ນັບຈາກນີ້ໄປເຖິງ 2025 ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ຈະສູ້ຊົນຂຶ້ນທະບຽນ ແລະ ອອກໃບຕາດິນໃນຂອບເຂດທົ່ວປະເທດໃຫ້ສໍາເລັດ ແລະ ໃຫ້ໄດ້ 5% ຂອງ GDP ເພື່ອປະກອບສ່ວນເຂົ້າໃນການສ້າງລາຍຮັບແຫ່ງຊາດ. ຂະນະທີ່ສອງປີຜ່ານມາບັນລຸໄດ້ພຽງແຕ່ 0,8% ຂອງລາຍຮັບແຫ່ງຊາດ.
ຕາມການລາຍງານຂອງທ່ານ ລັດຖະມົນຕີກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ຕໍ່ກອງປະຊຸມສະໄໝສາມັນເທື່ອທີ6 ຂອງສະພາແຫ່ງຊາດ ຊຸດທີ VIII ທີ່ສໍາເລັດທ້າຍປີ 2018 ວ່າ: ແຕ່ປີ 2016 ເຖິງປັດຈຸບັນ ທົ່ວປະເທດສາມາດຂຶ້ນທະບຽນໃບຕາດິນໄດ້ແລ້ວ 332.000 ຕອນ ເທົ່າກັບ 72,2% ຂອງຄາດໝາຍທີ່ວາງໄວ້ ໃນນັ້ນ, ສະເພາະ 11 ເດືອນຂອງປີ 2018 ສາມາດປະຕິບັດໄດ້ 92.242 ຕອນ ເທົ່າກັບ 92,2% ຂອງແຜນການປີວາງໄວ້ ຈໍານວນ 1 ແສນຕອນ.
ໃນປີ 2017 ລາຍຮັບຈາກທີ່ດິນບັນລຸໄດ້ພຽງແຕ່ 0,8% ຂອງລາຍຮັບແຫ່ງຊາດ ດັ່ງນັ້ນ, ການສູ້ຊົນຂຶ້ນທະບຽນທີ່ຈະເປັນສ່ວນສໍາຄັນໃນການເກັບລາຍຮັບຂອງຊາດ ແລະ ຈະຊ່ວຍແກ້ໄຂຂໍ້ຂັດແຍ່ງຈາກທີ່ດິນໃຫ້ຫຼຸດຜ່ອນລົງ. ສໍາລັບແຜນແຕ່ນີ້ຮອດປີ 2025 ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ຈະສູ້ຊົນເຮັດໃຫ້ສໍາເລັດການຂຶ້ນທະບຽນ ແລະ ອອກໃບຕາດິນໃນຂອບເຂດທົ່ວປະເທດ ເພື່ອປະກອບສ່ວນເຂົ້າໃນການສ້າງລາຍຮັບແຫ່ງຊາດໃຫ້ບັນລຸ 5% ຂອງ GDP.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: laophattananews.com