ກົມລ້ຽງສັດ ແລະ ການປະມົງ ກະຊວງ ກະສິກໍາ ແລະ ປ່າໄມ້ ຮຽກຮ້ອງໃຫ້ຜູ້ລ້ຽງສັດທົ່ວປະເທດ ໂດຍສະເພາະບັນດາແຂວງພາກເໜືອ ໃຫ້ເພີ່ມຄວາມເອົາໃຈໃສ່ປ້ອງກັນພະຍາດສັດ ທີ່ອາດຈະເກີດຂຶ້ນໃນໄລຍະອາກາດໜາວຢ່າງຕໍ່ເນື່ອງ ເຊິ່ງສາມາດຕິດຕໍ່ຊື້ຢາວັກຊິນປ້ອງກັນພະຍາດສັດ ໄດ້ທີ່ຫ້ອງການກະສິກໍາ ແລະ ປ່າໄມ້ເມືອງ ແລະ ພະແນກກະສິກໍາ ແລະ ປ່າໄມ້ແຂວງທີ່ຕົນອາໄສຢູ່ ຖ້າອາກາດໜາວຫຼາຍຄວນຂັງສັດໄວ້ໃນຄອກ ຫຼື ວິທີປອດໄພຕ້ອງດັງໄຟເພື່ອໃຫ້ຄວາມອົບອຸ່ນ ແລະ ເອົາວັດຖຸສິ່ງຂອງປົກຫຸ້ມໄວ້ ເພື່ອຮັບປະກັນບໍ່ໃຫ້ມີຜົນເສຍຫາຍແກ່ສັດລ້ຽງທີ່ອາດຈະເກີດຂຶ້ນ.
ທ່ານ ສີທອງ ພິພັກຄະວົງ ຮອງຫົວໜ້າກົມລ້ຽງສັດ ແລະ ການປະມົງ ໃຫ້ຮູ້ວ່າ: ໃນໄລຍະທີ່ສະພາບອາກາດຍັງໜາວນີ້, ຜູ້ລ້ຽງສັດຄວນເອົາໃຈໃສ່ປ້ອງກັນພະຍາດທີ່ອາດຈະເກີດຂຶ້ນໃຫ້ຫຼາຍທີ່ສຸດ ຖ້າອາກາດໜາວຫຼາຍ ໂດຍສະເພາະງົວ-ຄວາຍ ຄວນຂັງໄວ້ໃນຄອກ ຫຼື ວິທີປອດໄພຕ້ອງດັງໄຟເພື່ອໃຫ້ຄວາມອົບອຸ່ນ ແລະ ເອົາວັດຖຸສິ່ງຂອງທີ່ສາມາດປົກຫຸ້ມໄວ້ມາຫົ່ມ. ສ່ວນສັດປີກ ຄວນຂັງໄວ້ໃນຄອກ ແລະ ເອົາສິ່ງຫຸ້ມຫໍ່ເພື່ອຮັກສາຄວາມອົບອຸ່ນຕະຫລອດໄລຍະອາກາດໜາວ. ທັງນີ້, ເພື່ອປ້ອງກັນການລະບາດຂອງພະຍາດຕ່າງໆ ທີ່ອາດຈະເກີດຂຶ້ນ ກະຊວງກະສິກໍາ ແລະ ປ່າໄມ້ ກໍໄດ້ເປີດຂະບວນການສັກຢາປ້ອງກັນພະຍາດສັດ ເນື່ອງໃນໂອກາດວັນສັກຢາກັນພະຍາດສັດແຫ່ງຊາດ ວັນທີ 11 ພະຈິກ 2018. ນອກນີ້, ຍັງໄດ້ສົ່ງວິຊາການຈໍານວນໜຶ່ງເຄື່ອນໄຫວ ໂດຍສົມທົບກັບຂະແໜງການທີ່ກ່ຽວຂ້ອງແຕ່ລະທ້ອງຖິ່ນ ລົງຕິດຕາມສະພາບການລ້ຽງສັດຂອງປະຊາຊົນຢ່າງໃກ້ສິດ ພ້ອມທັງໃຫ້ຄໍາແນະນຳດ້ານເຕັກນິກໃນການລ້ຽງສັດ ແລະ ປ້ອງກັນພະຍາດທີ່ອາດຈະເກີດຂຶ້ນໃນແຕ່ລະ ລະດູການຢ່າງຕໍ່ເນື່ອງ.
“ພະຍາດທີ່ມັກເກີດຂຶ້ນໃນໄລຍະອາກາດໜາວ ໂດຍສະເພາະງົວ-ຄວາຍ ເຊັ່ນ: ພະຍາດປາກເປື່ອຍລົງເລັບ, ເຕົ້າໂຮມເລືອດ, ໄຂ້ເລືອດດຳ ແລະ ພະຍາດທ້ອງເບັງ; ໝູເປັນຕົ້ນ: ພະຍາດອະຫິວາ ແລະ ພະຍາດໝູຫູກໍ່າ; ໄກ່ໄດ້ແກ່ ພະຍາດໄຂ້ຫວັດສັດປີກ, ອະຫິວາສັດປີກ ແລະ ພະຍາດນິວຄາເຊິນ ເຊິ່ງປັດຈຸບັນ, ລາວສາມາດຜະລິດຢາວັກແຊັງປ້ອງກັນພະຍາດສັດໄດ້ຫຼາຍຊະນິດຄື: ວັກແຊັງກັນພະຍາດເຕົ້າໂຮມເລືອດງົວ-ຄວາຍ, ອະຫິວາໝູ, ນິວຄາເຊິນ, ອະຫິວາສັດປີກ, ອະຫິວາເປັດ ແລະ ວັກແຊັງກັນພະຍາດຫລອດລົມອັກເສບ ໂດຍສາມາດຜະລິດໄດ້ທັງໝົດ 6.000.000 – 7.000.000 ເຂັມ/ປີ. ຜູ້ລ້ຽງສັດຢູ່ແຕ່ລະທ້ອງຖິ່ນສາມາດຕິດຕໍ່ຊື້ໄດ້ຢູ່ຫ້ອງການກະສິກໍາ ແລະ ປ່າໄມ້ເມືອງ ແລະ ພະແນກກະສິກໍາ ແລະ ປ່າໄມ້ແຂວງທີ່ຕົນອາໄສຢູ່.“, ທ່ານ ສີທອງ ພິພັກຄະວົງກ່າວ .
ໃນໄລຍະຜ່ານມາ, ປະເທດລາວ ເຄີຍປະສົບບັນຫາສະພາບອາກາດໜາວຮ້າຍແຮງສົມຄວນມາແລ້ວຫຼາຍຄັ້ງ ເຊິ່ງຄັ້ງຫຼ້າສຸດເກີດຂຶ້ນໃນໄລຍະທ້າຍເດືອນ ມັງກອນ ຫາຕົ້ນເດືອນ ກຸມພາ ປີ 2016 ຜ່ານມາ. ຍ້ອນອາກາດໜາວຫຼາຍ ເຮັດໃຫ້ບັນດາແຂວງພາກເໜືອປະສົບບັນຫານໍ້າກ້າມ ສົ່ງຜົນໃຫ້ສັດລ້ຽງປະເພດງົວ-ຄວາຍຂອງປະຊາຊົນຕາຍຈຳນວນຫລາຍສົມຄວນ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: Lao National Radio