ໃນຮອບປີ 2018 ທົ່ວປະເທດເກີດມີເຫດການທີ່ເດັ່ນໆ ແລະ ສໍາຄັນເປັນຈໍານວນຫຼວງຫຼາຍບໍ່ວ່າຈະເປັນທາງດ້ານວັດທະນະທໍາ-ສັງຄົມ, ເສດຖະກິດ, ການຄ້າ-ການລົງທຶນ ແລະ ອື່ນໆ ເຊິ່ງທີມງານລາວໂພສ ໄດ້ທໍາການສະຫຼຸບຂ່າວໃຫ້ທ່ານໄດ້ຮູ້ກັນອີກຄັ້ງ ໂດຍຈະເລີ່ມແຕ່ອັນດັບຕົ້ນໆກໍຄື:

ອັນດັບທີ 1 ເຫດການສັນເຂື່ອນເຊປຽນ-ເຊນໍ້ານ້ອຍແຕກທີ່ ເມືອງ ສະໜາມໄຊ ແຂວງ ອັດຕະປື

ເຫດການສັນເຂື່ອນເຊປຽນ-ເຊນໍ້ານ້ອຍແຕກ ເກີດຂຶ້ນເມື່ອວັນທີ 23 ກໍລະກົດ 2018, ທີ່ເມືອງ ສະໜາມໄຊ ແຂວງ ອັດຕະປື ພາກໃຕ້ຂອງລາວ ຖືເປັນຂ່າວທີ່ສ້າງຄວາມໂສກເສົ້າເສຍໃຈທີ່ສູດຂອງຊາວເມືອງສະໜາມໄຊ ກໍຄືປະຊາຊົນລາວທົ່ວປະເທດ ທີ່ໄດ້ຮັບຜົນກະທົບບໍ່ຈະວ່າເປັນຜົນກະທົບທາງດ້ານວັດຖຸ ແລະ ຈິດໃຈ ເປັນຄວາມເສຍຫາຍອັນໃຫຍ່ຫຼວງຂອງປະເທດເຮົາ. ນອກຈາກນັ້ນ, ເຫດການດັ່ງກ່າວ ຍັງໂດ່ງດັງໄປທົ່ວໂລກກາຍເປັນວ່າປະເທດໃດກໍ່ຮູ້ຈັກປະເທດລາວເລີຍແຫຼະ, ລັດຖະບານລາວ ກຳນົດໃຫ້ເປັນເຂດປະສົບໄພພິບັດສຸກເສີນລະດັບຊາດ.

ອັນດັບທີ 2 ການບໍລິຈາກວັດຖຸປັດໄຈຊ່ວຍເຫຼືອພໍ່ແມ່ປະຊາຊົນ ເມືອງ ສະໜາມໄຊ ແຂວງ ອັດຕະປື

ຍັງເປັນຂ່າວກ່ຽວກັບນໍ້າຖ້ວມເຊັ່ນເຄີຍ ເພາະປະຊາຊົນ ເມືອງສະໜາມໄຊ ໄດ້ຮັບຜົນກະທົບເປັນຈໍານວນຫຼວງຫຼາຍເປັນຕົ້ນຂາດທີ່ຢູ່ອາໄສ, ອາຫານການກິນ, ເຄື່ອງນຸ່ງຫົ່ມ ລວມເຖິງອຸປະກອນເຄື່ອງໃຊ້ຕ່າງໆ ທີ່ໃຊ້ເຂົ້າໃນການຊ່ວຍເຫຼືອ ແລະ ຄົ້ນຫາຜູ້ສູນຫາຍ ແລະ ອື່ນໆ ຈົນກາຍເປັນຂ່າວທີ່ຫຼາຍຄົນໃຫ້ຄວາມສົນໃຈ ແລະ ຕິດຕາມສົ່ງກໍາລັງໃຈ ໂດຍສະເພາະການບໍລິຈາກອາຫານ-ນໍ້າດື່ມ, ເຄື່ອງນຸ່ງຫົ່ມ-ຢາປົວພະຍາດ ທີ່ຂາດບໍ່ໄດ້ກໍຄືເງິນ ຖືວ່າມີການໂຄສະນະ ແລະ ລົງຂ່າວທົ່ວປະເທດ ໂດຍມີຈຸດບໍລິຈາກຕາມອົງການສໍານັກງານ, ສະມາຄົມຊ່ວຍເຫຼືອສັງຄົມພາຍໃນ ແລະ ສາກົນ ແລະ ຕ່າງປະເທດກໍ່ໃຫ້ການຊ່ວຍເຫຼືອເຊັ່ນ.

