spot_img
Homeຂ່າວທ້ອງຖິ່ນລັດ ວາງລາຄາຂາຍຍ່ອຍຢາສູບຊອງໜຶ່ງບໍ່ໃຫ້ຫຼຸດ 4 ພັນກີບ ແລະ ຕຸດໜຶ່ງ 30 ພັນກີບ

ລັດ ວາງລາຄາຂາຍຍ່ອຍຢາສູບຊອງໜຶ່ງບໍ່ໃຫ້ຫຼຸດ 4 ພັນກີບ ແລະ ຕຸດໜຶ່ງ 30 ພັນກີບ

Published on

ກົມການຄ້າພາຍໃນ ກະຊວງອຸດສາຫະກໍາ ແລະ ການຄ້າ ຈັດກອງປະຊຸມເຜີຍແຜ່ຄໍາສັ່ງ ກ່ຽວກັບການຄວບຄຸມຜະລິດຕະພັນຢາສູບ ດ້ວຍການກໍານົດລາຄາຂາຍຍ່ອຍຕໍ່າສູດບໍ່ໃຫ້ຫຼຸດ 4.000 ກີບ/ຊອງ ແລະ ຂາຍຍົກຕໍ່າສຸດບໍ່ໃຫ້ຫຼຸດ 30.000 ກີບ/ຕຸດ ຫາກໃຜລະເມີດຈະຖືກປັບໃໝສູງສຸດ 6 ລ້ານກີບ ພ້ອມຍຶດຢາສູບຄືນເປັນຂອງລັດ. ທັງນີ້, ເພື່ອຫຼຸດຜ່ອນການເຂົ້າເຖິງຢາສູບຂອງຊາວໜຸ່ມເຍົາວະຊົນ ແລະ ຜູ້ທີ່ມີລາຍຮັບຕໍ່າ ແລະ ອື່ນໆ.

ກອງປະຊຸມດັ່ງກ່າວ, ຈັດຂຶ້ນໃນວັນທີ 4 ມັງກອນ 2019 ທີ່ກະຊວງອຸດສາຫະກໍາ ແລະ ການຄ້າ ໂດຍການເປັນປະທານຂອງ ທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ທ່ານ ກ່າວວ່າ: ການຕັ້ງລາຄາຂາຍຍ່ອຍຕໍ່າສູດບໍ່ໃຫ້ຫຼຸດ 4.000 ກີບ/ຊອງ ໄດ້ແນ່ໃສ່ເພື່ອຫຼຸດຜ່ອນການເຂົ້າເຖິງຢາສູບຂອງຊາວໜຸ່ມເຍົາວະຊົນ ແລະ ຜູ້ທີ່ມີລາຍຮັບຕໍ່າ, ປົກປ້ອງສຸຂະພາບທີ່ໄດ້ຮັບຜົນກະທົບຈາກການຊົມໃຊ້ຜະລິດຕະພັນຢາສູບ ແລະ ການໄດ້ຮັບຄວັນຢາສູບ. ໃນຄວາມເປັນຈິງແລ້ວຕົ້ນທຶນຢາສູບຊອງໜຶ່ງສະເລ່ຍປະມານ 1.800-2.000 ກີບ ເພື່ອຫຼີກເວັ້ນບໍ່ໃຫ້ມີການຂາຍລາຄາຕໍ່າກວ່າ 4 ພັນກີບ/ຊອງ ພວກເຮົາຈຶ່ງຕັ້ງລາຄາໄວ້ເຮັດໃຫ້ຜູ້ບໍ່ມີເງິນບໍ່ເຂົ້າເຖິງໄດ້. ພ້ອມນັ້ນ, ໄດ້ເພີ່ມອາກອນຊົມໃຊ້ຈາກມາດຕະການດັ່ງກ່າວ ທີ່ຈະເຮັດໃຫ້ຢາສູບເຖື່ອນທີ່ນໍາເຂົ້າບໍ່ຖືກຕ້ອງໝົດໄປ (ຈາກການສໍາຫຼວດທົ່ວສັງຄົມລາວ ມີຢາສູບເຖື່ອນປະມານ 36%) ເຮັດໃຫ້ລັດສູນເສຍລາຍຮັບ 77 ຕື້ກີບ.

