ຈາກເຫດການແກ໊ສລະເບີດສົ່ງຜົນໃຫ້ໃຫ້ອາພາດເມັ້ນສູງ 10 ຊັ້ນພັງລົງມາ ເມື່ອວັນທີ 31 ທັນວາ 2018 ທີ່ຜ່ານມາ ເຊິ່ງປັດຈຸບັນທາງເຈົ້າໜ້າທີ່ກູ້ໄພໄດ້ພົບຮ່າງຜູ້ເສຍຊີວິດ 8 ສົບ ແຕ່ຄາດວ່າອາດມີຍອດຜູ້ເສຍຊີວິດເພີ່ມຂຶ້ນເນື່ອງຈາກຍັງມີຜູ້ສູນຫາຍອີກ 36 ຄົນ.
ສຳນັກຂ່າວ ບີບີຊີ ລາຍງານເມື່ອວັນທີ 1 ມັງກອນ 2019 ວ່າ ເຈົ້າໜ້າທີ່ກູ້ໄພໃນເມືອງ ແມກນິໂຕກຣອສ ປະເທດຣັດເຊຍ ພົບເດັກນ້ອຍອາຍຸ 11 ເດືອນລອດຊີວິດຢູ່ພາຍໃຕ້ຊາກຫັກພັງຂອງອາຄານ ໂດຍເດັກນ້ອຍຄົນນີ້ຢູ່ໃນອາການບາດເຈັບສາຫັດ.
ຕາມການເປີດເຜີຍຂອງຜູ້ປົກຄອງແຄວ້ນເຊລຍາບິນສ໌ ເຈົ້າໜ້າທີ່ກູ້ໄພໄດ້ຍິນສຽງເດັກນ້ອຍໄຫ້ລະຫວ່າງຂຸດຄົ້ນຊາກຫັກພັງຂອງອາຄານກ່ອນຈະພົບກັບເດັກນ້ອຍເພດຊາຍ ເຊິ່ງຮູ້ຊື່ໃນເວລາຕໍ່ມາວ່າ “ອີວານ” ໂດຍເດັກນ້ອຍມີບາດແຜຈາກຫິມະກັດຮຸນແຮງ ເນື່ອງຈາກອຸນຫະພູມໃນຊ່ວງກາງເວັນມີອຸນຫະພູມ -17 ອົງສາ, ລວມເຖິງມີບາດແຜທີ່ຫົວ ແລະ ກະດູກຂາຫັກ ຕອນນີ້ເດັກຊາຍອີວານໄດ້ຖືກສົ່ງໄປຮັກສາຕົວທີ່ໂຮງໝໍໃນນະຄອນຫຼວງ ມອສໂກຮຽບຮ້ອຍແລ້ວ.
ຂະນະທີ່ກະຊວງສະຖານະການສຸກເສີນຂອງຣັດເຊຍລະບຸວ່າ ແມ່ຂອງເດັກຊາຍ ອີວານ ເປັນໜຶ່ງໃນຜູ້ລອດຊີວິດຈາກເຫດການຄັ້ງນີ້ ໄດ້ເດີນທາງໄປຢ້ຽມຢາມລູກຊາຍທີ່ໂຮງໝໍແລ້ວ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: dailynews, thairath, matichon