ອັນດັບທີ 3 ການສະຫຼອງ ແຄນລາວ ຖືກຮັບຮອງເຂົ້າເປັນມໍລະດົກໂລກ

ໃນທີ່ສຸດ ແຄນລາວ ຫຼື ສຽງແຄນລາວ ກໍໄດ້ຖືກຮັບຮອງຂຶ້ນເປັນມໍລະດົກໂລກ ຈາກອົງການ ອຸຍແນັສໂກ ເຊິ່ງໄດ້ມີພິທີການສະເຫຼີມສະຫຼອງຢ່າງໃຫຍ່ທີ່ ນະຄອນຫຼວງວຽງຈັນໃນວັນທີ 11 ເມສາ 2018 ຫຼັງໄດ້ຮັບຮອງເປັນມໍລະດົກວັດທະນະທໍາຂອງມະນຸດ ໃນກອງປະຊຸມຄັ້ງທີ 12 ຂອງຄະນະກໍາມະການ ລະຫວ່າງຊາດ ວ່າດ້ວຍການອະນຸລັກວັດທະນະທໍາ ໃນວັນທີ 7 ທັນວາ 2017.ນັບເປັນສິ່ງທີ່ສ້າງຄວາມປະທັບໃຈແກ່ປະຊາຊົນລາວທົ່ວປະເທດສົມກັບນາມຊື່ວ່າ “ເມືອງລາວ ເຂົ້າໜຽວສຽງແຄນ” ອີຫຼີ.  ລາວໂພສ ຂໍຍົກໃຫ້ເປັນເປັນຂ່າວດີຂ່າວເດັ່ນແຫ່ງປີ 2018.

ອັນດັບ 4 ທ່ານ ພົນໂທ ຈັນສະໜອນ ຈັນຍາລາດ ເລື່ອນຊັ້ນຂຶ້ນເປັນ ພົນເອກ ຄົນທີ່ສາມຂອງ ສປປ ລາວ.

ໃນການເລື່ອນຊັ້ນ ທ່ານ ພົນໂທ ຈັນສະໜອນ ຈັນຍາລາດ ເລື່ອນຊັ້ນຂຶ້ນເປັນ ພົນເອກ ໂດຍເລື່ອນຊັ້ນໃນວັນທີ 13 ທັນວາ 2018 ຫຼັງປະທານປະເທດ ໄດ້ອອກລໍາລັດ ລົງວັນທີ 10 ທັນວາ 2018, ສະບັບເລກທີ317/ປປທ. ເປັນຂ່າວດີ ແລະ ຍ້ອງຍໍກັນໄປທົ່ວ ເພາະປະເທດລາວມີຊັ້ນນາຍພົນພຽງ 3 ຄົນ ແລະ ທ່ານກໍໄດ້ເປັນ ພົນໂທ ຄົນທີ 3 ຂອງລາວ ໂດຍຖັດຈາກ ທ່ານ ພົນເອກ ຄໍາໄຕ ສີພັນດອນ ແລະ ທ່ານ ພົນເອກ ສີສະຫວາດ ແກ້ວບຸນພັນ.

ອັນດັບທີ 5 ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII

ຖືເປັນກອງປະຊຸມທີ່ໃຫຍ່ ລະດັບຊາດ ເພາະໃນໜຶ່ງປີຈັດຂຶ້ນໜຶ່ງຄັ້ງ ແລະ ເປັນກອງປະຊຸມທີ່ປະຊາຊົນລາວ, ພະນັກງານ, ທະຫານ-ຕໍາຫຼວດ ໃນຂອບເຂດທົ່ວປະເທດ ໃຫ້ການຕິດຕາມ ແລະ ອ່ານຂ່າວນີ້ເປັນຈໍານວນຫຼາຍກ່ຽວກັບວຽກງານການຈັດຕັ້ງປະຕິບັດໃນປີຜ່ານ ແລະ ທິດທາງແຜນການຈັດຕັ້ງປະຕິບັດໃນຕໍ່ໜ້າ. ນອກນັ້ນ, ຍັງມີແນວທາງການແກ້ໄຂບັນຫາສໍາຄັນ ແລະ ແຜນການພັດທະນາເສດຖະກິດສັງຄົມ ເຊິ່ງປີນີ້ກໍມີຫຼາຍບັນຫາພົ້ນເດັ່ນທີ່ເປັນຜົນດີມາໃຫ້ປະຊາຊົນທັງຊາດ. ພ້ອມນັ້ນ, ຍັງມີການຮັບຮອງເອົາກົດໝາຍໃໝ່ຕ່າງໆ ອັນໄດ້ສ້າງຄວາມສະດວກໃນການປະຕິບັດໜ້າວຽກຫຼາຍຂຶ້ນ.

ຮຽບຮຽງໂດຍ: ໃບບົວ ຈັນທະລັງສີ