ໃນໜຶ່ງປີຜ່ານມາ ກະຊວງສາທາລະນະສຸກ ຍັງມີມາດຕະການຕິດສະຫຼາກຮູບພາບຜົນຮ້າຍຂອງຢາສູບຈາກ 30% ຂຶ້ນເປັນ 75% ຂອງເນື້ອທີ່ຊອງຢາສູບ; ສ່ວນຂະແໜງອຸດສາຫະກໍາ ແລະ ການຄ້າ ກໍໄດ້ຄວບຄຸມຂອດຈໍາໜ່າຍ, ການຜະລິດ ເຊິ່ງປີ 2018 ເຈົ້າໜ້າທີ່ກວດກາການຄ້າໃນຂອບເຂດທົ່ວປະເທດ ສາມາດຍຶດ ແລະ ທໍາລາຍຢາສູບທີ່ບໍ່ໄດ້ມາດຕະຖານຫຼາຍສົມຄວນ. ພ້ອມນັ້ນ, ຜູ້ດໍາເນີນທຸລະກິດຢາສູບຕ້ອງຈ່າຍອາກອນກໍາໄລ 26% ເຊິ່ງ 2% ໂອນໃຫ້ກອງທຶນຢາຄວບຄຸມຢາສູບ ກະຊວງສາທາລະນະສຸກ ເພື່ອຊ່ວຍໂຄສະນາຜົນຮ້າຍ, ຊ່ວຍສະກັດກັ້ນ, ຊ່ວຍການປິ່ນປົວ ແລະ ຜົນກະທົບອື່ນໆກ່ຽວກັບຢາສູບ.

ທ່ານ ບຸນທຽນ ແກ້ວສີພາ ຫົວໜ້າກົມການຄ້າພາຍໃນ ໄດ້ຜ່ານຄໍາສັ່ງກ່ຽວກັບການຄວບຄຸມຜະລິດຕະພັນຢາສູບ ເລກທີ 1791/ອຄ.ກຄພນ, ລົງວັນທີ 18 ທັນວາ 2018 ໂດຍມີເນື້ອໃນຄື: ການກໍານົດລາຄາຂາຍຍ່ອຍຜະລິດຕະພັນຢາສູບຢູ່ພາຍໃນ ແລະ ນໍາເຂົ້າຈາກຕ່າງປະເທດ ຕໍ່າສຸດບໍ່ໃຫ້ຫຼຸດ 4 ພັນກີບ/ຊອງ ແລະ ຂາຍຍົກບໍ່ໃຫ້ຫຼຸດ 30 ພັນກີບ/ຕຸດ ໂດຍເຈົ້າໜ້າທີ່ອຸດສາຫະກໍາ ແລະ ການຄ້າ ທົ່ວປະເທດເປັນຜູ້ຄຸ້ມຄອງລາຄາຂາຍຍ່ອຍຢາສູບທຸກຊະນິດທີ່ຜະລິດພາຍໃນ ແລະ ນໍາເຂົ້າຈາກຕ່າງປະເທດ ທີ່ວາງຂາຍຕາມທ້ອງຕະຫຼາດ, ຫ້າງຮ້ານ ແລະ ສະຖານທີ່ວາງຂາຍຢາສູບຕ່າງໆ, ໃຫ້ແນະນໍາຂາຍໃນລາຄາຕໍ່າສຸດບໍ່ໃຫ້ຫຼຸດ 4 ພັນກີບ/ຊອງ ຫາກພົບເຫັນຜູ້ລະເມີດໃຫ້ດໍາເນີນມາດຕະການຕໍ່ຜູ້ລະເມີດຕາມທີ່ລະບຸໄວ້ໃນດໍາລັດ 474/ນຍ ຄື: ລະເມີດຄັ້ງທີ 1 ປັບໃໝ 5 ແສນ ຫາ 1 ລ້ານກີບ/ຄັ້ງ/ລາຍການ ພ້ອມທັງຂຽນໃບປະຕິຍານ, ຄັ້ງທີ 2 ປັບໃໝ 1ຫາ 2 ລ້ານກີບ/ຄັ້ງ/ລາຍການ ພ້ອມທັງຂຽນໃບປະຕິຍານ ແລະ ຄັ້ງທີ 3 ປັບໃໝ 2 ເທົ່າຂອງການປັບໃໝຄັ້ງທີ 2 /ຄັ້ງ/ລາຍການ ພ້ອມທັງຮິບຜະລິດຕະພັນຢາສູບເປັນຂອງລັດ.

