ພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ລົງກວດກາຄວາມເປັນລະບຽບຂອງແມ່ຄ້າຊາວຂາຍຕາມເມືອງຕ່າງໆ ຜ່ານການກວດກາຍັງພົບເຫັນການຂາຍເຄື່ອງຊະຊາຍ ໃນ 5 ຕົວເມືອງມີ 320 ກວ່າຮ້ານ, ສ່ວນໃຫຍ່ຂາຍຕາມແຄມທາງ ແລະ ໃກ້ໂຮງງານຕັດຫຍິບ ເນື່ອງຈາກຊາວຄ້າຂາຍຍັງມີການລະເມີດ, ບໍ່ປະຕິບັດຕາມລະບຽບການ ແລະ ເວລາເຈົ້າໜ້າທີ່ບໍ່ຢູ່ກໍ່ກັບມາຂາຍຄືເກົ່າ ໂດຍສະເພາະເວລານອກໂມງການ, ວັນເສົາ ແລະ ວັນອາທິດ. ຕາມແຜນການແກ້ໄຂໃນປີ 2019 ໄດ້ເນັ້ນປະຕິບັດ 7 ຂໍ້ກໍານົດ ແລະ 4 ມາດຕະຖານ ເພື່ອແກ້ໄຂການຂາຍເຄື່ອງຊະຊາຍ.

ຫົວໜ້າພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ລາຍງານຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ I ໃນທ້າຍປີ 2018 ຜ່ານມາວ່າ: ອີງຕາມຂໍ້ຕົກລົງ ສະບັບເລກທີ 1184/ຈນວ, ລົງວັນທີ 20 ທັນວາ 2017, ມາດຕາ 7 ຂົງເຂດການຄ້າຈະຈັດສັນສະເພາະພາຍໃນຕະຫຼາດ, ຮ້ານຄ້າທີ່ໄດ້ຮັບອະນຸຍາດ, ບໍ່ໃຫ້ວາງຂາຍຊະຊາຍ ແລະ ວາງສິນຄ້າອອກມາເກີນຂອບເຂດ. ຈາກການລົງກວດກາໃນ 5 ເມືອງຄື: ເມືອງຈັນທະບູລີ, ໄຊເສດຖາ, ສີໂຄດຕະບອງ, ໄຊທານີ ແລະ ສີສັດຕະນາກ ຍັງເຫັນມີການຂາຍເຄື່ອງຊະຊາຍຈໍານວນ 324 ຮ້ານ/ຄົນ, ແກ້ໄຂແລ້ວ 88 ຮ້ານ/ຄົນ ແລະ ຍັງ 236 ຮ້ານ/ຄົນ; ສ່ວນຫຼາຍຢູ່ຕາມແຄມທາງ, ເຂດໂຮງງານຕັດຫຍິບ, ບໍລິເວນສວນເຈົ້າອານຸວົງ ຕາມສັງລວມເບິ່ງແລ້ວການແກ້ໄຂບັນຫາດັ່ງກ່າວເຮັດຢ່າງຕັ້ງໜ້າ ແຕ່ຊາວຄ້າຂາຍຍັງມີການລະເມີດ, ບໍ່ປະຕິບັດຕາມລະບຽບການ ເຊັ່ນ: ເວລາເຈົ້າໜ້າທີ່ບໍ່ຢູ່ກໍ່ກັບມາຂາຍຄືເກົ່າ ໂດຍສະເພາະເວລານອກໂມງການ, ວັນເສົາ ແລະ ວັນອາທິດ.

ສໍາລັບມາດຕະການການຈັດຕັ້ງປະຕິບັດໃນປີ 2019 ໃນການແກ້ໄຂບັນຫາດັ່ງກ່າວ ໂດຍອີງຕາມມະຕິຕົກລົງກອງປະຊຸມອົງການປົກຄອງ ສະບັບເລກທີ 09, ລົງວັນທີ 17 ທັນວາ 2018 ມີດັ່ງນີ້:

