ທີມນັກວິໄຈ ຈາກນັກວິທະຍາສາດສະຖາບັນ ຊານຕາເຟ ແລະ ມະຫາວິທະຍາໄລ ຄາລິຟໍເນຍ ລອສແອງເຈລິສ ອາເມລິກາ ໄດ້ຮ່ວມກັນວິເຄາະຂໍ້ມູນການສຶກສາລັກສະນາພື້ນທີ່ຂອງປ່າໄມ້ 421 ແຫ່ງທົ່ວໂລກ ລວມເອົາຕົ້ນໄມ້ 55,983 ຕົ້ນ ຈາກ 2,701 ແນວພັນ ໂດຍມີການສໍາຫຼວດຄຸນສົມບັດການເຮັດວຽກທີ່ມີອິດທິພົນຕໍ່ການຈະເລີນເຕີບໂຕຂອງຕົ້ນໄມ້ແຕ່ລະຕົ້ນ ເຊັ່ນ: ຄວາມສູງ, ຄວາມໜາແໜ້ນຂອງເນື້ອໄມ້, ໃບ ແລະ ປະລິມານຂອງກາກບອນ, ໄນໂຕຣເຈນ ແລະ ຟົດສະຟໍຣິກ ທີ່ຢູ່ກັບໃບໄມ້ ເພື່ອຈະກໍານົດສະພາບພູມອາກາດໃນເຂດປ່າໄມ້ເຫຼົ່ານີ້ ພ້ອມກັບວິເຄາະອຸຫະພູມຄວາມກົດດັນທາງອາກາດ ແລະ ຄວາມໄວຂອງລົມ.
ຈາກຜົນການວິໄຈເຜີຍວ່າ ສະພາບພູມອາກາດມີຜົນຕໍ່ລັກສະນະການເຮັດວຽກຂອງປ່າໄມ້ ໂດຍພົບຄວາມແຕກຕ່າງຫຼາຍຢ່າງ ທີ່ອາດຈະສົ່ງຜົນກະທົບຕໍ່ປະສິດທິພາບການຜະລິດ ແລະ ອົງປະກອບຂອງປ່າໄມ້ທົ່ວໂລກ ເຊັ່ນ: ພົບວ່າພື້ນທີ່ຂອງໃບໄມ້ໄດ້ຮັບອິດທິພົນຫຼາຍທີ່ສຸດຈາກຄວາມດັນ ແລະ ອຸນຫະພູມ. ຂະນະທີ່ຄວາມສູງຂອງຕົ້ນໄມ້ ໄດ້ຮັບຜົນກະທົບຈາກຄວາມແປປວນຂອງອຸນຫະພູມເປັນຫຼັກ, ທີ່ສໍາຄັນພົບວ່າປ່າໄມ້ກໍາລັງປ່ຽນແປງລັກສະນະການເຮັດວຽກ ເພື່ອຕອບສະໜອງຕໍ່ກັບພາວະໂລກຮ້ອນ. ທີມນັກວິທະຍາສາດ ຫວັງວ່າຂໍ້ມູນເຫຼົ່ານີ້, ຈະຊ່ວຍໃນການປັບປຸງແບບຈໍາລອງຄອມພີວເຕີ ໃນການຄໍານວນຄວາມສໍາພັນເພື່ອໃຊ້ທໍານາຍປ່າໄມ້ວ່າຈະຕອບສະໜອງຕໍ່ການປ່ຽນແປງສະພາບພູມອາກາດໃນອະນາຄົດຕໍ່ໄປແນວໃດ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: thairath