 

 

 

 

 

 

 

 

 

 

 

 

 

 

 

ຮຽບຮຽງໂດຍ: ໃບບົວ ຈັນທະລັງສີ

ແຫຼ່ງຂໍ້ມູນຈາກ: laoedaily.com.la

ຮູບພາບຈາກ: .rfa.org

ບົດຄວາມຫຼ້າສຸດ

ຂໍຂອບໃຈ! ຍີ່ປຸ່ນຊ່ວຍເຫຼືອລ້າ 1.27 ຕື້ເຢນ ເຂົ້າໃນວຽກງານພັດທະນາຄູໃນ ສປປ ລາວ

ຍີ່ປຸ່ນຊ່ວຍເຫຼືອລ້າ 1.27 ຕື້ເຢນ ເຂົ້າໃນວຽກງານພັດທະນາຄູໃນ ສປປ ລາວ ວັນທີ 25 ກຸມພາ 2025, ອົງການຮ່ວມມືສາກົນຍີ່ປຸ່ນ ໄດ້ລົງນາມໃນສັນຍາຊ່ວຍເຫຼືອລ້າໃຫ້ແກ່ລັດຖະບານລາວ ຈຳນວນ 1.27 ຕື້ເຢນ...

ຊາວໜຸ່ມ ກະຊວງ ປກສ ຄວ້າແຊ້ມກິລາບານເຕະ Lao Youth Union Cup ປະຈຳປີ 2024

ກະຊວງ ປກສ ຄວ້າແຊ້ມບານເຕະ Lao Youth Union Cup ປະຈຳປີ 2024 ໄດ້ສຳເລັດ ການແຂ່ງຂັນກິລາບານເຕະ ຊີງຂັນ ສະຫາຍ ເລຂາຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ...

ສູນການສຶກສາແອວແອສ ລົງນາມເຊັນສັນຍາ ກັບສະຖາບັນ PSB ຂອງສິງກະໂປ ແລະ ການຮ່ວມມືກັບ (GEA)

ສູນການສຶກສາແອວແອສ (LS Education): ຜູ້ນຳດ້ານຄວາມເປັນເລີດທາງການສຶກສາໃນລາວ ແລະ ທົ່ວໂລກ ໃນຊຸມປີມໍ່ໆມານີ້, ປະເທດລາວເຫັນໄດ້ວ່າມີຄວາມຕ້ອງການການສຶກສາທີ່ມີຄຸນນະພາບໄດ້ຕາມມາດຕະຖານສາກົນນັບມື້ນັບເພີ່ມຂຶ້ນ. ຢູ່ແຖວໜ້າຂອງການຫັນປ່ຽນນີ້ແມ່ນ ສູນການສຶກສາແອວແອສ. ເນື່ອງຈາກເປັນສູນການສຶກສາຊັ້ນນຳທີ່ມຸ້ງໝັ້ນໃນການຍົກລະດັບການຮຽນຮູ້ໃນລາວ. ດ້ວຍວິໄສທັດທີ່ຈະສົ່ງເສີມໃຫ້ນັກຮຽນມີສັກະຍະພາບ ແລະ ໂອກາດທີ່ໄດ້ຮັບການຍອມຮັບໃນທົ່ວໂລກ, ສູນການສຶກສາແອວແອສ...

ກົມອຸຕຸອອກແຈ້ງການສະພາບອາກາດ ປະຈຳວັນທີ 26 ກຸມພາ 2025 ເວລາ 06:00 ໂມງ

ພະຍາກອນອາກາດແຕ່ເວລາ 07 ໂມງ ຂອງວັນທີ 26/02/2025 ຫາ ເວລາ 07 ໂມງ ຂອງວັນທີ 27/02/2025 ມວນອາກາດຫນາວເຢັນ ຍັງຈະສືບຕໍ່ປົກຄຸມຢູ່ທົ່ວທຸກພາກຂອງປະເທດລາວດ້ວຍກໍາລັງແຮງ, ສົມທົບກັບກະແສ ລົມຕາເວັນອອກສ່ຽງເຫນືອພັດປົກຄຸມ....