ສຳນັກຂ່າວຕ່າງປະເທດລາຍງານຈາກນະຄອນໄທເປ ປະເທດຈີນ (ໄຕ້ຫວັນ) ເມື່ອວັນທີ 28 ທັນວາ 2018ວ່າ ຈາກກໍລະນີ ພົນລະເມືອງຫວຽດນາມ 152 ຄົນ ເປັນຍິງ 50 ຄົນ ແລະ ຊາຍ 102 ຄົນ ເດີນທາງມາທີ່ໄຕ້ຫວັນໃນຮູບແບບຂອງກຸ່ມນັກທ່ອງທ່ຽວ ໂດຍຜ່ານດ່ານເມືອງເກົາສົງ ເຊິ່ງເປັນເມືອງໃຫຍ່ທາງພາກໃຕ້ຂອງເກາະ ແບ່ງເປັນ 2 ກຸ່ມ ຄືວັນທີ 21 ທັນວາ 2018 ແລະ ວັນທີ 23 ທັນວາ 2018 ທີ່ຜ່ານມາ ກ່ອນແຍກກັນຫຼົບໜີ ເຊິ່ງຫຼາຍຝ່າຍເຊື່ອວ່າເປັນເຈດຕະນາແອບແຝງໃນການລັກລອບເຂົ້າເມືອງເພື່ອມາໃຊ້ແຮງງານແບບຜິດກົດໝາຍ ແລະ ໜ້າຈະເປັນການວາງແຜນລ່ວງໜ້າໄວ້ແລ້ວ.
ສຳນັກງານກວດກາຄົນເຂົ້າເມືອງຂອງໄຕ້ຫວັນອອກຖະແຫຼງການວ່າ ເຈົ້າໜ້າທີ່ຈາກໜ່ວຍງານຫຼາຍແຫ່ງກຳລັງພະຍາຍາມຢ່າງສຸດຄວາມສາມາດໃນການຮ່ວມກັນຕິດຕາມຄົ້ນຫາຜູ້ທີ່ຫາຍຕົວໄປທັງໝົດ ໂດຍທາງເຈົ້າໜ້າທີ່ຕຳຫຼວດປະຕິເສດທີ່ຈະໃຫ້ຂໍ້ມູນ ແຕ່ຍອມເຜີຍພຽງວ່າເຈົ້າໜ້າທີ່ມີ “ເບາະແສເບື້ອງຕົ້ນ” ຂອງຜູ້ຫຼົບໜີທັງ 152 ຄົນແລ້ວ.
ດ້ານກະຊວງການຕ່າງປະເທດຫວຽດນາມອອກຖະແຫຼງການກ່ຽວກັບສະຖານະການທີ່ເກີດຂຶ້ນ ວ່າລັດຖະບານຫວຽດນາມຍິນດີໃຫ້ຄວາມຮ່ວມມືກັບທາງການໄຕ້ຫວັນຢ່າງເຕັມທີ່ ໃນການຕິດຕາມຕົວພົນລະເມືອງທັງ 152 ຄົນ ກັບມາໃຫ້ໄດ້ໄວທີ່ສຸດ ເພື່ອປ້ອງກັນການສົ່ງຜົນກະທົບຕໍ່ຄວາມສຳພັນລະດັບທະວີພາຄີໂດຍສະເພາະໃນດ້ານເສດຖະກິດ ແລະ ການທ່ອງທ່ຽວ.
ດ້ານສຳນັກງານເສດຖະກິດ ແລະ ວັດທະນະທຳໄທເປ ປະຈຳຫວຽດນາມໄດ້ລະງັບການອອກວີຊ່ານັກທ່ອງທ່ຽວໃຫ້ແກ່ພົນລະເມືອງຫວຽດນາມ 182 ຄົນໄວ້ກ່ອນ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: dailynews