1. ຄົ້ນຄວ້າປັບປຸງລະບຽບ ວ່າດ້ວຍການຈັດສັນຕະຫຼາດ ສະບັບເລກທີ 0348/ນວຈ, ລົງວັນທີ 19 ເມສາ 2010 ໂດຍແຍກໃຫ້ລະອຽດເປັນ 2 ເຂດຄື: ຕະຫຼາດໃນເທສະບານ ແລະ ຕະຫຼາດຊານເມືອງ. ສໍາລັບຕະຫຼາດໃນເທສະບານ ແນ່ໃສ່ຫັນທ່າອ່ຽງໃຫ້ທັນສະໄໝດ້ານບໍລິການ, ກໍານົດຕາມມາດຕະຖານຕະຫຼາດຂອງບັນດາປະເທດອາຊຽນ, ວາງມາດຕະຖານສູງ ແລະ ທັນສະໄໝ, ມີຄວາມເປັນລະບຽບຮຽບຮ້ອຍ, ບໍ່ໃຫ້ຈອດລົດຕັນທາງ ແລະ ໃຫ້ຫ່າງອອກຈາກແຄມທາງເຂົ້າໄປ, ໃຫ້ຖືບັນຊີ, ນໍາໃຊ້ເຄື່ອງທັນສະໄໝ ແລະ ກໍານົດນະໂຍບາຍ. ສ່ວນຕະຫຼາດຊານເມືອງກໍບໍ່ຈໍາເປັນມີມາດຕະຖານສູງ ແຕ່ຈະອີງໃສ່ຫຼັກການຄວາມເປັນລະບຽບຮຽບຮ້ອຍ ແລະ ຮັກສາຄວາມປອດໄພໄດ້;
2. ຊຸກຍູ້ບັນດາຕະຫຼາດໃນການສ້າງຕັ້ງກຸ່ມທຸລະກິດຈັດສັນຕະຫຼາດ, ຈະຄົ້ນຄວ້າຊື່ໃໝ່ໃຫ້ເປັນໄປຕາມກົດໝາຍ;
3. ພາຍຫຼັງປັບປຸງກົດລະບຽບ ສະບັບປັບປຸງສໍາເລັດ ແລະ ຮອງຮັບແລ້ວ ຈະມີການຈັດສໍາມະນາຮ່ວມກັບແຕ່ລະຂະແໜງການ ແລະ ບັນດາຫ້າງສັບພະສິນຄ້າ, ຊຸບເປີມາເກັດ, ເຈົ້າຂອງຕະຫຼາດ ເພື່ອໃຫ້ນໍາໃຊ້-ຈັດຕັ້ງປະຕິບັດໄດ້;
4. ອອກແຈ້ງການເຖິງເຈົ້າຂອງຕະຫຼາດ ກ່ຽວກັບໂມງເປີດ-ປິດຕະຫຼາດ ໃຫ້ຄຸ້ມຄອງໄດ້ເປັນຕົ້ນ: ຄວາມປອດໄພ ແລະ ຄວາມເປັນລະບຽບຮຽບຮ້ອຍ;
5. ຄົ້ນຄວ້ານິຕິກໍາວ່າດ້ວຍຂັ້ນຄຸ້ມຄອງລະຫວ່າງ ນະຄອນຫຼວງວຽງຈັນ, ພະແນກອຸດສາຫະກໍາ ແລະ ການຄ້າ ແລະ ເມືອງ ເພື່ອເປັນບ່ອນອີງໃນການຈັດຕັ້ງປະຕິບັດ;
6. ສືບຕໍ່ຊຸກຍູ້ການແກ້ໄຂບັນຫາອື່ນໆ ຫຼື ຂໍ້ຂັດແຍ່ງລະຫວ່າງຕະຫຼາດ ຕາມມະຕິຕົກລົງຂອງອົງການປົກຄອງ ນະຄອນຫຼວງວຽງຈັນ, ຂັ້ນໃດຮັບຜິດຊອບມອບໃຫ້ຂັ້ນນັ້ນເປັນຜູ້ຕັດສິນຊີ້ຂາດ;
7. ສືບຕໍ່ຊຸກຍູ້ໃຫ້ຄະນະຄຸ້ມຄອງຕະຫຼາດຂັ້ນເມືອງຈັດສັນຕະຫຼາດເປົ້າໝາຍຂອງເມືອງ ໃຫ້ເປັນຕະຫຼາດມາດຕະຖານຢ່າງໜ້ອຍ 2 ແຫ່ງຢູ່ເມືອງ ໄຊເສດຖາ ແລະ ສີສັດຕະນາກ.

ພ້ອມນັ້ນ, ຈະມີການຈັດຕັ້ງປະຕິບັດ 4 ມາດຕະຖານຄື:

1. ສໍາມະນາໃຫ້ຜູ້ປະກອບການ, ຫົວໜ່ວຍທຸລະກິດຈັດສັນຕະຫຼາດ, ສູນການຄ້າ, ຮ້ານສັບພະສິນຄ້າໃຫ້ຮັບຮູ້ເຂົ້າໃຈຕໍ່ແຜນການພັດທະນາ ຕາມທິດຫັນເປັນທັນສະໄໝມີຄວາມຢືນຍົງ;
2. ອອກນິຕິກໍາການຄຸ້ມຄອງຕະຫຼາດ, ການຂາຍເຄື່ອງຊະຊາຍ ເພື່ອເປັນບ່ອນອີງໃນການຫັນເອົາຊາວຄ້າຂາຍຊະຊາຍເຂົ້າໄປຢູ່ໃນຮ້ານສັບພະສິນຄ້າ;
3. ຕ້ອງແບ່ງຄວາມຮັບຜິດຊອບໃນການຄຸ້ມຄອງໃຫ້ຈະແຈ້ງ, ຊັດເຈນ, ຂັ້ນໃດເປັນຜູ້ອະນຸຍາດໃຫ້ຂັ້ນນັ້ນເປັນຜູ້ຄຸ້ມຄອງຊີ້ຂາດ ເພື່ອຫຼີກລ່ຽງການໂຍນຄວາມຮັບຜິດຊອບ;
4. ເພີ່ມທະວີການຕິດຕາມກວດກາປະເມີນຜົນ ການຈັດຕັ້ງປະຕິບັດວຽກງານດັ່ງກ່າວເປັນແຕ່ລະໄລຍະ ເພື່ອແກ້ໄຂບັນຫາການຂາຍເຄື່ອງຊະຊາຍ.

ຮຽບຮຽງໂດຍ: ໃບບົວ ຈັນທະລັງສີ

ແຫຼ່ງຂໍ້ມູນຈາກ: laoedaily.com.la