ສໍານັກຂ່າວຕ່າງປະເທດລາຍງານ ໃນວັນທີ 2 ມັງກອນ 2019 ວ່າ ທ່ານ ສີ ຈິ້ນຜິງ ປະທານາທິບໍດີ ສປ ຈີນ ປະກາດວ່າ: “ບໍ່ມີໃຜສາມາດປ່ຽນແປງຄວາມຈິງທີ່ວ່າ ໄຕ້ຫວັນ ເປັນສ່ວນໜຶ່ງຂອງຈີນໄດ້ ແລະ ປະຊາຊົນທັງສອງຝ່າຍໃນຊ່ອງແຄບໄຕ້ຫວັນ ຈະຕ້ອງຢູ່ປະເທດດຽວກັນ”.
ທ່ານ ສີ ຈິ້ນຜິງ ກ່າວຢ່າງເດັດດ່ຽວຕໍ່ ໄຕ້ຫວັນ ທີ່ນະຄອນຫຼວງ ປັກກິ່ງ ສປ ຈີນ ໃນວາລະຄົບຮອບ 40 ປີ ຂອງການສົ່ງສານເຖິງເພື່ອນຮ່ວມຊາດໃນ ໄຕ້ຫວັນ ເຊິ່ງເປັນການຖະແຫຼງນະໂຍບາຍຂອງຈີນ ວ່າດ້ວຍໄຕ້ຫວັນ ວ່າ: “ການຮ່ວມຊາດດຽວກັນຈະຕ້ອງມີຂຶ້ນພາຍໃຕ້ຫຼັກການຂອງຈີນອັນດຽວ. ປະຊາຊົນທຸກຄົນໃນ ໄຕ້ຫວັນ ຈະຕ້ອງຍອມຮັບວ່າການເປັນເອກະລາດຂອງ ໄຕ້ຫວັນ ໄດ້ ແຕ່ຈະນໍາຄວາມຫາຍະນະມາສູ່ ໄຕ້ຫວັນ, ເຮົາຍິນດີທີ່ຈະເຮັດໃຫ້ພື້ນທີ່ໃນການຮ່ວມຊາດນີ້ເປັນສັນຕິ ແຕ່ເຮົາຈະບໍ່ປ່ອຍໃຫ້ມີການເຄື່ອນໄຫວຂອງກຸ່ມແບ່ງແຍກດິນແດນໃນຮູບແບບໃດໆເກີດຂຶ້ນ” ພ້ອມກັບກ່າວປະນາມກຸ່ມທີ່ສະໜັບສະໜູນການປະກາດເອກະລາດຂອງໄຕ້ຫວັນ ໂດຍຈະບໍ່ຮັບປາກວ່າຈະບໍ່ໃຊ້ກໍາລັງ ແລະ ສະຫງວນທຸກທາງເລືອກອັນຈໍາເປັນທີ່ມີຢູ່ໃນ ໄຕ້ຫວັນ ທັງຢໍ້າອີກວ່າ: “ເລື່ອງນີ້ເປັນກິດຈະການພາຍໃນປະເທດຈະບໍ່ຍອມໃຫ້ມີການແຊກແຊງຈາກພາຍນອກ”.
ດ້ານທ່ານ ນາງ ໄຊ່ ອິງເຫວິນ ປະທານາທິບໍດີ ໄຕ້ຫວັນ ອອກມາຕໍ່ວ່າກັບຖະແຫຼງການຂອງ ສີ ຈິ້ນຜິງ ວ່າ: ໄຕ້ຫວັນ ຈະບໍ່ຍອມຮັບນະໂຍບາຍ 1 ປະເທດ 2 ລະບົບຂອງຈີນ ແລະ ຍັງກ່າວຢໍ້າຕື່ມວ່າ ການເຈລະຈາຊ່ອງແຄບ ໄຕ້ຫວັນຈໍາເປັນຕ້ອງມີຂຶ້ນແບບລັດຕໍ່ລັດ ພ້ອມກັບຮຽກຮ້ອງໃຫ້ ຈີນ ເຂົ້າໃຈໃນຄວາມຄິດ ແລະ ຄວາມຕ້ອງການຂອງ ປະຊາຊົນໄຕ້ຫວັນ ພ້ອມທັງແກ້ໄຂດ້ວຍວິທີສັນຕິ. ແນວໃດກໍຕາມ ຈີນ ຍັງຖືວ່າ ໄຕ້ຫວັນເປັນລັດໜຶ່ງຂອງຕົນເອງພາຍໃຕ້ 1 ປະເທດ 2 ລະບົບ ເຊິ່ງເປັນນະໂຍບາຍດຽວທີ່ ຈີນ ໃຊ້ກັບ ຮົງກົງ ກັບ ມາເກົ໊າ ດິນແດນໃຕ້ອໍານາດຂອງຕົນໃນຕອນນີ້ ແຕ່ ໄຕ້ຫວັນ ຍັງຢືນການບໍ່ຍອມຮັບຫຼັກການດັ່ງກ່າວ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: dailynews.co.th, .matichon.co.th, bbc.com