ໜັງສືພິມຊັນໂກ ຊິມບຸນ ຂອງຍີ່ປຸ່ນ ລາຍງານວັນທີ 3 ມັງກອນ 2019 ໂດຍບໍ່ມີການອ້າງແຫຼ່ງຂ່າວວ່າ ກອງທັບອາເມລິກາພ້ອມຈະຊ້ອມຮົບດ້ວຍຂີປະນາວຸດຄັ້ງທໍາອິດ ໃນເກາະໂອກິນາວາ ປະເທດ ຍີ່ປຸ່ນ ເຊິ່ງເປັນຈຸດຍຸດທະສາດສໍາຄັນພາຍໃນປີນີ້. ຂະນະທີ່ອາເມລິກາ ພະຍາຍາມຕໍ່ຕ້ານການເຜີຍແຜ່ຂະຫຍາຍອິດທິພົນຂອງຈີນທີ່ເພີ່ມຂຶ້ນເລື້ອຍໆ ເຊິ່ງກອງທັບອາເມລິກາໄດ້ແຈ້ງເລື່ອງນີ້ຕໍ່ຍີ່ປຸ່ນ ທີ່ເປັນພັນທະມິດສໍາຄັນໃນອາຊີແລ້ວ ໂດຍການຊ້ອມຮົບຂີປະນາວຸດຈະກ່ຽວຂ້ອງກັບຖານຍິງຈະລວດ ຫຼື ຂີປະນາວຸດເຄື່ອນທີ່ ອັນເປັນມາດຕະການຕໍ່ຕ້ານການໂຈມຕີຈາກຂີປະນາວຸດແບບພື້ນສູ່ອາກາດຂອງຈີນ ທີ່ອາດຈະເກີດຂຶ້ນໄດ້.
ດ້ານທ່ານ ໂດນັລ ທຣໍ້າ ປະທານາທິບໍດີ ອາເມລິກາ ຖະແຫຼງຂ່າວທີ່ທໍານຽບຂາວໃນວັນທີ 2 ມັງກອນ ຜ່ານມາວ່າ:” ຕົນໄດ້ຮັບຈົນໝາຍສະບັບສໍາຄັນຫຼາຍຈາກ ຄິມ ຈອງອືນ ຜູ້ນໍາເກົາຫຼີເໜືອ ແລະ ເປັນໄປໄດ້ທີ່ຈະມີການເຈລະຈາສຸດຍອດ ລະຫວ່າງຕົນກັບ ຄິມ ເປັນຄັ້ງທີ 2 ໃນອະນາຄົດທີ່ບໍ່ດົນເກີນໄປ” ອັນເປັນສ່ວນໜຶ່ງຂອງຄວາມພະຍາຍາມໂນ້ມນ້າວໃຫ້ ຄິມ ຈອງອືນ ປົດອາວຸດນີວເຄຍ ແຕ່ບໍ່ໄດ້ເລັ່ງລັດ. ທຣໍ້າ ອ້າງວ່າ: “ຕົນເຮັດໃຫ້ຄວາມສໍາພັນລະຫວ່າງອາເມລິກາກັບເກົາຫຼີເໜືອດີຂຶ້ນ ເຮັດໃຫ້ເກົາຫຼີເໜືອຢຸດການທົດລອງອາວຸດນິວເຄຼຍ ແລະ ຂີປະນາວຸດ ຢັບຢັ້ງການເກີດສົງຄາມໃໝ່ໃນອາຊີ”.
ໃນປີຫຼັງເຮືອຮົບຂອງຈີນ ແລ່ນຜ່ານນ່ານນໍ້າໃກ້ທະເລ ເກາະໂອກິນາວາ ເຊິ່ງທະຫານອາເມລິກາຕັ້ງຖານທັບຢູ່ທີ່ນັ້ນຫຼາຍຄັ້ງ. ຜູ້ຊ່ຽວຊານລະບຸວ່າກິດຈະການທາງການທະຫານທີ່ເພີ່ມຂຶ້ນເລື່ອຍໆ ຂອງຈີນ ເປັນສ່ວນໜຶ່ງຂອງແຜນຄວບຄຸມນ່ານນໍ້າພາຍໃນສ່ວນທີ່ເອີ້ນກັນວ່າ: “ເຄືອຂ່າຍເກາະທີໜຶ່ງ” ເຊິ່ງເຊື່ອມເກາະໂອກິນາວາ, ໄຕ້ຫວັນ ແລະ ຟີລິປິນ; ນັກວິເຄາະບາງຄົນຍັງເຊື່ອວ່າຈີນພະຍາຍາມຍຸຕິການຄອບງໍາທາງການທະຫານຂອງ ອາເມລິກາ ໃນມະຫາສະໝຸດປາຊີຟີກທາງຕະເວັນຕົກ ຄວບຄຸມເຄືອຂ່າຍເກາະທີສອງ ເຊິ່ງເຊື່ອມໝູ່ເກາະໂອກາຊາວາຣະ ຂອງຍີ່ປຸ່ນ, ເກາະກວນດິນແດນໃຕ້ອາຊີຂອງອາເມລິກາ ແລະ ອິນໂດເນເຊຍ ເຊິ່ງການເສີມສ້າງທະຫານຂອງຈີນ ເຮັດໃຫ້ປະເທດເພື່ອນບ້ານຕ້ອງວິຕົກກັງວົນ ແຕ່ຈີນຢືນຍັນວ່າກິດຈະການທາງທະຫານມີຂຶ້ນ ເພື່ອປ້ອງກັນຕົນເອງເທົ່ານັ້ນ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: thairath.co.th