ລັດຖະບານ ໄດ້ກໍານົດການສົ່ງເສີມການພັດທະນາສີມືແຮງງານ ໃຫ້ກັບແຮງງານຂຶ້ນໃໝ່ໃຫ້ໄດ້ 658.080 ຄົນ ພາຍໃນປີ 2020 ໃນນັ້ນ, ຂົງເຂດກະສິກໍາໃຫ້ໄດ້ 510.521 ຄົນ, ອຸດສາຫະກໍາ 52.004 ຄົນ ແລະ ຂົງເຂດບໍລິການ 95.555 ຄົນ ພ້ອມທັງ, ຈະສ້າງມາດຕະຖານສີມືແຮງງານໃຫ້ໄດ້ 25 ສາຂາວິຊາຊີບ, ເຮັດການທົດສອບ-ອອກແບບໃບຢັ້ງຢືນໃຫ້ໄດ້ 21 ສາຂາວິຊາຊີບ, ທັງໝົດເພື່ອເປັນການຮອງຮັບຄວາມຕ້ອງການຂອງຕະຫຼາດແຮງງານໃນອະນາຄົດ. ຂະນະທີີ່ປີ 2018 ທົ່ວປະເທດສາມາດສ້າງແຮງງານທີ່ມີສີມືໃໝ່ໄດ້ 1,05 ແສນຄົນ.
ທ່ານ ຄອນສີ ມະຫາວົງ ຮອງຫົວໜ້າກົມພັດທະນາສີມືແຮງງານ ແລະ ຈັດຫາງານ ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ສະເໜີຕໍ່ກອງປະຊຸມສໍາມະນາສົ່ງເສີມການພັດທະນາສີມືແຮງງານ ແລະ ຈັດຫາງານ ໃນວັນທີ 4 ມັງກອນ 2019 ວ່າ: ເພື່ອເປັນການສົ່ງເສີມພັດທະນາສີມືແຮງງານໃຫ້ກັບແຮງງານທີ່ເພີ່ມຂຶ້ນໃໝ່ໃຫ້ບັນລຸ 658.080 ຄົນ ຕາມແຜນພັດທະນາແຮງງານ ແລະ ສະຫວັດດີການສັງຄົມ 5 ປີ ຄັ້ງທີ IV (2016-2020) ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ຂອງລັດຖະບານ, ກົມພັດທະນາສີມືແຮງງານ ແລະ ຈັດຫາງານກະຊວງ ຮສສ ຈະສືບຕໍ່ປັບປຸງ, ສ້າງນິຕິກໍາ ແລະ ລະບຽບການດ້ານແຮງງານຈໍານວນໜຶ່ງ ໃຫ້ສອດຄ່ອງກັບນິຕິກໍາຂອງພາກພື້ນ ແລະ ສາກົນ; ພັດທະນາສີມືແຮງງານເປັນການເຝິກສີມື, ຍົກລະດັບດ້ານທັກສະ, ຄວາມຊໍານານໃນການເຮັດວຽກ ແລະ ທັດສະນະຄະຕິໃນການອອກແຮງງານ ຕາມມາດຕະຖານສີມືແຮງງານແຫ່ງຊາດ; ພັດທະນາສີມືແຮງງານປະກອບດ້ວຍຫຼັກສູດເຝິກສີມືແຮງງານ, ການທົດສອບ-ການອອກໃບຢັ້ງຢືນສີມືແຮງງານ ແລະ ການແຂ່ງຂັນສີມືແຮງງານ ດ້ວຍການມີສ່ວນຮ່ວມຂອງສະຖານທີ່ພັດທະນາສີມືແຮງງານ ແລະ ຫົວໜ່ວຍແຮງງານ.
ພ້ອມດຽວກັນນັ້ນ, ຈະເລັ່ງໃສ່ປັບປຸງຄຸນນະພາບຂອງລະບົບການພັດທະນາສີມືແຮງງານໃຫ້ຫຍັບໃກ້ມາດຕະຖານສາກົນ ແລະ ພາກພື້ນ; ສ້າງລະບົບຖານຂໍ້ມູນຕະຫຼາດແຮງງານທີ່ລວມສູນເອກະພາບມີເຄືອຄ່າຍໃນຂອບເຂດທົ່ວປະເທດ; ຕັ້ງໜ້າພັດທະນາສີມືແຮງງານແຫ່ງຊາດໃຫ້ໄດ້ຫຼາກຫຼາຍສາຂາວິຊາຊີບ ເພື່ອເປັນເຄື່ອງມືໃນການເຮັດການທົດສອບ-ອອກໃບຢັ້ງຢືນມາດຕະຖານສີມືແຮງງານໃນລະດັບວິຊາຊີບຂັ້ນທ້ອງຖິ່ນ ແລະ ລະດັບຊາດຢ່າງກ້ວາງຂວາງ. ທັງນີ້, ຄາດວ່າຮອດປີ 2020 ຕ້ອງສ້າງມາດຕະຖານສີມືແຮງງານໃຫ້ໄດ້ 25 ສາຂາວິຊາຊີບ, ເຮັດການທົດສອບ-ອອກແບບໃບຢັ້ງຢືນໃຫ້ໄດ້ 21 ສາຂາວິຊາຊີບ, ຈັດຕັ້ງການແຂ່ງຂັນສີມືແຮງງານລະດັບຊາດ ແລະ ແຂວງ 1 ຄັ້ງ/ປີ ແລະ ລະດັບສະຖາບັນພັດທະນາສີມືແຮງງານ 2 ຄັ້ງ/ປີ.
ຕາມສະຖິຕິປີ 2017 ສປປ ລາວ ມີພົນລະເມືອງທັງໝົດ 6,9 ລ້ານຄົນ ໂດຍກວມເອົາພົນລະເມືອງໃນເກນອາຍຸອອກແຮງງານ 69% ຫຼື ປະມານ 4,7 ລ້ານຄົນ ໃນນີ້, ມີກໍາລັງແຮງງານ 1,9 ລ້ານຄົນ ແຕ່ພົນລະເມືອງມີວຽກເຮັດງານທໍາພຽງ 1,7 ລ້ານຄົນ. ປັດຈຸບັນ, ທົ່ວປະເທດມີສູນເຝິກຫົວໜ່ວຍແຮງງານທັງໝົດ 163 ແຫ່ງ ເຊິ່ງປິ 2018 ສາມາດພັດທະນາສີມືແຮງງານໄດ້ 105.5551 ຄົນ ໃນນີ້, ຂະແໜງກະສິກໍາ-ປ່າໄມ້ມີ 32.820 ຄົນ, ອຸດສາຫະກໍາ 27.649 ຄົນ ແລະ ການບໍລິການ 45.082 ຄົນ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມເສດຖະກິດ-ສັງຄົມ
ຮູບພາບຈາກ: http://laoupdatenews.blogspot.com