ອຸຕຸໄທ ເຕືອນພາຍຸ “ປາບຶກ” ຈະເຄື່ອນດ້ວຍຄວາມໄວສູງສຸດໃກ້ສູນກາງປະມານ 65 ກິໂລແມັດ/ຊົ່ວໂມງ ຈະເຂົ້າອ່າວໄທມື້ນີ້ ເຮັດໃຫ້ພາກໃຕ້ທາງຕາເວັນອອກຂອງໄທ ມີຝົນຕົກໜັກ. ສ່ວນບໍລິເວນ ອ່າວໄທ ຕອນລຸ່ມຈະມີຄື້ນຂຶ້ນສູງ 3-5 ແມັດ ຊາວເຮືອຄວນອອກເຮືອດ້ວຍຄວາມລະມັດລະວັງ. ສໍາລັບຊາວເຮືອບໍລິເວນອ່າວໄທ ຄວນງົດອອກຈາກຝັ່ງຈົນເຖິງວັນທີ 5 ມັງກອນ 2019.
ລັກສະນະສໍາຄັນທາງອຸຕຸນິຍົມວິທະຍາພາຍຸເຂດຮ້ອນ “ປາບຶກ” (PABOUK) ບໍລິເວນທະເລຈີນຕອນໃຕ້ ມີຄວາມໄວຂອງລົມສູງສຸດໃກ້ເສັ້ນສູນສູດປະມານ 65 ກິໂລແມັດ/ຊົ່ວໂມງ. ພາຍຸນີ້ກໍາລັງເຄື່ອນຕົວຈາກທາງທິດຕະເວັນອອກແບບຊ້າໆ ຄາດວ່າຈະເຄື່ອນຜ່ານປາຍແຫຼມຢວນ ແລະ ເຄື່ອນລົງອ່າວໄທ ໃນວັນທີ 2 ມັງກອນ 2019 ແລະ ຈະເຄື່ອນຂຶ້ນຝັ່ງບໍລິເວນຮອຍຕໍ່ລະຫວ່າງ ແຂວງ ຊຸມພອນ ແລະ ສຸລາດທານີ ໃນຕອນຄໍ່າຂອງວັນທີ 4 ມັງກອນ 2019 ໂດຍທາງພາກໃຕ້ຂອງຈະໄດ້ຮັບຜົນກະທົບໃນລະຫວ່າງວັນທີ 3-5 ມັງກອນນີ້ ເຮັດໃຫ້ພື້ນທີ່ດັ່ງກ່າວມີຝົນເພີ່ມຂຶ້ນ ແລະ ຕົກໜັກໃນບາງແຫ່ງ. ໂດຍທາງກົມອຸຕຸນີຍົມ ໄທ ກ່າວແຈ້ງເຕືອນໃຫ້ປະຊາຊົນໃນບໍລິເວນດັ່ງກ່າວລະວັງຕົວ ເພາະອາດໄດ້ຮັບອັນຕະລາຍຈາກຝົນຕົກໜັກຫາໜັກຫຼາຍ ເຊິ່ງຈະເຮັດໃຫ້ເກີດນໍ້າຖ້ວມ ແລະ ນໍ້າປ່າໄຫຼຫຼາກ, ສ່ວນຄື່ນລົມບໍລິເວນອ່າວໄທຍ ແລະ ທະເລອັນດາມັນມີກໍາລັງແຮງ.
ພາຍຫຼັງປະຊາຊົນພາກໃຕ້ທາງຕາເວັນອອກ, ເຂດອ່າວໄທ ແລະ ຢູ່ຕິດກັບແຄມທະເລ ໄດ້ຮັບຂ່າວ ຈາກອຸຕຸ ໄທ ກ່ຽວກັບພາຍຸ “ປາບຶກ” ກໍມີການອົບພະຍົບ, ເກັບເຂົ້າຂອງເຄື່ອງໃຊ້ອອກຈາກພື້ນທີ່ໄທຢູ່ເຂດທີ່ບ່ອນໄພແລ້ວ ພ້ອມທັງກະກຽມອຸປະກອນຕ່າງໆ ເພື່ອຮັບມືກັບພາຍຸ ແລະ ຖ້າຫາກເກີດຄື້ນໃຫຍ່ທະເລຊັດເຂົ້າມາ ກໍພ້ອມທີ່ຈະອົບພະຍົບອອກຈາກພື້ນທີ່ທັນທີ. ຂະນະທີ່, ຄວາມກົດດັນອາກາດສູງກໍາລັງແຮງຍັງປົກຄຸມບໍລິເວນພາກເໜືອ ປະເທດໄທ ເຮັດໃຫ້ມີອາກາດໜາວເຢັນໂດຍທົ່ວໄປກັບມີລົມແຮງ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: dailynews.co.th, thairath.co.th