ສປ ຈີນ ເລີ່ມໃຊ້ກົດໝາຍເອເລັກໂຕຣນິກ ສະບັບທໍາອິດຕັ້ງແຕ່ວັນທີ 1 ມັງກອນ ເປັນຕົ້ນໄປ ເພື່ອຈັດລະບຽບດ້ານທຸລະກິດການຄ້າແບບເອເລັກໂຕຣນິກ (ອອນລາຍ) ຂອງຈີນທີ່ມີຂະໜາດໃຫຍ່ທີ່ສຸດໃນໂລກ ພ້ອມທັງສັ່ງຜູ້ຂາຍອອນລາຍຫ້າມໃຊ້ວິທີການທີ່ບໍ່ເໝາະສົມກັບລູກຄ້າ ຫາກມີການລະເມີດຈະຖືກປັບ 2 ລ້ານຢວນ (ປະມານ 2.462 ລ້ານກີບ).
ກົດໝາຍດັ່ງກ່າວ ໄດ້ສ້າງຂຶ້ນມາເພື່ອຄຸ້ມຄອງສິດທິຂອງຜູ້ບໍລິໂພກທີ່ເປັນໝາກຫົວໃຈສໍາຄັນ ເຮັດໃຫ້ຜູ້ທີ່ຈະຊື້ມີຄວາມໝັ້ນໃຈໃນການສັ່ງຊື້ສິນຄ້າທາງອອນລາຍຫຼາຍຂຶ້ນ. ນອກນີ້, ກົດໝາຍໃໝ່ຍັງບໍ່ອະນຸຍາດໃຫ້ຜູ້ຂາຍໃຊ້ວິທີບໍ່ເໝາະສົມ ເຊັ່ນ: ລົບຂໍ້ຄວາມວິຈານຂອງລູກຄ້າ ແລະ ຍົກເລີກຄໍາສັ່ງຊື້ຕາມໃຈ. ຜູ້ຂາຍກ່ຽວກັບທຸລະກິດອອນລາຍໃນຮູບແບບຕ່າງໆ ລວມທັງທາງວີແຊັດ, ເວັບໄຊສ໌, ຂາຍຜ່ານການຖ່າຍທອດສົດ ແລະ ອື່ນໆ ຈະຕ້ອງລົງທະບຽນເຮັດທຸລະກິດກ່ອນ ພ້ອມທັງມີໃບປະກອບການຈ່າຍພາສີອາກອນຢ່າງຖືກຕ້ອງ ແລະ ຕ້ອງມີຄວາມຮັບຜິດຊອບໃນກໍລະນີພົບສິນຄ້າປອມ. ສໍາລັບຜູ້ໃດຫາກຝ່າຝືນລະບຽບກົດໝາຍເອເລັກໂຕຣນິກ ຈະຖືກປັບໃໝສູງສຸດ 2 ລ້ານຍວນ.
ສປ ຈີນ ໄດ້ເລີ່ມພິຈາລະນາຮ່າງກົດໝາຍວ່າດ້ວຍເອເລັກໂຕຣນິກ ມາແຕ່ປີ 2013 ໂດຍມີການປັບປຸງພັດທະນາເນື້ອໃນຊ່ວງປີຜ່ານມາ ແລະ ໄດ້ຮັບການອະນຸມັດຈາກສະພາ ໃນເດືອນ ສິງຫາ ປີຜ່ານມາ ແລະ ມີຜົນບັງຄັບໃຊ້ເລີ່ມແຕ່ຕົ້ນປີນີ້ໄປ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: tnamcot.com
ຮູບພາບຈາກ: thaibiz.net