ການຄ້າ ໄດ້ເປີດສາຍດ່ວນປົກປ້ອງຜູ້ຊົມໃຊ້ 1510 ເພື່ອໃຫ້ມວນຊົນໂທເຂົ້າແຈ້ງບັນຫາທີ່ຖືກເອົາປຽບທາງການຄ້າ ໄດ້ 4 ປີແລ້ວ ໂດຍສະເພາະປີ 2018 ຜ່ານມາ, ມີປະຊາຊົນໂທເຂົ້າມາຮ້ອງຮຽນສາຍດ່ວນເຖິງ 64 ສາຍ, ເຂົ້າມາຮ້ອງທຸກດ້ວຍຕົນເອງ 2 ກໍລະນີ. ປີນີ້, ຈະມີການເປີດເວັບໄຊສ໌ປົກປ້ອງຜູ້ຊົມໃຊ້ ເພື່ອຂະຫຍາຍຊ່ອງທາງການແຈ້ງຂໍ້ມູນໄດ້ງ່າຍຂຶ້ນ.
ທ່ານ ບຸນທຽນ ແກ້ວສິພາ ຫົວໜ້າກົມການຄ້າພາຍໃນ ກະຊວງອຸດສາຫະກໍາ ແລະ ການຄ້າ ກ່າວວ່າ: ສາຍດ່ວນ 1510 ເປັນເຄື່ອງມືໜຶ່ງໃນການປົກປ້ອງຜູ້ຊົມໃຊ້ ເຊິ່ງໄດ້ເປີດຕົວເປັນທາງການໃນວັນທີ 7 ມິຖຸນາ 2016, ຢູ່ພະແນກປົກປ້ອງຜູ້ຊົມໃຊ້ ແລະ ສົ່ງເສີມການແຂ່ງຂັນ. ກົມການຄ້າພາຍໃນ ກະຊວງອຸດສາຫະກໍາ ແລະ ການຄ້າ ເພີ່ມຊ່ອງທາງໃນການຮັບຄໍາຮ້ອງທຸກຂອງຜູ້ຊົມໃຊ້ທີ່ໄດ້ຮັບຜົນກະທົບທາງລົບຈາກການຊົມໃຊ້ສິນຄ້າ ແລະ ການບໍລິການ ເພື່ອເຮັດໃຫ້ຜູ້ຊົມໃຊ້ເຂົ້າເຖິງຂະບວນການແກ້ໄຂຂໍ້ຂັດແຍ້ງ ຫຼື ຄໍາຮ້ອງທຸກງ່າຍຂຶ້ນ ໃນການຮັບແຈ້ງຂໍ້ມູນກັບສິນຄ້າ ແລະ ການບໍລິການນອກລະບົບ.
ຕົ້ນປີນີ້, ກົມການຄ້ານພາຍໃນ ຈະເປີດຕົວເວັບໄຊສ໌ປົກປ້ອງຜູ້ຊົມໃຊ້ ເພື່ອໃຫ້ປະຊາຊົນສາມາດຮ້ອງທຸກຜ່ານຊ່ອງທາງອິນເຕີເນັດ ຈະບໍ່ມີແຕ່ຜູ້ຊົມໃຊ້ພາຍໃນປະເທດເທົ່ານັ້ນ ຍັງມີຕ່າງປະເທດອີດດ້ວຍທີ່ອາດຈະພົບບັນຫາໃນການຊົມໃຊ້ສິນຄ້າ ແລະ ການບໍລິການຢູ່ປະເທດເຮົາ. ສໍາລັບປີ 2018 ມີປະຊາຊົນໂທເຂົ້າຫາສາຍດ່ວນທັງໜົດ 64 ສາຍ ແລະ ມາຮ້ອງທຸກໂດຍກົງ 2 ກໍລະນີ ລວມເປັນ 66 ກໍລະນີ, ໄດ້ແກ້ໄຂແລ້ວ 22 ກໍລະນີ, ກໍາລັງສະເໜີ 34 ກໍລະນີ (ໄດ້ສົ່ງສະໂນດນໍາສົ່ງພາກສ່ວນກ່ຽວຂ້ອງລໍຖ້າແກ້ໄຂ) ເປັນການແຈ້ງຂໍ້ມູນ 3 ກໍລະນີ ແລະ ບໍ່ສາມາດດໍາເນີນຄະດີໄດ້ 7 ກໍລະນີ.
ຮຽບບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: laoedaily.com.la