ຈາກຂໍ້ມູນຂອງສຳນັກງານຕຳຫຼວດກວດຄົນເຂົ້າເມືອງຂອງໄຕ້ຫວັນ ລາຍງານວ່າ ຊາວຫວຽດນາມທັງໝົດ 152 ຄົນເດີນທາງເຂົ້າມາເມືອງ ເກົາສົງ ໃນລະຫວ່າງວັນທີ 21 ແລະ 23 ທັນວາ 2018 ດ້ວຍວີຊ່ານັກທ່ອງທ່ຽວ ໃນຮູບແບບນັກທ່ອງທ່ຽວເປັນໝູ່ຄະນະ ແລະ ໜີຫາຍໄປ ຫຼັງຈາກແຈ້ງເຂົ້າພັກໃນໂຮງແຮມ 2 ແຫ່ງໃນເມືອງດັ່ງກ່າວ, ຕໍ່ມາເຈົ້າໜ້າທີ່ຕຳຫຼວດສາມາດຕິດຕໍ່ 1 ຄົນໃນຈຳນວນຜູ້ຫຼົບໜີ ແລະ ອີກ 3 ຄົນໄດ້ເດີນທາງອອກຈາກໄຕ້ຫວັນຕັ້ງແຕ່ວັນທີ 25 ທັນວາ 2018 ທີ່ຜ່ານມາ.
ຈາກຊາວຫວຽດນາມ 148 ຄົນທີ່ຍັງເຫຼືອ, ປັດຈຸບັນເຈົ້າໜ້າທີ່ຕຳຫຼວດໄຕ້ຫວັນສາມາດຈັບກຸມຕົວຊາວຫວຽດທີ່ຫຼົບໜີໄດ້ແລ້ວ 24 ຄົນ ແລະ ທີ່ເຫຼືອ 124 ຄົນ ແມ່ນທາງເຈົ້າໜ້າທີ່ກຳລັງເລັ່ງຕາມຫາ ເຊິ່ງຄາດວ່າຍັງຫຼົບຊ່ອນໃນໄຕ້ຫວັນ.
ເຈົ້າໜ້າທີ່ໄດ້ແຈ້ງໄປທີ່ຊຸມຊົນຊາວຫວຽດນາມໃນໄຕ້ຫວັນ ໃຫ້ບອກກຸ່ມຄົນທີ່ຫຼົບໜີຈາກກຣຸບທົວ ເຂົ້າມາມອບຕົວຕໍ່ເຈົ້າໜ້າທີ່ ເພື່ອຈະໄດ້ຮັບການປະຕິບັດແບບຜ່ອນໜັກເປັນເບົາ ແລະ ສົ່ງຕົວກັບຫວຽດນາມໂດຍໄວ.
ຜູ້ທີ່ເດີນທາງເຂົ້າສູ່ໄຕ້ຫວັນໂດຍບໍ່ໄດ້ຮັບອະນຸຍາດຢ່າງຖືກຕ້ອງ ຈະຖືກລົງໂທດຈຳຄຸກບໍ່ເກີນ 3 ປີ ແລະ ປັບບໍ່ເກີນ 90.000 ໂດລາໄຕ້ຫວັນ ສ່ວນຜູ້ທີ່ໃຫ້ທີ່ພັກອາໄສແກ່ຜູ້ຫຼົບໜີເຂົ້າເມືອງ ກົດໝາຍກຳນົດໂທດຈຳຄຸກບໍ່ເກີນ 2 ປີ.
ອ່ານຂ່າວທີ່ກ່ຽວຂ້ອງຍ້ອນຫຼັງທີ່ລິ້ງ: ໄຕ້ຫວັນເລັ່ງຕິດຕາມຄົ້ນຫານັກທ່ອງທ່ຽວຊາວຫວຽດນາມ 152 ຄົນໜີທົວ
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: dailynews, today.line.me