ຫ້ອງການກະຊວງອຸດສາຫະກຳ ແລະ ການຄ້າ ອອກແຈ້ງການສະບັບເລກທີ 3323/ຫອຄ.ກທຄວ, ລົງວັນທີ 25 ທັນວາ 2018 ເຖິງບັນດາຂະແໜງການທີ່ກ່ຽວຂ້ອງ ແລະ ອຳນາດການປົກຄອງທ້ອງຖິ່ນຂັ້ນຕ່າງໆ.

ເພື່ອສ້າງເງື່ອນໄຂຄວາມພ້ອມ ໃນໄລຍະລໍຖ້າການປະກາດໃຊ້ບັນຊີຄວບຄຸມ ແລະ ການຕົກລົງຂອງຄະນະປະຈຳສະພາແຫ່ງຊາດ ກ່ຽວກັບການຍົກເວັ້ນການປະຕິບັດບາງມາດຕາຂອງກົດໝາຍສົ່ງເສີມການລົງທຶນ ແລະ ກົດໝາຍວິສາຫະກິດ ທັງເພື່ອຮັບປະກັນປະສິດທິຜົນຂອງການຈັດຕັ້ງປະຕິບັດວຽກງານການຂຶ້ນທະບຽນສ້າງຕັ້ງວິສາຫະກິດ ແລະ ການອອກອະນຸຍາດ ຕາມຄຳສັ່ງເລກທີ 02/ນຍ, ຫ້ອງການ, ກະຊວງອຸດສະຫະກຳ ແລະ ການຄ້າ ແຈ້ງມາຍັງພາກສ່ວນທີ່ກ່ຽວຂ້ອງຊາບ ແລະ ຂໍຄວາມຮ່ວມມືໃນການຈັດຕັ້ງປະຕິບັດດັ່ງນີ້:

1. ເລື່ອນການເລີ່ມປະຕິບັດການຂຶ້ນທະບຽນສ້າງຕັ້ງວິສາຫະກິດ, ການອອກໃບອະນຸຍາດລົງທຶນ ຫຼື ອະນຸຍາດດຳເນີນທຸລະກິດ ຕາມຄຳສັ່ງ, ສະບັບເລກທີ 02/ນຍ ຈາກວັນທີ 1 ມັງກອນ 2019 ຕາມທີ່ບົ່ງໄວ້ໃນແຈ້ງການ, ເລກທີ 2009/ຫຄອ.ກທຄວ, ລົງວັນທີ 22 ສິງຫາ 2018 ມາເປັນວັນທີ 1 ກຸມພາ 2019.
2. ໃນໄລຍະແຕ່ນີ້ ຫາວັນທີ 1 ກຸມພາ 2019 ໃຫ້ແຕ່ລະພາກສ່ວນຈັດຕັ້ງປະຕິບັດວຽກງານການໃຫ້ບໍລິການ ທີ່ຕິດພັນກັບການເລີ່ມຕົ້ນທຸລະກິດ ຕາມປົກກະຕິ ແຕ່ໃຫ້ມີຄວາມສະດວກ ວ່ອງໄວຍິ່ງຂຶ້ນ, ໃນນີ້:

• ຂໍຄວາມຮ່ວມມືຈາກບັນດາກົມ ຫຼື ພາກສ່ວນຕ່າງໆທີ່ກ່ຽວຂ້ອງຂອງກະຊວງ, ທະບວງກົມ ສ້າງ ຫຼື ປັບປຸງນິຕິກຳການພິຈາລະນາ ແລະ ການແບ່ງຂັ້ນຄຸ້ມຄອງການອອກອະນຸຍາດດຳເນີນທຸລະກິດ, ພ້ອມທັງຄົ້ນຄວ້າບັນຊີກິດຈະການຕ້ອງຂໍອະນຸຍາດ ແລະ ບໍ່ຈຳເປັນຂໍອະນຸຍາດດຳເນີນທຸລະກິດໂດຍໄວ;
• ໃຫ້ພະແນກອຸດສາຫະກຳ ແລະ ການຄ້າຂັ້ນແຂວງລາຍງານອຳນາດການປົກຄອງທ້ອງຖິ່ນຂອງຕົນ ເພື່ອກະກຽມຄວາມພ້ອມໃນການຈັດຕັ້ງປະຕິບັດການຂຶ້ນທະບຽນສ້າງຕັ້ງວິສາຫະກິດ ແລະ ການອອກອະນຸຍາດ ຕາມເນື້ອໃນ ຈິດໃຈຄຳສັ່ງຂອງນາຍົກດັ່ງກ່າວ ໃຫ້ບັນລຸຜົນ ຕາມຄາດໝາຍທີ່ວາງໄວ້ ໃນກໍລະນີມີບັນຫາໃຫ້ພົວພັນກັບກະຊວງອຸດສາຫະກຳ ແລະ ການຄ້າ (ກົມທະບຽນ ແລະ ການຄຸ້ມຄອງວິສາຫະກິດ).

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ຫ້ອງການກະຊວງອຸດສາຫະກຳ ແລະ ການຄ້າ