ສຳນັກຂ່າວຕ່າງປະເທດລາຍງານຈາກນະຄອນໄທເປ ສາທາລະນະລັດຈີນ (ໄຕ້ຫວັນ) ເມື່ອວັນທີ 6 ມັງກອນ 2019 ປະທານາທິ ບໍດີ ດີໄຊ່ ອິງ ເຫວິນ ກ່າວເມື່ອວັນເສົາທີ່ຜ່ານມາວ່າ ໃນຂະນະທີ່ລັດຖະບານໄຕ້ຫວັນກຳລັງພະຍາຍາມຢ່າງສຸດຄວາມສາມາດໃນການຮັກສາຄວາມສຳພັນໃຫ້ເປັນໄປຢ່າງສັນຕິ ຫຼີກລ່ຽງການປະເຊີນໜ້າ ແລະ ການສື່ສານທີ່ຜິດພາດ ແລະ ຄາດເຄື່ອນ ແຕ່ທ່າທີຂອງລັດຖະບານຈີນ ກັບ “ບໍ່ມີປະໂຫຍດ” ແລະ ຂັດແຍ້ງກັບຫຼັກການປະຊາທິປະໄຕຂັ້ນພື້ນຖານທີ່ສຸດ.
ດ້ວຍເຫດນີ້ ທ່ານ ນາງ ດີໄຊ່ ອິງ ເຫວິນ ຈິ່ງຫວັງຢ່າງຍິ່ງວ່າ ປະຊາຄົມໂລກຈະເພີ່ມຄວາມສຳຄັນກັບເລື່ອງນີ້ ດ້ວຍການສະໜັບ ສະໜູນໄຕ້ຫວັນຫຼາຍຂຶ້ນ, ຂະນະດຽວກັນ ຜູ້ນຳຂອງໄຕ້ຫວັນຍັງຮຽກຮ້ອງໃຫ້ຈີນ “ທຳຄວາມເຂົ້າໃຈ” ກັບຄວາມຄິດ ແລະ ຄວາມຕ້ອງການຂອງໄຕ້ຫວັນ ເພື່ອຫຼຸດຄວາມເຄັ່ງຮ້ອນຂອງຄວາມສຳພັນຂ້າມຊ່ອງແຄມ (ຄວາມສຳພັນຈີນ-ໄຕ້ຫວັນ)
ທັງນີ້, ປະເດັນດັ່ງກ່າວຖືເປັນໜຶ່ງໃນ “ເລື່ອງອ່ອນໄຫວທີ່່ສຸດ” ສຳລັບຈີນ ໂດຍຄຳຖະແຫຼງຂອງທ່ານ ນາງ ດີໄຊ່ ອິງ ເຫວິນ ມີຂຶ້ນຫຼັງປະທານາທິບໍດີ ສີ ຈິ້ນ ຜິງ ກ່າວເມື່ອອາທິດທີ່ຜ່ານມາວ່າ ຄວາມພະຍາຍາມປະກາດຕົວເປັນອິດສະຫຼະຂອງໄຕ້ຫວັນນັ້ນ “ບໍ່ມີຜົນປະໂຫຍດ” ຢ່າງໃດກໍ່ຕາມ ທ່ານ ສີ ຈິ້ນ ຜິງ ກ່າວວ່າລັດຖະບານຈີນ ມີຄວາມຈິງໃຈຕໍ່ການລວມຄວາມສຳພັນຂ້າມຊ່ອງແຄບ (ຄວາມສຳພັນຈີນ-ໄຕ້ຫວັນ) ໃຫ້ເປັນໜຶ່ງດຽວເພື່ອຜົນປະໂຫຍດຮ່ວມກັນທັງສອງຝ່າຍ ທາງການຈີນພ້ອມໃຊ້ມາດຕະການທາງທະຫານຕໍ່ບາງກຸ່ມຄົນທີ່ພະຍາຍາມປຸກລະດົມແນວຄິດແບ່ງແຍກດິນແດນ ແລະ ເພື່ອປ້ອງກັນການແຊກແຊງຈາກພາຍນອກ ໂດຍຢືນຢັນວ່າມາດຕະການທາງທະຫານຂອງຈີນບໍ່ເຄີຍມຸ່ງເປົ້າໄປທີ່ “ເພື່ອນຮ່ວມຊາດ” ແລະ ຮຽກຮ້ອງໃຫ້ອີກຝ່າຍຍອມຮັບແນວທາງການບໍລິຫານແບບ “ໜຶ່ງປະເທດ ສອງລະບົບ” ຄືແບບຮ່ອງກົງ ແລະ ມາເກົ໊າ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: dailynews